ពិតជាអស្ចារ្យណាស់កូនខ្មែរអង្គរមែន ឈ្មោះ ចូដុន បានចូលប្រគួតក្នុងក្រុមកីឡាលោតទឹករបស់សហរដ្ឋអាមេរិក នាការប្រកួតកីឡាអូឡាំពិក។
បើយោងតាមផេករបស់ស្ថានទូតអាមេរិក បានបង្ហោះមុននេះបន្តិចថា កូនខ្មែរមួយរូប កាលនៅអាយុ ១៨ ខែ ឈ្មោះ ពិសី ហៅ Jordan ត្រូវបានបុរសជនជាតិអាមេរិកដែលស្រឡាញ់មនុស្សភេទដូចគ្នា បានសុំយកទៅចិញ្ចឹមពីប្រទេសកម្ពុជា។ ឳពុករបស់ Jordan មិនដឹងថា កូនចិញ្ចឹមគាត់ នោះនឹងស្លាប់ឬរស់ទេ។ ពេលនេះ Jordan កំពុងតំណាងឲ្យ សហរដ្ឋអាមេរិក (និងកម្ពុជា) នៅក្នុងក្រុមកីឡាលោតទឹករបស់សហរដ្ឋអាមេរិក នាការប្រកួតកីឡាអូឡាំពិក។
ក្នុងនាមខ្មែរដូចគ្នា មានចិត្តរំភើបចំពោះរឿង របស់ Jordan និងឳពុករបស់គាត់។ សូមចូលរួម ជូនពរគាត់ ឱ្យជួបនឹងសំណាងល្អ ក្នុងពេលដែលគាត់ចូលប្រកួត ក្នុងវិញ្ញាសាបុរស លោតកម្ពស់ ១០ម៉ែត្រ នៅថ្ងៃស្អែក!
នៅពេលលើកដៃឡើងលើពត់ខ្លួនឲ្យត្រង់ដើម្បីត្រៀមលោតទឹកពីវេទិកាប្រកួតក្នុងពហុកីឡដ្ឋានអូឡាំពិកនៅទីក្រុងតូក្យូ នាថ្ងៃសុក្រនេះ លោក Jordan Pisey Windle នឹងបង្ហាញទង់ជាតិពណ៌ខៀវក្រហម ស របស់ប្រទេសកំណើតលោក គឺប្រទេសកម្ពុជា។
នៅថ្ងៃសុក្រ ទី ៦ ខែសីហានេះ លោក Jordan Pisey Windle អាយុ២២ឆ្នាំ គឺជាអត្តពលិកអូឡាំពិកលោតទឹកអាមេរិកដើមកំណើតខ្មែរ ដែលនឹងតំណាងឲ្យក្រុមកីឡាករអាមេរិកដើម្បីប្រកួតដណ្តើមមេដាយក្នុងវិញ្ញាសាលោតទឹកផ្នែកបុរសកម្ពស់ ១០ម៉ែត្រវគ្គដំបូង នាម៉ោង ១រសៀល ម៉ោងនៅប្រទេសកម្ពុជា ដែលត្រូវនឹងម៉ោង ២ទាបភ្លឺម៉ោងនៅរដ្ឋធានីវ៉ាស៊ីនតោន។
នៅក្នុងវគ្គដំបូងនេះ លោក Jordan Windle ត្រូវប្រកួតជាមួយនឹងកីឡាករ២៨នាក់ផ្សេងទៀត មកពីប្រទេស ១៧ ក្នុងនោះរួមមានដៃគូរបស់លោកម្នាក់ដែលតំណាងឲ្យសហរដ្ឋអាមេរិកផងដែរ។ បើលោកទទួលបានពិន្ទុខ្ពស់មួយ លោកនឹងអាចប្រកួតក្នុងវគ្គពាក់កណ្តាលផ្តាច់ព្រាត់នៅថ្ងៃសៅរ៍ ទី ៧ ម៉ោង៨ព្រឹក ម៉ោងនៅកម្ពុជា ដែលត្រូវនឹងម៉ោង ៩យប់ ម៉ោងនៅរដ្ឋធានីវ៉ាស៊ីនតោន។ ដូចគ្នាដែរ បើលោកទទួលបានពិន្ទុខ្ពស់កាន់តែល្អលោកនឹងអាចប្រកួតក្នុងវគ្គផ្តាច់ព្រាត់ ដើម្បីយកមេដាយមាស ប្រាក់ ឬសំរិទ្ធ នៅថ្ងៃសៅរ៍ដដែលតែនៅម៉ោង ១១រសៀលម៉ោងនៅកម្ពុជា។
នៅលើវេទិកាប្រកួតកីឡាជាលក្ខណៈអន្តរជាតិដ៏ប្រវត្តិសាស្ត្រនេះ ដែលប្រារព្ធធ្វើឡើងដោយគ្មានអ្នកទស្សនាផ្ទាល់ដោយសារជំងឺកូវីដ១៩ លោក Jordan Windle សង្ឃឹមថាវត្តមានរបស់លោកនៅក្នុងការប្រកួតកីឡាអូឡាំពិកនៅទីក្រុងតូក្យូ ប្រទេសជប៉ុន ទោះឈ្នះមេដាយ ឬមិនឈ្នះនឹងលើកទឹកចិត្តដល់យុវជននិងកុមារដែលមានប្រវត្តិកំណើតស្រដៀងនឹងរូបលោកឲ្យមានក្តីស្រមៃធំក្នុងជីវិត ទាំងអ្នកនៅក្នុងប្រទេសកម្ពុជាដែលជាប្រទេសកំណើតរបស់លោកនិងនៅជុំវិញពិភពលោក។
