កូរ៉េខាងជើងបញ្ជាឱ្យសម្លាប់សត្វឆ្មា និងសត្វព្រាបទាំងអស់ ដើម្បីបង្ការការផ្ទុះឡើងនៃជំងឺកូវីដ-១៩
គេហទំព័រសារព័ត៌មាន Daily NK បានរាយការណ៍ថា អាជ្ញាធរកូរ៉េខាងជើងបានបញ្ជាឱ្យសម្លាប់សត្វឆ្មា និងសត្វព្រាបទាំងអស់នៅតាមតំបន់ព្រំដែនដោយសារតែការភ័យខ្លាចការរាលដាលនៃជំងឺរាតត្បាត។ យោងតាមប្រភពព័ត៌មាននេះបានឱ្យដឹងថា វិធានការណ៍ផ្សេងៗត្រូវបានណែនាំដោយអាជ្ញាធរក្នុងរយៈពេលប៉ុន្មានខែកន្លងមកនេះ ដែលរួមមានការបញ្ជាឱ្យសម្លាប់សត្វឆ្មាទាំងអស់នៅតាមផ្លូវ និងបាញ់សត្វឆ្មា ឬបក្សីណាដែលព្យាយាមឆ្លងកាត់ព្រំដែនជាមួយប្រទេសចិន។
ការរាយការណ៍នោះបានលើកឡើងថា គ្រួសារមួយមកពីស្រុក Songhu នៃខេត្ត Hyesan ត្រូវបានគេដាក់នៅក្នុងមណ្ឌលចត្តាឡីស័កសម្ងាត់ដោយពួកគេបានចិញ្ចឹមសត្វឆ្មារនៅក្នុងផ្ទះរបស់ពួកគេ។
ប្រភពមួយបាននិយាយថា ក្រុមគ្រួសារn:ត្រូវបានផ្តន្ទាទោសដាក់ពន្ធនាគាររយៈពេល ២០ថ្ងៃនៅក្នុងភាពដាក់ដោយឡែកចំពោះការចិញ្ចឹមឆ្មាខុសច្បាប់ យោងតាមបទបញ្ជាដែលមិនឱ្យធ្វើដូច្នេះនៅក្នុងតំបន់ព្រំដែនរវាងចិន និងកូរ៉េខាងជើង។
នៅក្នុងការរាយការណ៍នោះ ពីដំបូងក្រុមគ្រួសារនោះបានប្រាប់អាជ្ញាធរថាឆ្មារបស់ពួកគេបានងាប់នៅពេលដែលក្រុមមន្ត្រីបានចុះទៅត្រួតពិនិត្យមើលថា តើពួកគេកំពុងទុកសត្វចិញ្ចឹម ឬអត់។ យ៉ាងណាក៏ដោយ សត្វនេះត្រូវបានគេប្រទះឃើញនៅក្បែរព្រំដែនចិន ហើយក្រុមគ្រួសារត្រូវបានបំបែកចេញជាបន្តបន្ទាប់ ខណៈដែលអាជ្ញាធរបានដកហូតសត្វឆ្មានោះ៕ (ប្រភព Sputnik បកប្រែដោយលោក យា ចិន្តាខន្តី) សម្រួលផ្សាយដោយ៖ ធូ កុសល
