អាសូរពន់ពេក! ក្មេងៗ១៩នាក់ឪពុកម្តាយខ្វះខាតខ្លាំង ចង់បានសម្ភារៈដើម្បីសិក្សា
ខេត្តកំពង់ឆ្នាំង ៖ ជីវិតអើយជីវិត! រស់នៅលើផែនដីតែមួយ តែវាសនាខុសគ្នា អ្នកខ្លះចង់រៀន ប៉ុន្តែឪពុកម្តាយមានការខ្វះខាតក៏នៅតែត្រដាបត្រដួសប្រឹងប្រែងឱ្យកូនរៀនសូត្រ ហើយអ្នកខ្លះទៀតមានសព្វគ្រប់បែបយ៉ាង បែរជាមិនសូវខំប្រឹងប្រែងរៀនសូត្រទៅវិញ។ ជាការពិតណាស់ កូនគេ កូនយើង ពិតជាគួរឱ្យអាណិតណាស់ ខណៈក្មេងៗចំនួន១៩នាក់ មានការខ្វះខាតយ៉ាងខ្លាំង ដោយប្អូនម្នាក់ៗសុទ្ធតែចង់រៀនសូត្រឱ្យបានខ្ពង់ខ្ពស់ ខណៈបច្ចុប្បន្នកំពុងតែមានការខ្វះខាតយ៉ាងខ្លាំង ហើយប្អូនសុំត្រឹមតែសម្ភារៈសិក្សាដូចជា ប៊ិចសៀវភៅ កាតាប និងកង់ដែលជាមធ្យោបាយធ្វើដំណើរនោះទេ ព្រោះផ្ទះរបស់ប្អូនៗខ្លះ គឺនៅឆ្ងាយពីសាលា ដូច្នេះត្រូវមានមធ្យោបាយធ្វើដំណើរ ដើម្បីបានទៅរៀនសូត្រយកចំណេះដឹងនឹងគេ។ បើតាមរយៈគណនីហ្វេសប៊ុករបស់លោក ស្រេន វុធថា បានលើកឡើងថា «ពួកគាត់ចង់បានសម្ភារៈសិក្សា និងខោអាវ ពណ៌ស ពាក់ទៅសាលារៀនដូចគេ ដោយអ្នកខ្លះឪពុកម្ដាយទៅធ្វើការនៅថៃ អ្នកខ្លះទៀតគ្រួសារក្រីក្រ ពុកម៉ែមិនមានលទ្ធភាពនោះទេ ដោយពួកគាត់ចង់រៀនសូត្រ ដូច្នេះសូមបងប្អូនជួយបំពេញបំណងពួកគាត់ផង ពួកគាត់រស់នៅក្នុងភូមិត្បែងខ្ពស់ ឃុំត្បែងខ្ពស់ ស្រុកសាមគ្គីមានជ័យ ខេត្តកំពង់ឆ្នាំង។ សូមបងប្អូនជួយដល់ពួកគាត់ផង»។ តាមរយៈបទសម្ភាសន៍ជាមួយសារព័ត៌មានកោះសន្តិភាព លោក ស្រេន វុធថា បានប្រាប់ឱ្យដឹងថា «មានបងប្រុសម្នាក់សុំឱ្យលោកជួយ ដោយសារមូលហេតុក្មេងៗទាំង១៩នាក់នេះ ខ្វះខាតសម្ភារៈសិក្សា ប៊ិចកាតាប សៀវភៅ និងកង់ដែលជាមធ្យោបាយធ្វើដំណើរ ហើយពួកគេរស់នៅក្នុងភូមិត្បែងខ្ពស់ ឃុំត្បែងខ្ពស់ ស្រុកសាមគ្គីមានជ័យ ខេត្តកំពង់ឆ្នាំង»។ លោក ស្រេន វុធ ដែលជាតារាសម្តែង ក៏បានប្រាប់ឱ្យដឹងបន្តថា «ក្មេងៗទាំងអស់នេះ មានការខ្វះខាតយ៉ាងខ្លាំង ដោយឪពុកម្តាយរបស់ពួកគេស៊ីឈ្នួលគេ ខ្លះធ្វើការសំណង់ ហើយឪពុកម្តាយក្មេងខ្លះទៀតធ្វើការនៅប្រទេសថៃ ដូច្នេះពួកគេខ្លះរស់នៅជាមួយម្តាយ ខ្លះក៏រស់នៅជាមួយជីដូន និងរស់នៅជាមួយមីងមា សាច់ញាតិជាដើម»។ លោក វុធថា បានបន្តថា «ហើយចម្ងាយពីផ្ទះទៅសាលា គឺឆ្ងាយគួរសមដែរ ដូច្នេះពួកគាត់ត្រូវការមធ្យោបាយធ្វើដំណើរ ដូចជា ប្អូនខ្លះក្នុងចំណោម១៩នាក់ គឺចម្ងាយពីផ្ទះទៅសាលារៀនប្រមាណជា១០គីឡូឯណោះ និងក្មេងខ្លះទៀតប៉ុន្មានគីឡូប៉ុណ្ណោះ»។ គួរបញ្ជាក់ផងដែរថា ក្មេងៗទាំង១៩នាក់ រស់នៅជនបទជួបប្រទះការខ្វះខាតជាច្រើន ហើយក្មេងៗប៉ងប្រាថ្នាត្រឹមតែសម្ភារៈសិក្សា និងការសិក្សាមួយដែលល្អប្រសើរប៉ុណ្ណោះ ខណៈគ្រួសាររបស់ពួកគេទីទ័លខ្លាំង រកព្រឹកខ្វះល្ងាច៕ សម្រួលដោយ ទៀង បុណ្ណរី
