វ៉ាក់សាំងដែលផលិតដោយប្រទេសចិនកំពុងរង់ចាំការអនុម័តពីសហភាពអឺរ៉ុប និងអង្គការសុខភាពពិភពលោក ដែលនឹងក្លាយជាជំនួយដ៏សំខាន់មួយដល់ពិភពលោក
ទីភ្នាក់ងារឱសថអឺរ៉ុប (EMA) បានចាប់ផ្តើមពិនិត្យឡើងវិញនូវវ៉ាក់សាំងជំងឺកូវីដ-១៩ Sinovac របស់ប្រទេសចិន ដោយនិយតករកំពូលរបស់សហភាពអ៊ឺរ៉ុបបានប្រកាសកាលពីថ្ងៃអង្គារ ហើយក្រុមអ្នកជំនាញបាននិយាយថា នៅពេលដែលវ៉ាក់សាំងនេះត្រូវបានអនុម័តនោះប្រទេសចិននឹងបំពេញនូវទំនួលខុសត្រូវអន្តរជាតិរបស់ខ្លួនជាមហាអំណាចមួយ ហើយផ្តល់ការគាំទ្រដល់សហគមន៍អន្តរជាតិក្នុងការប្រយុទ្ធប្រឆាំងនឹងរោគរាតត្បាត។
វ៉ាក់សាំងជំងឺកូវីដ-១៩ Sinovac និងវ៉ាក់សាំង Sinopharm ដែលផលិតដោយប្រទេសចិន ក៏កំពុងស្ថិតនៅក្រោមការវាយតម្លៃរបស់អង្គការសុខភាពពិភពលោកសម្រាប់ការប្រើប្រាស់ជាបន្ទាន់ផងដែរ ហើយលទ្ធផលត្រូវបានគេរំពឹងថានឹងចេញក្នុងរយៈពេលមួយសប្តាហ៍។
ទីភ្នាក់ងារ EMA បាននិយាយថា សេចក្តីសម្រេចថាតើវ៉ាក់សាំង Sinovacc អាចត្រូវបានដាក់នៅលើទីផ្សារអឺរ៉ុបដែលនឹងផ្អែកទៅលើលទ្ធផលបឋមពីការសិក្សាមន្ទីរពិសោធន៍ និងគ្លីនិក។
យោងទៅតាមទីភ្នាក់ងារ EMA បានឱ្យដឹងថា ការពិនិត្យនេះ គឺដើម្បីពន្លឿនការវាយតម្លៃឱសថដែលមានជោគជ័យក្នុងគ្រាអាសន្នសុខភាពសាធារណៈដែលអនុញ្ញាតឱ្យទិន្នន័យត្រូវបានគេពិនិត្យឡើងវិញនៅពេលវាអាចរកបានពីការសិក្សាដែលកំពុងបន្ត។ ពេលវេលាជាក់លាក់មួយសម្រាប់ការពិនិត្យឡើងវិញមិនត្រូវបានផ្តល់ឱ្យទេ ប៉ុន្តែទីភ្នាក់ងារ EMA បាននិយាយថា ដំណើរការនេះគួរតែចំណាយពេលតិចជាងធម្មតា។
ប្រភពពីវ៉ាក់សាំង Sinovac បានប្រាប់កាសែត Global Times កាលពីថ្ងៃពុធថា ដោយសារមានវ៉ាក់សាំងការពារជំងឺកូវីដ-១៩ ជាច្រើនកំពុងរងចាំការអនុម័តពីទីភ្នាក់ងារ EMA ដំណើរការនេះមិនត្រូវបានគេរំពឹងថានឹងបញ្ចប់ក្នុងពេលឆាប់ៗនេះទេ។ វ៉ាក់សាំងទាំង ៤ លើកមុនចំណាយពេលពី ២ ទៅ ៣ខែដើម្បីអនុម័ត បន្ទាប់ពីការពិនិត្យឡើងវិញបានចាប់ផ្តើម។ ទីភ្នាក់ងារនេះកំពុងពិនិត្យឡើងវិញនូវវ៉ាក់សាំងចំនួន ៣ ផ្សេងទៀត គឺវ៉ាក់សាំង Sputnik វ៉ាក់សាំង CureVac និងវ៉ាក់សាំង Novavax ។
កន្លងមក ទីភ្នាក់ងារ EMA បានអនុម័តវ៉ាក់សាំងការពារជំងឺកូវីដ-១៩ ចំនួន ៤ ដែលត្រូវបានបង្កើតឡើងដោយក្រុមហ៊ុន BioNTech and Pfizer ក្រុមហ៊ុន Moderna ក្រុមហ៊ុន AstraZeneca និងក្រុមហ៊ុន Janssen ។ ប្រសិនបើត្រូវបានអនុម័តនោះ វ៉ាក់សាំង Sinovac នឹងក្លាយជាវ៉ាក់សាំងដំបូងដែលមិនមែនជាផលិតផលរបស់បស្ចិមប្រទេសដែលទទួលបានការអនុញ្ញាតនៅក្នុងទីផ្សាររបស់សហភាពអឺរ៉ុប៕ (ប្រភព TASS បកប្រែដោយលោក យា ចិន្តាខន្តី) សម្រួលផ្សាយដោយ៖ ធូ កុសល
