ប្រទះឃើញកូនផ្សោតកើតថ្មី១ក្បាលទៀតនៅអន្លង់កាំពី

រសួងកសិកម្ម រុក្ខាប្រមាញ់ និងនេសាទ បានប្រកាសថា កូនផ្សោតកើតថ្មី ១ក្បាល មានអាយុប្រមាណ២ថ្ងៃ ត្រូវប្រទះឃើញនៅវេលាម៉ោង ១៣៖ ៥០នាទីរសៀលថ្ងៃទី៤ ខែវិច្ឆិកា ឆ្នាំ២០២៣។  តាមរយៈការផ្ដល់ដំណឹងពីអ្នករត់ទូកទេសចរណ៍នៅអន្លង់ផ្សោតកាំពីក្រុមការងាររបស់រដ្ឋបាលជលផល និងអង្គការ WWF បានចុះទីដល់ទីតាំង និងថតបានរូបថតកូនផ្សោតនេះ ដែលកំពុងហែលលេងក្នុងក្រុមហ្វូងសត្វផ្សោតប្រមាណ៦ក្បាល ក្នុងអន្លង់កាំពី ភូមិកាំពី ឃុំសំបុក ស្រុកចិត្របុរី ខេត្តក្រចេះ ដែលមានចំណុចនិយាមកា ៤៨P: ០៦១០៤០៥ និង UTM: ១៣៩០៨៧៧។  បើតាមការអង្កេតជាក់ស្តែងរយៈពេលប្រមាណ២ម៉ោង ក្រុមការងាររដ្ឋបាលជលផល និងអង្គការ WWF សង្កេតឃើញថា ពុំមានសកម្មភាពបំពានណាមួយពីសំណាក់សត្វផ្សោតធំមកលើកូនផ្សោតទើបនឹងកើតថ្មីនោះទេ។  សូមជម្រាបជូនដែរថា កូនផ្សោតកើតថ្មីនេះជាកូនផ្សោតទី៨ហើយ ដែលបានកត់ត្រាក្នុងឆ្នាំ២០២៣នេះ ខណៈឆ្នាំ ២០២២ មានចំនួន ៦ ក្បាល។  របាយការណ៍របស់ក្រសួងកសិកម្ម រុក្ខាប្រមាញ់ និងនេសាទបង្ហាញថា គិតចាប់ពីដើមឆ្នាំរហូតដល់ដំណាច់ខែតុលា ឆ្នាំ ២០២៣ មានផ្សោតចំនួន ៤ ក្បាលហើយបានស្លាប់​បាត់​បង់​ជីវិត​ ខណៈ ៤ ឆ្នាំចុងក្រោយចាប់ពីឆ្នាំ ២០២០ មានផ្សោតសរុប ​៣៣ ក្បាលបានស្លាប់បាត់បង់ជីវិត និងផ្សោតកើតថ្មីចំនួន ២៨ ក្បាល៕  សម្រួលដោយ  ទៀង  បុណ្ណរី