តុលាការឃុំខ្លួនស្ត្រីម្នាក់ ពីបទធ្វើចរាចរណ៍លក់អាវុធ និងកែច្នៃគ្រាប់បាញ់គ្រប់លោហៈ

លោក លិ សុខា ចៅក្រមស៊ើបសួរសាលាដំបូងរាជធានីភ្នំពេញ បានដីកាបង្គាប់ឱ្យឃុំខ្លួនស្ត្រីម្នាក់ ដែលជាម្ចាក់គេហទំព័រហ្វេសប៊ុកឈ្មោះ ស្តេចជំពាម KH ដែលបានបង្ហោះលក់អាវុធកែច្នៃប្រើគ្រាប់លោហៈ ពីបទ «ធ្វើចរាចរណ៍អាវុធសម្រាប់ប្រហារផ្សេងៗ លក់អាវុធ កែច្នៃបាញ់ គ្រប់លោហៈ» ដែលបានប្រព្រឹត្តនៅតាមរយៈបណ្តាញសង្គម Facebook កាលពីកំឡុងឆ្នាំ២០២២ រហូតបច្ចុប្បន្ន តាមបញ្ញត្តិមាត្រា ២០ នៃច្បាប់ស្តីពីការគ្រប់គ្រងអាវុធគ្រឿងផ្ទុះ និងគ្រាប់រំសេវ។   សូមបញ្ជាក់ កាលពីថ្ងៃទី២២ ខែមីនា ឆ្នាំ២០២៤ ក្រុមការងារ Hotline Scam 24/7 របស់អគ្គស្នងការដ្ឋាននគរបាលជាតិ បានស្រាវជ្រាវរកឃើញទំព័រហ្វេសប៊ុកមួយឈ្មោះ ស្តេចជំពាម KH ដែលបានបង្ហោះលក់អាវុធកែច្នៃប្រើគ្រាប់លោហៈ ដោយបាននាំខ្លួនជនសង្ស័យម្នាក់ឈ្មោះ ង.ម.ហ ភេទស្រី អាយុ៣៥ឆ្នាំ ដែលជាម្ចាស់ទំព័រហ្វេសប៊ុកខាងលើ មកសាកសួរពាក់ព័ន្ធករណីផ្សព្វផ្សាយ និងលក់ចែកចាយកាំភ្លើងកែច្នៃប្រើគ្រាប់លោហៈតាមបណ្តាញសង្គម។  ហើយប្រតិបត្តិការនេះ ធ្វើឡើងក្រោមបទបញ្ជាផ្ទាល់ពីនាយឧត្តមសេនីយ៍ ស ថេត អគ្គស្នងការនគរបាលជាតិ ដោយមានការសម្របសម្រួលពីព្រះរាជអាជ្ញា អមសាលាដំបូងរាជធានីភ្នំពេញ និងសហការជាមួយកម្លាំងសមត្ថកិច្ច នៃស្នងការដ្ឋាននគរបាលរាជធានីភ្នំពេញ។   លោកឧត្តមសេនីយ៍ឯក ជា ពៅ អគ្គស្នងការរងនគរបាលជាតិ និងជាប្រធានក្រុមការងារ Hotline Scam 24/7 បានឱ្យដឹងថា ប្រតិបត្តិការនេះសមត្ថកិច្ចជំនាញ បានរកឃើញ និងដកហូតសម្ហារៈពាក់ព័ន្ធដែលជាគ្រឿងបង្គុំអាវុធកែច្នៃមួយចំនួន រួមមាន៖ កាំភ្លើង (អាវុធកែច្នៃ), ជំពាម, ខ្សែកៅស៊ូ, ឧបករណ៍គ្រឿងបង្គុំ និងគ្រាប់ដែក ចំនួន ០៤ ប៉ាវតូច។ល។  ជនសង្ស័យខាងលើបានសារភាពពិតជាបានប្រព្រឹត្តប្រាកដមែន ក្រោយពីការសាកសួរ សមត្ថកិច្ចជំនាញ បានកសាងសំណុំរឿបញ្ជូនជនសង្ស័យទៅសាលាដំបូងរាជធានីភ្នំពេញ ដើម្បីចាត់ការតាមនីតិវិធី និងត្រូវបានចៅក្រមស៊ើបសួរ នៃសាលាដំបូងរាជធានីភ្នំពេញចេញដីកាបង្គាប់ឱ្យឃុំខ្លួន ពីបទធ្វើចរាចរណ៍អាវុធសម្រាប់ផ្សេងៗ (លក់អាវុធ កែច្នៃបាញ់គ្រាប់លោហៈ)។  លោកឧត្តមសេនីយ៍ឯក ជា ពៅ ធ្វើការអំពាវនាវដល់ប្រជាពលរដ្ឋ សូមបញ្ឈប់នូវការផ្សព្វផ្សាយ និងធ្វើអាជីវកម្មទិញលក់ កាំភ្លើងកែច្នៃផ្សេងៗតាមបណ្តាញសង្គម ដែលបង្កអសន្តិសុខដល់សង្គម ៕ សម្រួលដោយ  ទៀង  បុណ្ណរី