ជិះម៉ូតូមកពីស្រុកកំណើត ស្រាប់តែដួ.លឆាបឆេះម៉ត់សល់តែដែកនៅកណ្តាលផ្លូវ
រាជធានីភ្នំពេញ ៖ ម៉ូតូម៉ាកMSX១គ្រឿង ត្រូវបានអគ្គិភ័យឆាបឆេះយ៉ាងសន្ធោសន្ធៅម៉ត់ សល់តែ ដែកអេតចាយ បន្ទាប់ពីជួបគ្រោះថ្នាក់ចរាចរណ៍ជិះទាក់ដៃចង្កូតជាមួយម៉ូតូកង់៣មួយគ្រឿងដួលអូសកកិតនឹងថ្នល់ ។ ហេតុការណ៍នេះ បង្កអោយមានការភ្ញាក់ផ្អើល កាលពីវេលាម៉ោងប្រមាណ១០និង២០នាទីព្រឹកថ្ងៃទី១៧ ខែកុម្ភៈ ឆ្នាំ២០២៤ នៅតាមបេតុងមុខវត្តសំរោងអណ្តែត ក្នុងភូមិក្រុងខ្មែរ សង្កាត់គោកឃ្លាង ខណ្ឌសែនសុខ រាជធានីភ្នំពេញ ។ តាមសាក្សីបានអោយដឹងថា នៅមុនពេលកើតហេតុ គេឃើញម៉ូតូម៉ាកMSXពណ៌ក្រហម មួយគ្រឿងខាងលើ ជិះគ្នា២នាក់ ដែលគេអះអាងថា ជាប្តីប្រពន្ធ មកពីលេងស្រុកកំណើត ។ នៅពេលមកដល់កន្លែងកើតហេតុ មុខបុរីពិភពថ្មី ផ្លូវចូលវត្តសំរោងអណ្តែត ក៏បានជួបគ្រោះថ្នាក់បើកទាក់ដៃចង្កូតជាមួយម៉ូតូកង់៣មួយគ្រឿងដួល ហើយអូសជាច្រើនម៉ែត្រ បែកផ្កាភ្លើងសង្ស័យ ប៉ះជាមួយសាំង ឆាបឆេះយ៉ាងសន្ធោសន្ធៅតែម្តង ។ នៅក្នុងហេតុការណ៍នេះ បណ្តាលអោយ២នាក់ប្តីប្រពន្ធ រងរបួសរលាត់ដៃជើង រួចក៏បានឡើងជិះម៉ូតូអ្នកមកជាមួយគ្នាទៅបាត់ទៅ ។ បន្ទាប់ពីកើតមានអគ្គិភ័យ ប្រជាពលរដ្ឋក៏បានយកបំពង់ពន្លត់អគ្គិភ័យបាញ់ពន្លត់ តែម៉ូតូ១គ្រឿងនោះ ត្រូវភ្លើងឆេះអស់សល់តែ ដែកអេតចាយតែប៉ុណ្ណោះ។ទោះបីជាយ៉ាងណា តាមនគរបាលមូលដ្ឋានបានអោយដឹងផ្ទុយគ្នាថា ម៉ូតូនោះជិះគ្នា តែម្នាក់ឯង បន្ទាប់ពីគ្រោះថ្នាក់ម្ចាស់ក៍បានទៅបាត់បន្សល់តែខ្មោចម៉ូតូ ៕ សម្រួលដោយ ទៀង បុណ្ណរី
