ទិញបន្លែថែមបទចម្រៀង! បុរសម្នាក់កំពុងអង្រួនចិត្តមហាជនមួយចំនួនស្លុងអារម្មណ៍
រាជធានីភ្នំពេញ ៖ ទៅរកឯណាបានបងប្អូន ទិញបន្លែថែមបទចម្រៀង កំពុងតែអង្រួនចិត្តមហាជនយ៉ាងខ្លាំង ក្រោយពេលបុរសម្នាក់ ដែលជាអ្នកលក់បន្លែតាមរុឺម៉ក់ច្រៀងភ្លេងការយ៉ាងពីរោះ សំខាន់សំឡេងស្អកដូចខេម ស្តាប់មួយភ្លែតលន្លង់លន្លោចពីរោះ ស្តាប់យូរៗកាន់តែជក់ចិត្តដិតអារម្មណ៍។ ជាការពិតណាស់ បុរសដែលជាលក់បន្លែរូបនេះ អាចបន្ថែមអាជីពជាអ្នកចម្រៀងបាន ក្រោយពីលក់បន្លែបណ្តើរ ច្រៀងបណ្តើរ អ្នកទិញក៏រើស អ្នកលក់ក៏ច្រៀង ដែលអាចនិយាយបានថា នេះគឺជាភាពទាក់ទាញចំពោះលោកផ្ទាល់ ពោលគឺកាលពីកន្លងទៅ មានរបរជាច្រើន ដូចជាបុកល្ហុង អ្នកលក់លៀស និងអ្នកលក់ម៉ាំជាដើម ដែលសាងភាពទាក់ទាញយ៉ាងខ្លាំងតាមរយៈការបន្ថែមអ្វីដែលប្លែកនៅក្នុងរបររបស់ខ្លួន ក្នុងការសាងភាពចាប់អារម្មណ៍ពីសំណាក់មហាជន។ ក្នុងនោះផងដែរ តាមរយៈបទដែលលោកបកស្រាយនោះ ភាគច្រើនគឺជាចម្រៀងភ្លេងការ អាចថា ជាការអភិរក្សចម្រៀងភ្លេងការខ្មែរ គាំទ្រភ្លេង ដោយលោកបានបកស្រាយចម្រៀងដូចជា ៖ បទ«សំពោងសក់ធំ» និងបទ«សម្រស់ធីតាព្រៃភ្នំ» សុទ្ធសឹងតែជាចម្រៀងភ្លេងការខ្មែរ ស្តាប់ហើយមិនជិនណាយអារម្មណ៍នោះឡើយ។ ទន្ទឹមនឹងនោះ តាមរយៈរូបភាពវីដេអូ បុរសជាអ្នកលក់បន្លែរូបនេះ លោកមានលក់បន្លែដូចជា ស្ពៃក្តោប ការ៉ុត ត្រសក់ ខ្ទឹមបារាំង ស្ពៃបូគោ និងបន្លែជាច្រើនទៀត។ តាមរយៈបទសម្ភាសន៍ជាមួយសារព័ត៌មាន បងស្រីដែលមានគណនីឈ្មោះថា «ណាណា» ជាអ្នកភូមិ និងជាម៉ូយ ដែលតែងតែជួយទិញបន្លែផងនោះ បានប្រាប់ឱ្យដឹងថា «បុរសដែលជាអ្នកបន្លែនេះ មានឈ្មោះថា «ពូជ័យ» លោកលក់បន្លែនេះជាយូរណាស់មកហើយ ដោយលោកនេះ ជួនកាលដាច់ ជួនកាលក៏មិនសូវដាច់នោះទេ ព្រោះកន្លែងលោកលក់នោះ គឺនៅជិតផ្សារ»។ ប្រភពដដែលបន្តថា «ពូជ័យ ដែលជាអ្នកលក់បន្លែ លោកមិនមែនជាអ្នកចម្រៀងនោះទេ ពោលគឺលោកគ្រាន់តែស្រឡាញ់ចូលចិត្តចម្រៀង ហើយសំឡេងរបស់លោកក៏មិនចាញ់តារាចម្រៀងនោះឡើយ ដោយមានមហាជនខ្លះនិយាយថា «ពីរោះ» ខ្លះទៀតក៏និយាយថា «ស្រដៀងនឹងតារាចម្រៀងលោកខេម»។ បងស្រី ណាណា បានបន្តថា «លក់ដូរបន្លែ ជួនកាលមិនសូវដាច់នោះឡើយ ហើយជួលកាលពូជ័យ និយាយប្រាប់ថា ថ្ងៃនេះលក់បាន២០០០រៀល»។ បងស្រី ណាណា បន្តថា «កាលពីកន្លងទៅ ឃើញលោកច្រៀងលេងតែប៉ុណ្ណោះ គ្មានមេក្រូនោះឡើយ ដោយមានតែបាសធម្មតាតែប៉ុណ្ណោះ ប៉ុន្តែចៃដន្យអ្វីថ្ងៃនេះ មានទាំងបាស មានទាំងមេក្រូ ដាក់មួយពីរបទ ពីរោះមិនធម្មតាឡើយ សូម្បីតែអ្នកទិញផ្សេងទៀតក៏ចង់ទិញដែរ»។ គួរបញ្ជាក់ដែរថា នេះគឺជាការកម្សាន្តលេងតែប៉ុណ្ណោះ អាចនិយាយបានថា ទិញបន្លែបន្ថែមចម្រៀង ហើយការច្រៀងភ្លេងការនេះ ក៏ជាការចូលរួមមួយចំណែកដល់ការគាំទ្រលើកស្ទួយវិស័យសិល្បៈចម្រៀងភ្លេងការខ្មែរផងដែរ៕ សម្រួលដោយ ទៀង បុណ្ណរី
