ព្យុះដ៏ខ្លាំងវា.យប្រហារអាហ្សង់ទីន និងអ៊ូរូហ្គាយ ស្លា.ប់១៦នាក់
ប្រទេសអាហ្សង់ទីននិងអ៊ូរូហ្គាយ ៖ យោងតាមអាជ្ញាធរថា ព្យុះដ៏ខ្លាំងមួយជាមួយភ្លៀងនិងខ្យល់ខ្លាំងរហូតដល់ល្បឿន១៥០គីឡូម៉ែត្រក្នុងមួយម៉ោង បណ្ដាលឲ្យមនុស្សស្លា.ប់យ៉ាងតិច១៦នាក់និងបណ្ដាលឲ្យមានការបំផ្លិចបំផ្លាញ ក្នុងទីក្រុងជាច្រើននាភាគកណ្ដាលអាហ្សង់ទីននិងក្នុងប្រទេសអ៊ូរូហ្គាយកាលពីចុងសប្ដាហ៍កន្លងទៅ។ ការបំផ្លិចបំផ្លាញធ្ងន់ធ្ងរបំផុតគឺនៅក្រុងកំពង់ផែBAHIA BLANCA ស្ថិតនៅ ចម្ងាយ៦០០គីឡូម៉ែត្រភាគនិរតីក្រុងប៊ុយនូស៊ែ ដែលនៅទីនោះព្យុះនាំឲ្យបាក់ដំបូលអគារក្លឹបកីឡាមួយកាលពីថ្ងៃទី១៦ធ្នូ បណ្ដាលឲ្យមនុស្សស្លាប់១៣នាក់និងរបួសធ្ងន់១៤នាក់។ ជនរងគ្រោះទាំងនេះជាអ្នកកំពុងទស្សនាការប្រកួតបាល់បោះក្នុងក្លឹបកីឡានេះ ហើយស្រាប់តែជួបប្រទះព្យុះកំណាចនាំំឲ្យបាក់ដំបូលក្លឹបសង្កត់លើពួកគេ។ ចំណែកនារីម្នាក់ទៀតបានស្លាប់ក្រោយដើមឈើបាក់សង្កត់ នៅក្រុងមួយចម្ងាយ៤០គីឡូម៉ែត្រពីរដ្ឋធានីក្រុងប៊ុយនូស៊ែ។ ទីក្រុងនោះរងការវាយប្រហារដោយព្យុះកាលពីព្រឹកថ្ងៃទី១៧ធ្នូ បណ្ដាលឲ្យមានភ្លៀងធ្លាក់ខ្លាំងនិងដាច់អគ្គិសនី រួចដើមឈើប្រមាណជា៣៦០ដើមត្រូវរលំបាក់ បំផ្លាញបណ្ដារថយន្ត ដាច់ខ្សែកាបនិងធ្វើឲ្យស្ទះចរាចរណ៍។ នៅប្រទេសអ៊ូរូហ្គាយជិតខាងមនុស្សយ៉ាង តិច២នាក់ស្លាប់ កាលពីថ្ងៃទី១៧ធ្នូក្នុងខេត្តកូឡូនីញ៉ា ដែលនៅទីនោះព្យុះបោកបក់ក្នុងល្បឿនដល់ជាង១៦៧គីឡូម៉ែត្រក្នុង១ម៉ោងបណ្ដាលឲ្យដើមឈើរលំបាក់ រួចដំបូលផ្ទះទាំងឡាយត្រូវប៉ើង៕ សម្រួលដោយ ទៀង បុណ្ណរី
