គម្រោងលំនៅឋាន ម៉ន ដានី ចាប់បើកការដ្ឋានសាងសង់ «គម្រោងទី ២៩» ឡើងវិញ
ខេត្តកំពង់ស្ពឺ ៖ គម្រោងលំនៅឋាន ម៉ន ដានី បានចាប់ដៃគូសហការជាមួយគម្រោងលំនៅឋានភូមិដ្ឋានសន្តិភាព ហើយនៅថ្ងៃទី ១ ខែធ្នូ ឆ្នាំ ២០២៣ នេះ បានប្រកាសបើកការដ្ឋានសាងសង់ «គម្រោងទី ២៩» ឡើងវិញ ដែលមានទីតាំងស្ថិតនៅភូមិចំការស្បូវ ភូមិដំណាក់ជ័យ ភូមិដុតកំបោរ ភូមិភាន្សា ឃុំព្រះនិព្វាន្ត ស្រុកគងពិសី ខេត្តកំពង់ស្ពឺ ។ ពិធីបើកសម្ពោធនេះមានការអញ្ជើញចូលរួមពីលោកស្រី ម៉ន ដានី អគ្គនាយិកាគម្រោងលំនៅដ្ឋាន ខេភី ម៉ន ដានី និងអ្នកអង្គម្ចាស់ ស៊ីសុវត្ថិ សិទ្ធីដែន ប្រធានកិត្តិយស គម្រោងលំនៅដ្ឋានភូមិសន្តិភាព, លោក លួម ផល្លី ប្រធានគម្រោងភូមិសន្តិភាព, ឯកឧត្តម ងួន សុខជាតិ អ្នកតំណាងរាស្ត្រមណ្ឌលកំពង់ចាម ព្រមទាំងភាគីពាក់ព័ន្ធ និងអតិចិជនជាច្រើននាក់ទៀត ។ ថ្លែងក្នុងពិធីនេះ លោកស្រី ម៉ន ដានី បានបញ្ជាក់ប្រាប់អតិថិជនរបស់គម្រោងលំនៅឋាន ម៉ន ដានី ថា ក្រុមហ៊ុនបានប្រកាសបើកការដ្ឋានសាងសង់ឡើងវិញ ដើម្បីបន្តអនុវត្តតាមកិច្ចសន្យារវាងក្រុមហ៊ុន និងអតិថិជន ជាពិសេសដើម្បីការពារផលប្រយោជន៍អតិថិជន ។ លោកស្រីស្នើសុំអតិថិជនបន្តជឿជាក់ និងសហការជាមួយក្រុមហ៊ុន ដើម្បីដោះស្រាយបញ្ហាប្រឈមនានា ហើយក្រុមហ៊ុននៅតែមានឆន្ទៈសាងសង់នឹងប្រគល់ផ្ទះជូនអតិថិជនតាមលារសន្យា និងពុំគេចវេះទៅទីណាឡើយ ហើយលោកស្រីប្ដេជ្ញាចិត្តបន្តការពារផលប្រយោជន៍របស់អតិថិជន ។ គួរបញ្ជាក់ថា «គម្រោងទី ២៩» គឺជាគម្រោងមួយក្នុងចំណោមគម្រោងទាំង ៣១ គម្រោងរបស់ក្រុមហ៊ុន ។ គម្រោងនេះ ត្រូវបានបើកការដ្ឋានសាងសង់លើកដំបូងនៅក្នុងឆ្នាំ ២០២១ នៅដំណាក់កាលដំបូងលើផ្ទៃដី ១០០ ហិកតា ក្នុងដើមទុនប្រមាណជា ៥៣,០២៥,០០០ ដុល្លារ ។ ការសាងសង់ចាប់ផ្ដើមដំណើរការបាន ២៥% ស្ថានភាពនៃការរីករាលដាលកូវីដ-១៩ នៅលើពិភពលោកក៏បានឈានមកដល់ប្រទេសកម្ពុជា ហើយបានជះឥទ្ធិពលអវិជ្ជមានយ៉ាងខ្លាំងដល់ទីផ្សារអចលនវត្ថុនៅកម្ពុជា ក្នុងនោះក៍មានគម្រោងលំនៅឋាន ម៉ន ដានី ផងដែរ ៕ សម្រួលដោយ ទៀង បុណ្ណរី
