ប្រធានអង្គការ WHO និងលោក Lavrov ព្រមព្រៀងគ្នាទៅលើតម្រូវការក្នុងការពង្រឹងប្រព័ន្ធសុខភាពសកលលោក

អគ្គនាយកអង្គការសុខភាពពិភពលោក (WHO) លោក Tedros Adhanom Ghebreyesus បាននិយាយកាលពីថ្ងៃអាទិត្យថា លោកបានជួបជាមួយរដ្ឋមន្ត្រីការបរទេសរុស្ស៊ី លោក Sergey Lavrov នៅក្នុងកិច្ចប្រជុំកំពូល G20 នៅទីក្រុងរ៉ូម ហើយបានព្រមព្រៀងគ្នាអំពីតម្រូវការក្នុងការពង្រឹងប្រព័ន្ធថែទាំសុខភាពសកលលោក និងតួនាទីសំខាន់របស់អង្គការសុខភាពពិភពលោក។

លោក Ghebreyesus បានសរសេរនៅលើបណ្តាញសង្គម Twitter ថា «លោកបានជួបជាមួយលោក Sergey Lavrov រដ្ឋមន្ត្រីការបរទេសរុស្ស៊ីនៅឯកិច្ចប្រជុំកំពូល G20 Rome ហើយបានព្រមព្រៀងគ្នាថា យើងត្រូវពង្រឹងស្ថាបត្យកម្មសុខភាព ដែលរួមមានទាំងតួនាទីសំខាន់របស់ WHO ដើម្បីការពារចំពោះការគំរាមកំហែងនានាដល់សុខភាពមនុស្ស»។

ប្រធានអង្គការ WHO បាននិយាយថា លោកក៏បានពិភាក្សាគ្នាជាមួយរដ្ឋមន្ត្រីការបរទេសរុស្ស៊ីផងដែរអំពីសម័យប្រជុំពិសេសនៃមហាសន្និបាតសុខភាពពិភពលោកនាពេលខាងមុខទៅលើកតិកាសញ្ញាអន្តរជាតិស្តីពីការត្រៀមខ្លួន និងការឆ្លើយតបទៅនឹងជំងឺរាតត្បាត។ សម័យប្រជុំនោះគ្រោងនឹងប្រព្រឹត្តទៅនៅក្នុងខែវិច្ឆិកានេះ។

ក្រសួងការបរទេសរុស្ស៊ីបាននិយាយនៅក្នុងសេចក្តីថ្លែងការណ៍មួយកាលពីថ្ងៃសៅរ៍បន្ទាប់ពីកិច្ចប្រជុំរបស់លោក Lavrov និងលោក Ghebreyesus នៅខាងក្រៅកិច្ចប្រជុំកំពូល G20 នៅទីក្រុងរ៉ូមថា អ្នកការទូតកំពូលរបស់រុស្ស៊ីបានលើកឡើងអំពីសារៈសំខាន់នៃការដាក់បញ្ចូលគ្នានូវវ៉ាក់សាំងការពារជំងឺកូវីដ-១៩ របស់រុស្ស៊ីនៅក្នុងបញ្ជីវ៉ាក់សាំងដែលត្រូវបានណែនាំដោយអង្គការ WHO សម្រាប់ការប្រើប្រាស់ជាបន្ទាន់។

អ្នកនាំពាក្យក្រសួងការបរទេសរុស្ស៊ី លោកស្រី Maria Zakharova បាននិយាយនៅក្នុងការផ្សាយបន្តផ្ទាល់នៅលើប៉ុស្តិ៍ទូរទស្សន៍ Solovyov-Live ថា លោក Ghebreyesus បានសម្តែងការដឹងគុណចំពោះលោក Lavrov សម្រាប់គំនិតផ្តួចផ្តើមដោយប្រធានាធិបតីរុស្ស៊ី លោក Vladimir Putin ទៅលើការទទួលស្គាល់គ្នាទៅវិញទៅមកនូវការចាក់វ៉ាក់សាំងដោយក្រុមប្រទេស G20 ៕