រោងចក្រដំឡើងរថយន្តហ្វដ របស់ក្រុមហ៊ុន អ អិម អេ អូតូម៉ូធីវ ខេមបូឌា ឯ.ក រៀបចំកម្មវិធី «ផ្តល់ឈាមសង្គ្រោះជីវិតខ្ញុំ» នៅក្នុងខេត្តពោធិ៍សាត់

ខេត្តពោធិ៍សាត់៖ នាថ្ងៃទី០១ ខែវិច្ឆិកា ឆ្នាំ២០២៤នេះ រោងចក្រដំឡើងរថយន្តហ្វដ របស់ក្រុមហ៊ុន អ អិម អេ អូតូម៉ូធីវ ខេមបូឌា ឯ.ក បានរៀបចំកម្មវិធីផ្តល់ឈាមសង្រ្គោះជីវិតជាលើកទី៣  ដែលមានការអញ្ជើញចូលរួមក្រោមអធិបតីភាព ឯកឧត្តម ងួន ប៉ោសេង អភិបាលរងនៃគណៈអភិបាលខេត្តពោធិ៍សាត់ និងការសហការរៀបចំដោយមជ្ឈមណ្ឌលជាតិផ្តល់ឈាម មន្ទីរសុខាភិបាលខេត្ត។កម្មវិធីផ្តល់ឈាមសង្គ្រោះជីវិតនេះធ្វើឡើងក្នុងគោលបំណងដើម្បីជួយសង្រ្គោះដល់ជនរងគ្រោះដែលត្រូវឈាម ក្នុងនោះរួមមាន កុមារ ស្រ្តីសម្រាលកូន និង​ករណីគ្រោះថ្នាក់ចរាចរណ៍ជាដើម។ កម្មវិធីមានអ្នកស្ម័គ្រចិត្តចូលរួមសរុបប្រមាណ ៣០០ នាក់ មកពីបណ្តាវិស័យឯកជន និងរដ្ឋ ចំនួន​ ៨ ស្ថា​ប័ន រួមមាន៖ ក្រុមហ៊ុន អ អិម អូតូម៉ូធីវ (ខេមបូឌា) ឯ.ក មន្ទីរសុខាភិបាលខេត្តពោធិ៍សាត់ បេឡាជាតិសន្តិសុខសង្គមសាខាខេត្ត (បសស) វិទ្យាស្ថានពហុបច្ចេកទេសខេត្ត (PIPP) វិទ្យាស្ថានវិទ្យាសាស្រ្តគ្រប់គ្រង និងសេដ្ឋកិច្ច មជ្ឈមណ្ឌលការងារខេត្តពោធិ៍សាត់ ពន្ធនាគាខេត្តពោធិ៍សាត់ អធិការដ្ឋាននគរបាលស្រុកក្រគរ នាយក នាយករង លោកគ្រូ អ្នកគ្រូ និងសិស្សានុសិស្ស៕ សម្រួលផ្សាយដោយ  ទៀង  បុណ្ណរី