ប្រទេសចិនស្នើធ្វើជាម្ចាស់ផ្ទះនៃកិច្ចចរចាផ្ទៃក្នុងនៃប្រទេសអាហ្វហ្គានីស្ថាន
ក្រសួងការបរទេសចិនបានជូនដំណឹងថា រដ្ឋមន្ត្រីការបរទេសចិន លោក វ៉ាង យី នៅក្នុងកិច្ចពិភាក្សាតាមទូរស័ព្ទជាមួយទីប្រឹក្សាសន្តិសុខជាតិអាហ្វហ្គានីស្ថាន លោក Hamdullah Mohib បានស្នើធ្វើជាម្ចាស់ផ្ទះនៃកិច្ចពិភាក្សាផ្ទៃក្នុងនៃប្រទេសអាហ្វហ្គានីស្ថាននៅក្នុងប្រទេសចិន។
ក្រសួងនោះបាននិយាយនៅក្នុងសេចក្តីថ្លែងការណ៍មួយថា «ភាគីចិនបានត្រៀមខ្លួនរួចជាស្រេចដើម្បីសម្រួលដល់កិច្ចចរចាអន្តរអាហ្វហ្គានីស្ថាន រួមទាំងការបង្កើតលក្ខខណ្ឌសម្រាប់ធ្វើកិច្ចចរចានៅក្នុងប្រទេសចិនផងដែរ»។
យោងតាមលោក វ៉ាង យី បានឱ្យដឹងថា សេចក្តីសម្រេចរបស់សហរដ្ឋអាមេរិកក្នុងការដកកម្លាំងចេញពីប្រទេសអាហ្វហ្គានីស្ថានបានបង្កើតភាពមិនច្បាស់លាស់នូវស្ថានភាពនៅក្នុងប្រទេសនេះ។
រដ្ឋមន្ត្រីការបរទេសរូបនេះបាននិយាយថា «ទោះជាយ៉ាងណាក៏ដោយ សន្តិភាព គឺជានិន្នាការទូទៅមួយដែលត្រូវនឹងផលប្រយោជន៍មូលដ្ឋាន និងរយៈពេលវែងរបស់ប្រជាជនអាហ្វហ្គានីស្ថាន ហើយក៏ជាសេចក្តីប្រាថ្នារួមរបស់សហគមន៍អន្តរជាតិទាំងមូលផងដែរ»។
ជម្លោះប្រដាប់អាវុធរវាងរដ្ឋាភិបាលអាហ្វហ្គានីស្ថាន និងពួកតាលីបង់នៅតែបន្ត បើទោះបីជាកិច្ចចរចាសន្តិភាពកំពុងតែបន្តដំណើរការក៏ដោយ។ ការប្រឈមមុខដាក់គ្នាបានកើតឡើងចំពេលដែលមានការដកកងទ័ពបរទេសដែលដឹកនាំដោយសហរដ្ឋអាមេរិកដែលរំពឹងថានឹងបញ្ចប់នៅថ្ងៃទី ១១ ខែកញ្ញាខាងមុខ៕ (ប្រភព Sputnik បកប្រែដោយលោក យា ចិន្តាខន្តី) សម្រួលផ្សាយដោយ៖ ធូ កុសល
