សិស្សជាង៨០០០នាក់ប្រឡងបាក់ឌុប អ្នកខ្លះមុនប្រឡងអុជធូបថ្វាយព្រះឲ្យជួយប្រឡងជាប់
ខេត្តកំពង់ចាម ៖ បើទោះបីជាវិទ្យាសាស្ត្រមានការរីកចម្រើនយ៉ាងណាក៏ដោយ ជាមួយនោះក៏វិស័យជំនឿសាសនា គឺត្រូវដើរទន្ទឹមគ្នាដែរ គឺមុនប្រឡងគេឃើញសិស្សានុសិស្សទាំងប្រុសទាំងស្រីនាំគ្នាអុជធូបថ្វាយបង្គំព្រះឲ្យជួយពួកគេប្រឡងជាប់។ ហើយចំពោះការប្រឡងនៅព្រឹកថ្ងៃទី៦ ខែវិច្ឆិកា ឆ្នាំ២០២៣នេះ គេក៏ឃើញវត្តមានលោក ហេង វណ្ណនី អភិបាលរងខេត្ត និងឯកឧត្តម ឡៅ ឈីវអ៊ាវ អនុរដ្ឋលេខាធិការក្រសួងអប់រំ យុវជន និងកីឡា ព្រមទាំងមន្ត្រីអង្គភាពប្រឆាំងអំពើពុករលួយ បានបើកវិញ្ញាសារនៅមណ្ឌលប្រឡងនៅវិទ្យាល័យព្រះសីហនុ(ជើង) ក្រុងកំពង់ចាម នាព្រឹកថ្ងៃទី៦ ខែវិច្ឆិកា ឆ្នាំ២០២៣នេះដែរ ។ សម្រាប់នៅខេត្តកំពង់ចាមទាំងមូល គឺមានចំនួន១០ស្រុក-ក្រុង មណ្ឌលប្រឡងមានសរុបទាំងអស់ចំនួន១៤កន្លែង ក្នុងនោះមានថ្នាក់វិទ្យាសាស្ត្រចំនួន៥មណ្ឌល និងវិទ្យាសាស្ត្រសង្គមចំនួន៩មណ្ឌល ដែលមាននៅតាមបណ្ដាស្រុកដូចជា ៖ ជើងព្រៃ កំពង់សៀម និងក្រុងកំពង់ចាម។ ហើយបេក្ខជន បេក្ខនារី ដែលចូលរួមប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប មានសរុបចំនួនជាង៨០០០នាក់។ ជាមួយគ្នានោះ រាល់ការស្នាក់នៅតាមផ្ទះសំណាក់ សណ្ឋាគារ និងផ្ញើកង់-ម៉ូតូ ត្រូវបានឯកឧត្តម អ៊ុន ចាន់ដា អភិបាលខេត្ត យកចិត្តទុកដាក់ដោយចេញថ្លៃសេវាជូនដល់សិស្សទាំងអស់ដោយឥតគិតថ្លៃ។ បើតាមយុវតីម្នាក់ឈ្មោះ ឆ្លាំង ផេង អាយុ១៨ឆ្នាំ រៀនរៀនថ្នាក់ទី១២ នៅវិទ្យាល័យហ៊ុន សែន កងតាណឹង ស្រុកកងមាស បានរៀបរាប់ទាំងញញឹមថា «ក្រោមការយកចិត្តទុកដាក់ពីសំណាក់ឯកឧត្តមបណ្ឌិតសភាចារ្យ ហង់ ជួនណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានជួយដល់សិស្សនៅក្នុងវិទ្យាល័យរបស់នាង ដោយប្រើប្រាស់រថយន្តក្រុងដឹកសិស្សចេញពីស្រុកកងមាស មកប្រឡងនៅមណ្ឌលវិទ្យាល័យព្រះសីហនុ ក្រុងកំពង់ចាម ដែលនឹងប្រព្រឹត្តទៅនៅថ្ងៃទី៦ និងថ្ងៃទី៧ ខែវិច្ឆិកា ឆ្នាំ២០២៣នេះ។ ហើយសម្រាប់ក្រុមរបស់នាងវិញ គឺមានគ្នាជាង២០នាក់ ដោយមានលោកគ្រូ អ្នកគ្រូ ចាំជួយមើលថែរក្សាទៀតផង»។ យុវត្តីខាងលើរូបនេះ បានរៀបរាប់ឲ្យដឹងទៀតថា «សម្រាប់ការប្រឡងថ្នាក់ទី១២ ប្រចាំថ្នាក់គឺទទួលបានចំណាត់ថ្នាក់លេខ៣ ប្រចាំឆ្នាំ ចំពោះមុខវិជ្ជា ដែលត្រូវប្រឡងក្នុងនោះ រួមមាន៖ គណិតវិទ្យារូបវិទ្យា គីមីវិទ្យា ជីវវិទ្យា ប្រវត្តិវិទ្យានិងអក្សរសាស្ត្រខ្មែរ។ ហើយចំពោះលទ្ធផលការប្រឡងនេះ នាងរំពឹងថា នឹងប្រឡងជាប់ ហើយនឹងឈានជើងទៅបន្តការសិក្សានៅឧត្តមសិក្សារាជធានីភ្នំពេញ»។ ចំណែកយុវសិស្សម្នាក់ទៀតមានឈ្មោះ មី លីហេង រៀនថ្នាក់ទី១២ «ក» មកពីវិទ្យាល័យហ៊ុន សែន ខ្ចៅ ស្រុកកងមាស ក៏បានប្រាប់ឲ្យដឹងដែរថា «គេពិតជាសប្បាយរីករាយដោយមានការយកចិត្តទុកដាក់ពីថ្នាក់ដឹកនាំគ្រប់លំដាប់ថ្នាក់ បានជួយជាមធ្យោបាយដឹកសិស្សមកប្រឡងនៅក្រុងកំពង់ចាម ដោយក្នុងនោះក្រុមរបស់គេ រួមជាមួយនឹងមិត្តភក្កិ២នាក់ទៀតក៏បានមកដល់នៅព្រឹកថ្ងៃទី៥ ខែវិច្ឆិកា និងបានទៅមើលបញ្ជីឈ្មោះដែលត្រូវប្រឡងនៅតាមមណ្ឌលក្នុងក្រុងកំពង់ចាម»។ សម្រួលដោយ ទៀង បុណ្ណរី
