ខណៈនេះ អ្នកឆ្លងកូវីដ១៩លើលោកកើនដល់ជាង១៣៦លាន ៦២ម៉ឺននាក់ ស្លាប់ជាង២លាន ៩៤ម៉ឺននាក់
TNM(បរទេស) ៖ យោងតាមទិន្នន័យពីគេហទំព័រអន្តរជាតិ Worldomete បង្ហាញថា គិតត្រឹមម៉ោង ៨ព្រឹកថ្ងៃចន្ទ ទី១២ ខែមេសា ឆ្នាំ២០២១នេះ ចំនួនអ្នកឆ្លងជំងឺ COVID-19 នៅទូទាំងពិភពលោក បានកើនឡើងដល់ ១៣៦,៦២៧,៣៣៩នាក់ហើយ។ ក្នុងនោះអ្នកស្លាប់មានចំនួន ២,៩៤៩,១៤២នាក់ និងជាសះស្បើយឡើងវិញ ១០៩,៨០៤,៧៩៩នាក់។
គេហទំព័រដដែលបានបង្ហាញថា ការរីករាលដាលនៃជំងឺកូវីដ១៩ នៅតែមានសភាពស្រួចស្រាវចំនួនអ្នកឆ្លង និងស្លាប់ថ្មីនៅតែមានចំនួនច្រើន។ ក្នុងនោះសហរដ្ឋអាមេរិក នៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ មានអ្នកឆ្លងជំងឺ COVID-19 ចំនួន ៣១,៩១៨,៥៩១នាក់ ស្លាប់ចំនួន ៥៧៥,៨២៩នាក់ និងជាសះស្បើយចំនួន ២៤,៤៨០,៥២២នាក់។
ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺកូវីដ១៩ គឺប្រទេសឥណ្ឌា មានអ្នកឆ្លង ១៣,៥២៥,៣៦៤នាក់ ស្លាប់ចំនួន ១៧០,២០៩នាក់ និងជាសះស្បើយ ១២,១៥៣,៦៩៩នាក់ និងប្រទេសឈរនៅចំណាត់ថ្នាក់ទី៣ គឺប្រទេសប្រេស៊ីល មានអ្នកឆ្លង ១៣,៤៨២,៥៤៣នាក់ ស្លាប់ ៣៥៣,២៩៣នាក់ និងជាសះស្បើយ ១១,៨៨០,៨០៣នាក់៕
