សហរដ្ឋអាមេរិកស្វែងរកការបញ្ចប់អំពើហឹង្សារវាងអ៊ីស្រាអែល និងប៉ាឡេស្ទីនឱ្យបានឆាប់តាមដែលអាចធ្វើទៅបាន
រដ្ឋមន្ត្រីក្រសួងការបរទេសសហរដ្ឋអាមេរិក លោក Antony Blinken បានបញ្ជាក់ថា គោលដៅរបស់ទីក្រុងវ៉ាស៊ីនតោននៅតែបញ្ឈប់អំពើហឹង្សាដែលកំពុងកើតមានឡើងរវាងអ៊ីស្រាអែល និងប៉ាឡេស្ទីនឱ្យបានលឿនបំផុត។ អ្នកការទូតសហរដ្ឋអាមេរិកកំពូលរូបនេះបាននិយាយបន្ថែមថា លោកបានសង្កត់ធ្ងន់ទៅលើភាពចាំបាច់នៃការបញ្ចប់អំពើហិង្សាក្នុងកិច្ចពិភាក្សាជាមួយដៃគូរបស់លោកមកពីអ៊ីស្រាអែល អេមីរ៉ាតអារ៉ាប់រួម ហ្ស៊កដានី ទុយនេស៊ី ម៉ារ៉ុក បារ៉ែន និងសហភាពអឺរ៉ុប។
លោក Blinken នៅពេលមុននេះបានបញ្ជាក់ថា សហរដ្ឋអាមេរិកកំពុងធ្វើការនៅពីក្រោយឆាកដើម្បីបញ្ចប់អំពើហិង្សាដែលបានផ្ទុះឡើងរវាងភាគីទាំងពីរកាលពីថ្ងៃទី ១០ ឧសភា នៅពេលដែលក្រុមហាម៉ាសបានបាញ់គ្រាប់រ៉ុក្កែតរាប់រយគ្រាប់នៅលើទីក្រុងនានានៅភាគខាងត្បូងប្រទេសអ៊ីស្រាអែល និងទីក្រុង Tel Aviv ។
រដ្ឋមន្ត្រីរូបនេះបានអត្ថាធិប្បាយអំពីការទប់ស្កាត់ម្តងហើយម្តងទៀតរបស់ទីក្រុងវ៉ាស៊ីនតោនចំពោះសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិនាពេលថ្មីៗនេះ ស្តីពីអំពើហឹង្សារវាងអ៊ីស្រាអែល – ប៉ាឡេស្ទីន ដោយអះអាងថាសហរដ្ឋអាមេរិកមិនដែលរារាំងដល់កិច្ចការងារការទូតទេ ប៉ុន្តែផ្ទុយទៅវិញយើងកំពុងធ្វើការយ៉ាងសកម្មនៅក្នុងវិស័យនេះ។
ដំណោះស្រាយចុងក្រោយដែលសហរដ្ឋអាមេរិកបានបិទកាលពីថ្ងៃទី ១៧ ខែឧសភា បានថ្កោលទោសការឆ្លើយតបផ្នែកយោធារបស់អ៊ីស្រាអែលចំពោះការវាយប្រហាររបស់ក្រុមសកម្មប្រយុទ្ធនៅតំបន់ហ្គាហ្សា និងបានអំពាវនាវឱ្យមានបទឈប់បាញ់គ្នាមួយ។
អ្នកការទូតកំពូលរូបនេះក៏បានបង្ហាញផងដែរថា សហរដ្ឋអាមេរិកបានទទួលព័ត៌មានថ្មីអំពីការវាយប្រហាររបស់ IDF ទៅលើអគារពហុជាន់មួយនៅហ្គាហ្សាដែលមានការិយាល័យរបស់ប្រព័ន្ធផ្សព្វផ្សាយជាច្រើន រួមទាំងបណ្តាញផ្សព្វផ្សាយអន្តរជាតិដូចជាសារព័ត៌មាន Associated Press និង Al Jazeera ផងដែរ។
លោក Blinken បានិយាយថា «វាជាការយល់ឃើញរបស់ខ្ញុំ ដែលយើងបានទទួលព័ត៌មានបន្ថែមតាមរយៈបណ្តាញស៊ើបការណ៍ ហើយវាមិនមែនជាអ្វីដែលខ្ញុំអាចអត្ថាធិប្បាយបាននោះទេ»៕ (ប្រភព Sputnik បកប្រែដោយលោក យា ចិន្តាខន្តី) សម្រួលផ្សាយដោយ៖ ធូ កុសល
