អ៊ីស្រាអែលសម្រុកវាយប្រហារស៊ីរី និងលីបង់ ជាការសងសឹក
អ៊ីស្រាអែល បានសម្រុកវាយប្រហារប្រឆាំងនឹងហេដ្ឋារចនាសម្ព័ន្ធយោធាក្នុងប្រទេសស៊ីរី និងលីបង់ ចំពេលមានការព្រួយបារម្ភថា ការវាយលុករបស់ប្រទេសនេះប្រឆាំងនឹងក្រុមហាម៉ាស អាចធ្វើឱ្យមានជម្លោះកាន់តែទូលំទូលាយនៅទូទាំងមជ្ឈិមបូព៌ា។ យោធាអ៊ីស្រាអែលបានឱ្យដឹងនៅថ្ងៃចន្ទទី៣០ ខែតុលានេះថា យន្តហោះរបស់ខ្លួនបានវាយប្រហារប្រព័ន្ធបាញ់គ្រាប់រ៉ុក្កែតនៅក្នុងប្រទេសស៊ីរី និងក្រុមហេ្សសបូឡាហ៍ក្នុងប្រទេសលីបង់ ដើម្បីឆ្លើយតបទៅនឹងការបាញ់គ្រាប់រ៉ុក្កែតមុនៗចូលទៅក្នុងទឹកដីអ៊ីស្រាអែល។ យ៉ាងណា មន្ត្រីយោធាអ៊ីស្រាអែលមិនបានផ្តល់ព័ត៌មានលម្អិតបន្ថែមអំពីការវាយប្រហារ និងចំនួនអ្នកស្លាប់ និងរបួសដែលអាចកើតមានឡើយ។ យោធារបស់អ៊ីស្រាអែល បានចូលរួមនៅក្នុងការប្រយុទ្ធឆ្លងព្រំដែនជាមួយក្រុមប្រដាប់អាវុធលីបង់ ដែលមានឈ្មោះថា ក្រុមហេ្សសបូឡាហ៍ ហើយបានបើកការវាយឆ្មក់តាមអាកាសម្ដងហើយម្ដងទៀតលើប្រទេសស៊ីរី ចាប់តាំងពីការចាប់ផ្តើមសង្គ្រាមលើក្រុមហាម៉ាស។ សហរដ្ឋអាម៉េរិកក៏បានធ្វើការវាយប្រហារលើប្រទេសស៊ីរី ជាការឆ្លើយតបទៅនឹងការកើនឡើងយ៉ាងខ្លាំងនៃការវាយប្រហារដោយរ៉ុក្កែត និងយន្តហោះគ្មានមនុស្សបើកមកលើកងកម្លាំងរបស់ខ្លួននៅក្នុងប្រទេសស៊ីរី និងអ៊ីរ៉ាក់ ដែលខ្លួនបានស្ដីបន្ទោសទៅលើក្រុមប្រូកស៊ីដែលគាំទ្រដោយអ៊ីរ៉ង់។ កាលពីថ្ងៃព្រហស្បតិ៍ មន្ទីរបញ្ចកោណបានឱ្យដឹងថា ខ្លួនបានវាយប្រហារលើមូលដ្ឋានចំនួនពីរនៅក្នុងប្រទេសស៊ីរី ដែលប្រើប្រាស់ដោយកងឆ្មាំបដិវត្តន៍អ៊ីស្លាមរបស់អ៊ីរ៉ង់ និងក្រុមដែលគាំទ្រដោយអ៊ីរ៉ង់ បន្ទាប់ពីប្រធានាធិបតី ចូ បៃឌិន បានសន្យាថា នឹងឆ្លើយតបទៅនឹងការវាយប្រហារលើកងកម្លាំងយោធាអាម៉េរិក។ ជុំវិញបញ្ហានេះ មេដឹកនាំកំពូលរបស់អ៊ីរ៉ង់ លោក អាយ៉ាតូឡា អាលី ខាមេនី (Ayatollah Ali Khamenei) បានព្រមានអំពីការកើនឡើងក្នុងតំបន់ ប្រសិនបើអ៊ីស្រាអែលបន្តសង្រ្គាមប្រឆាំងនឹងក្រុមហាម៉ាស ដោយបាននិយាយកាលពីដើមខែនេះថា ប្រជាជនម៉ូស្លីម និងកងកម្លាំងតស៊ូនឹងអស់ភាពអត់ធ្មត់ ហើយគ្មាននរណាម្នាក់អាចបញ្ឈប់ពួកគេបានឡើយ។ បន្ថែមលើនោះ កាលពីសប្តាហ៍មុន ប្រធានាធិបតីរុស្ស៊ី លោក វ្ល៉ាឌីមៀ ពូទីន បានព្រមានថា ជម្លោះអាចនឹងផ្ទុះឡើងហួសពីព្រំដែននៃមជ្ឈិមបូព៌ា ប្រសិនបើអ៊ីស្រាអែលមិនបញ្ចប់ការទម្លាក់គ្រាប់បែករបស់ខ្លួនលើតំបន់ហ្កាហ្សា។ ដោយឡែក ទីប្រឹក្សាសន្តិសុខជាតិអាម៉េរិកលោក ជេក ស៊ូលីវ៉ាន (Jake Sullivan) បាននិយាយនៅក្នុងបទសម្ភាសជាមួយ ABC News ថាមានហានិភ័យពិតប្រាកដនៃសង្រ្គាមដែលកើនឡើងទៅជាជម្លោះក្នុងតំបន់កាន់តែទូលំទូលាយ។ ទន្ទឹមគ្នានោះ រដ្ឋមន្ត្រីការបរទេសអ៊ីរ៉ង់ លោក ហូសេន អាមៀ-អាប់ឌុលឡាហាន (Hossein Amir-Abdollahian) បានប្រាប់សារព័ត៌មាន CNN ថា ប្រទេសរបស់លោកមិនចង់ឃើញសង្រ្គាមរីករាលដាលទេ ហើយថាវាជាអំពើខុសឆ្គងទាំងស្រុងសម្រាប់ទីក្រុងវ៉ាស៊ីនតោន ដែលស្ដីបន្ទោសទីក្រុងតេហេរ៉ង់ចំពោះការវាយប្រហារលើកងកម្លាំងរបស់ខ្លួន ទាំងមិនមានភស្តុតាងអ្វីទាំងអស់។ អ៊ីរ៉ង់ដែលគាំទ្រទាំងក្រុមហាម៉ាស និងក្រុមហេសបូឡាស៍ បានបដិសេធរាល់តួនាទីក្នុងការវាយប្រហារថ្ងៃ៧ តុលា របស់ក្រុមហាម៉ាសលើអ៊ីស្រាអែល ខណៈមន្ត្រីអាម៉េរិក និងអ៊ីស្រាអែលបាននិយាយថា ពួកគេមិនបានរកឃើញភស្តុតាងនៃការជាប់ពាក់ព័ន្ធរបស់អ៊ីរ៉ង់ក្នុងសង្គ្រាមនេះទេ។ យ៉ាងណាក៏ដោយ មន្ត្រីរដ្ឋាភិបាលអ៊ីរ៉ង់បានផ្តល់ការអបអរសាទរដល់ក្រុមប្រដាប់អាវុធប៉ាឡេស្ទីន ដោយពណ៌នាការវាយប្រហារដ៏ភ្ញាក់ផ្អើលថាជាជ័យជម្នះសម្រាប់ការតស៊ូប្រឆាំងនឹងជនជាតិជ្វីហ៕ សម្រួលដោយ ទៀង បុណ្ណរី
