សមអ្វីម្ល៉េះ! សិស្សប្រុសស្រីនាំគ្នារាំចង្វាក់ប្រពៃណីខ្មែរយ៉ាងសមកំពុងទាក់ភ្នែកមហាជន
ខេត្តរតនគិរី ៖ ទំពាំងស្នងឫស្សីនៃវិទ្យាល័យតាវែងកំពុងតែលូតឡើង តាមរយៈសកម្មភាពរៀនរាំចង្វាក់ប្រពៃណីខ្មែរ ដើម្បីត្រៀមអបអរសាទរសង្ក្រាន្តឆ្នាំថ្មី ឆ្នាំរោង ដែលនឹងខិតជិតមកដល់ ដោយក្នុងនោះមានបងប្អូនខ្មែរជាច្រើនក៏បានសម្តែងការរីករាយ ចំពោះការបណ្តុះបណ្តាលទៅលើយុវជនឱ្យចាប់អារម្មណ៍លើសិល្បៈរបស់ខ្មែរនេះផងដែរ។ ទន្ទឹមនឹងនោះ ក៏ឃើញថា មានចង្វាក់ជាច្រើនដែលប្អូនៗសិស្សានុសិស្សបានហាត់សម ដូចជា ចង្វាក់ម៉ាឌីហ្សូន, រាំវង់, សារ៉ាវ៉ាន់ និងចង្វាក់តាលុងជាដើម។ ហើយអ្វីដែលគួរឱ្យកត់សម្គាល់ខ្លាំងជាងនេះទៀតនោះ ឃើញថា ប្អូនៗដែលជាទំពាំងស្នងឫស្សី ការរាំរបស់ប្អូនៗសមល្អឥតទាស់ ដោយរាំបានស្រុះគ្នាល្អ ពិតជាមិនសរសើរមិនបាន ចំពោះការខិតខំប្រឹងប្រែង ក៏ដូចជាការបង្ហាត់បង្រៀនពីសំណាក់លោកគ្រូ អ្នកគ្រូផងដែរ។ ក្នុងនោះ មិនត្រឹមតែនារីនោះទេ ដែលពូកែរាំ សូម្បីតែខាងប្រុសៗក៏រាំបានសម មិនចាញ់នារីៗនោះទេ ធ្វើឱ្យបងប្អូនមហាជនខ្លះសរសើរបុរសៗពេញៗមាត់តែម្ដង ។ គួរបញ្ជាក់ដែរថា នេះគឺជាគំរូមួយដែលល្អប្រពៃ តាមរយៈការបណ្តុះបណ្តាលយុវជនដែលជាសសរទ្រូងរបស់សង្គម ឱ្យស្គាល់ពីគុណតម្លៃនៃសិល្បៈវប្បធម៌ខ្មែរ ហើយផ្សារភ្ជាប់ជាមួយនឹងការសិក្សា ការហាត់កីឡា និងកម្មវិធីផ្សេងៗរបស់ក្រសួងអប់រំ។ តាមរយៈបទសម្ភាសន៍ជាមួយសារព័ត៌មាន នាយកវិទ្យាតាវែង លោក ម៉ៅ ចាន់ថន បានប្រាប់ឱ្យដឹងថា «ចំពោះការរាំជាចង្វាក់ រាំវង់ សារ៉ាវ៉ាន់ រាំក្បាច់ ម៉ាឌីហ្សូន និងតាលុងនេះ គឺដើម្បីត្រៀមអបអរសាទរឆ្នាំថ្មី ដែលនឹងមកដល់ក្នុងពេលឆាប់ៗខាងមុខនេះ»។ ក្នុងនោះផងដែរ លោក ម៉ៅ ចាន់ថន ជានាយកនៅក្នុងវិទ្យាល័យតាវែង ស្ថិតក្នុងភូមិតាវែង ឃុំតាវែងលើ ស្រុកតាវែង ខេត្តរតនគិរី បានប្រាប់បន្តថា «គោលបំណងចំពោះការបង្ហាត់បង្រៀននេះ គឺចង់ឱ្យកូនខ្មែរគ្រប់រូបបានស្គាល់ បានដឹងពីចង្វាក់ប្រជាប្រិយខ្មែរ។ ហើយចំពោះការបង្ហាត់បង្រៀនរាំនេះទៀតសោត គឺសុទ្ធសឹងតែជាការស្ម័គ្រចិត្តពីលោកគ្រូ អ្នកគ្រូ ដោយក្នុងការហាត់សមនេះ កាលពីកន្លងទៅ គឺមានសិស្សចូលរួមប្រមាណជា៦០នាក់ទៅ៧០នាក់ ដោយពួកគាត់ម្នាក់ៗសុទ្ធតែចង់ចេះចង់រាំពីចង្វាក់ប្រពៃណីខ្មែរដ៏ល្អផូរផង់មួយនេះ»។ បើងាកមកសាលារបស់លោកគ្រូ ចាន់ថន ដែលស្ថិតក្នុងខេត្តរតនគិរីវិញ បានប្រាប់បន្តទៀតថា «វិទ្យាល័យតាវែង សព្វថ្ងៃក៏មានការខ្វះខាតគ្រូ បណ្ណាល័យ និងកុំព្យូទ័រផងដែរ។ ដោយសព្វថ្ងៃ វិទ្យាល័យមួយនេះ គឺមានគ្រូចំនួន១៤នាក់ (ស្រី៥នាក់) និងសិស្សចំនួន៥០២នាក់ (សិស្សស្រីចំនួន២៥០នាក់)។ ដោយក្នុងនោះផងដែរ ភាគច្រើន គឺសិស្សជាជនជាតិភាគតិច ដែលពួកគាត់ម្នាក់ៗ គឺសុទ្ធតែចង់ចេះ ចង់ដឹង ដូច្នេះសុំសូមសំណូមពរចំពោះឪពុកម្តាយគួរតាមដានការសិក្សារបស់កូនៗ ក៏ដូចជាការអប់រំដល់ពួកគាត់ឱ្យក្លាយជាមនុស្សល្អ ពលរដ្ឋល្អនៅក្នុងសង្គម៕ សម្រួលដោយ ទៀង បុណ្ណរី
