អាជ្ញាធរជាតិអប្សរាចុះកិច្ចព្រមព្រៀងជាមួយក្រុមហ៊ុនប្រេងឥន្ធន: Total Energies លើគម្រោងការដាំកូនឈើក្នុងរមណីយដ្ឋានអង្គរ !

ចេញផ្សាយ ថ្ងៃទី 12 ខែ មិថុនា ឆ្នាំ 2021 82

សៀមរាប៖ នៅថ្ងៃទី១១ ខែមិថុនា ឆ្នាំ២០២១ ក្រោមអធិបតីភាពដ៏ខ្ពង់ខ្ពស់លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្ប: អាជ្ញាធរជាតិអប្សរាបានចុះកិច្ចព្រមព្រៀងជាមួយនឹងក្រុមហ៊ុន Total Energies ដែលពិធីនេះធ្វើឡើងរវាងឯកឧត្តម ហង់ ពៅ អគ្គនាយកអាជ្ញាធរជាតិអប្សរា និងលោក Asif IQBAL នាយកគ្រប់គ្រងទូទៅក្រុមហ៊ុន Total Energies ប្រចាំប្រទេសកម្ពុជា ស្តីពីការដាំដើមឈើនៅក្នុងរមណីយដ្ឋានអង្គរ។ ពិធីនេះ ក៏មានការចូលរួមពីឯកឧត្តមរដ្ឋលេខាធិការ ឯកឧត្តមអគ្គនាយក ឯកឧត្តមអគ្គនាយករង និងថ្នាក់ដឹកនាំ នៃស្ថាប័នទាំង២ ផងដែរ។

ក្នុងឱកាសនោះ លោកជំទាវបណ្ឌិតសភាចារ្យក៏បានសម្តែងអំណរគុណ និងកោតសរសើរពីការចូលរួមចំណែករបស់ក្រុមហ៊ុន Total Energies ប្រចាំប្រទេសកម្ពុជា ដែលបានចូលរួមចំណែកទៅលើសកម្មភាពជាច្រើន ក្នុងប្រទេសកម្ពុជានាពេលកន្លងមក ក៏ដូចជាបច្ចុប្បន្ន។ ជាក់ស្តែង ការចុះកិច្ចព្រមព្រៀងក្នុងការដាំដើមឈើនៅក្នុងរមណីយដ្ឋានអង្គរនាពេលនេះ គឺជាការឆ្លុះបញ្ចាំងពីការទទួលខុសត្រូវ និងការចូលរួមចំណែកយ៉ាងសំខាន់ក្នុងការលើកស្ទួយសោភណ្ឌភាព បរិស្ថាន ធម្មជាតិ និងអភិរក្សប្រាសាទ ក៏ដូចជាកាត់បន្ថយឧស្ម័នពុលនៅក្នុងរមណីយដ្ឋានអង្គរ ដែលជាបេតិកភណ្ឌពិភពលោកដ៏ល្បីល្បាញ។

សូមជម្រាបជូនថា រយ:ពេលកន្លងមកអាជ្ញាធរជាតិអប្សរា បានផ្ដល់កូនឈើ និងសហការជាមួយ កងកម្លាំងយុទ្ធភូមិភាគទី៤, មន្ទីរ អង្គភាពក្នុងខេត្ត, ព្រះសង្ឃ, សិស្សនិស្សិត និងលោកគ្រូ អ្នកគ្រូ, វិស័យឯកជន និងប្រជាពលរដ្ឋ ដាំដើមឈើ បានជាច្រើនមុឺនដើមផងដែង៕ ដោយ៖ មន្ទីរព័ត៌មានខេត្តសៀមរាប សម្រួលផ្សាយដោយ៖ ធូ កុសល