ចាប់ខ្លួនអ្នកទោសបានចំនួន4នាក់ក្នុងចំណោម 7 នាក់ ដែលលួចទម្លុះរបងថ្មរត់គេចខ្លួនចេញពីគុកខេត្តស្ទឹងត្រែង

ខេត្តស្ទឹងត្រែងៈ កម្លាំងសមត្ថកិច្ចបានធ្វើការតាមប្រមាញ់ទាំងយប់ទាំងថ្ងៃដើម្បីស្វែងរកចាប់ខ្លួនអ្នកទោសចំនួន 7 នាក់បន្ទាប់ពីបានបុកទម្លុះរបងថ្មលួចរត់គេចខ្លួនចេញពីពន្ធនាគារខេត្តស្ទឹងត្រែង កាលពីវេលាម៉ោង 3 និង 20 នាទី ទៀបភ្លឺឈានចូលថ្ងៃទី 8 ខែវិច្ឆិកាឆ្នាំ 2021 រហូតមកដល់ថ្ងៃទី 12 ខែវិច្ឆិកា ឆ្នាំ 2021 នេះ កម្លាំងសមត្ថកិច្ចបានធ្វើការចាប់ឃាត់ខ្លួនអ្នកទោសឧក្រិដ្ឋបានមកវិញចំនួន 4 នាក់ហើយ ក្នុងចំណោម 7 ។ សមត្ថកិច្ចបានឲ្យដឹងថា អ្នកទោសឧក្រិដ្ឋចំនួន 7 នាក់ បានទម្លុះរបងថ្មលួចរត់គេចចេញពីពន្ធនាគារខេត្តស្ទឹងត្រែងនៅវេលាម៉ោងទៀតភ្លឺឈានចូលថ្ងៃទី 8 ខែវិច្ឆិកា ឆ្នាំ 2021 គឺចាប់ពីថ្ងៃទី 9 ខែវិច្ឆិកា ឆ្នាំ 2021 រហូតដល់ថ្ងៃទី 12 ខែវិច្ឆិកានេះខាងកម្លាំងសមត្ថកិច្ចចម្រុះខេត្ត ក៏បានចាប់ឃាត់ខ្លួនអ្នកទោសឧក្រិដ្ឋ ខាងលើនោះ បានចំនួន4នាក់ហើយ នៅក្នុងចំណោម 7 នាក់ ។ សមត្ថកិច្ចបានបញ្ជាក់ថា អ្នកទោសចំនួន4នាក់ ដែលខាងកម្លាំងសមត្ថកិច្ច ចម្រុះចាប់បាននាំខ្លួនយកត្រឡប់មកវិញនោះ ទី1មានឈ្មោះ ទូច វ៉ាត ភេទប្រុស ឆ្នាំកំណើត1981 រស់នៅត្បូងខ្លា ខេត្តស្ទឹងត្រែង មានអត្ថលេខ ST.091732 , ទី 2 ឈ្មោះវ៉ាន់ ភូ ប្រុស ឆ្នាំកំណើតកើតឆ្នាំ 1993 មានអត្តលេខ(ST.002153) ,ទី 3ឈ្មោះភិត ងិន ប្រុស ឆ្នាំកំណើត 1981 មានអត្តលេខ(ST.002119) អ្នកទាំងបីនាក់ខាងលើនេះជាប់បទល្មើស ជួញដូរគ្រឿងញៀនក្នុងកម្រិតស្រាល ,និងទី 4 ឈ្មោះចាក់លី ចឺតាលី ភេទប្រុស ជនជាតិឡាវ ជាមេខ្លោងជួញដូរគ្រឿងញៀន ដែលច្បាប់បានកាត់ទោស ឲ្យជាប់គុកអស់មួយជីវិត។ សូមបញ្ជាក់ផងដែរថា អ្នកទោសឧក្រិដ្ឋចំនួន 7 នាក់ ដែលបានលួចទម្លុះរបងថ្ម រត់គេចខ្លួនចេញពីពន្ធនាគារខេត្តស្ទឹងត្រែងខាងលើនោះ គឺនៅសល់ចំនួន3នាក់ទៀត ឥឡូវនេះសមត្ថកិច្ចកំពុងតែធ្វើការស្រាវជ្រាវ តាមប្រមាញ់ចាប់ខ្លួនអ្នកទោសដែលនៅសេសសល់ខាងលើនោះ ឲ្យខានតែបាន ដើម្បីយកមកផ្តន្ទាទោសទៅតាមផ្លូវច្បាប់ ។ (ដោយ សហការី tnm tv ស្ទឹងត្រែង)