សមត្ថកិច្ចឃាត់រថយន្តនាំចូលស៊ុតទាជាង៦ម៉ឺនគ្រាប់ ពីវៀតណាមគ្មានច្បាប់អនុញ្ញាត
រាជធានីភ្នំពេញ៖ ក្រុមការងារអន្តរាគមន៍បង្ក្រាបបទល្មើសចលនាសត្វ នៃអគ្គដ្ឋានសុខភាពសត្វ និងផលិតកម្មសត្វ សហការជាមួយការិយាល័យផលិតកម្ម និងបសុព្យាបាល នៃមន្ទីរកសិកម្មរាជធានីភ្នំពេញ បានចុះឃាត់រថយន្តដឹកស៊ុតទាចំនួន៦៦ ០០០ គ្រាប់ ដែលដឹកចេញពីប្រទេសវៀតណាម ចូលមកកម្ពុជា ឆ្ពោះទៅលក់ចែកចាយក្នុង រាជធានីខេត្តមួយចំនួន ដែលសុទ្ធសឹងជាការនាំចូលដោយគ្មានលិខិតអនុញ្ញាត។ នេះបើយោងតាមការឱ្យដឹងពី លោក ហ៊ុន សារ៉ាត់ អនុប្រធាននាយកដ្ឋានសុខភាពសត្វកាលពីថ្ងៃទី២៩ ខែតុលា ឆ្នាំ២០២៣…។ តាមរយៈគណនីហ្វេសប៊ុក លោក ហ៊ុន សារ៉ាត់ បានឱ្យដឹងថា ប្រតិបត្តិការចុះបង្ក្រាបនេះបានធ្វើឡើងនាវេលាម៉ោង៥:៥០នាទីព្រឹកថ្ងៃទី២៩តុលា ដោយកម្លាំងជំនាញឃាត់បានការលួចនាំចូលចំនួន២ទីតាំងផ្សេងគ្នារួមមាន៖ ករណីទី១ឃាត់រថយន្តមួយគ្រឿង ម៉ាក SSANGYONG ISTANA ប្រភេទដឹកអ្នកដំណើរ១៥កៅអី ពាក់ស្លាកលេខភ្នំពេញ ២BD-១១២០ ពណ៌លឿង ដឹកស៊ុតទាចំនួន ២០ ១០០គ្រាប់ នៅសង្កាត់ដង្កោ ខណ្ឌដង្កោ រាជធានីភ្នំពេញ។ ករណីទី២ ឃាត់បានរថយន្ត១គ្រឿងទៀតពាក់ស្លាកលេខភ្នំពេញ២N-៨៥១០ ពណ៌ ស ដឹកស៊ុតសត្វទាចំនួន ៤៥៩០០គ្រាប់ មកពីប្រទេសវៀតណាម ចូលតាមច្រកភ្នំដិន ស្រុកគិរីវង់ ខេត្តតាកែវ រួចមកលក់ចែកចាយក្នុងរាជធានីភ្នំពេញ។ ឃាត់នៅសង្កាត់វាលវង់ ខណ្ឌ៧មករា រាជធានីភ្នំពេញ។ បើតាមអនុប្រធាននាយកដ្ឋានសុខភាពសត្វ វត្ថុតាងដែលឃាត់បានទាំងពីរករណីនេះកម្លាំងជំនាញយកទៅរក្សាទុកនៅទីតាំងចត្តាឡីស័កសត្វ របស់អគ្គនាយកដ្ឋានសុខភាពសត្វ និងផលិតកម្មសត្វ ដើម្បីអនុវត្តតាមនីតិវិធីច្បាប់។ គួរបញ្ជាក់ថា ជុំវិញករណីនាំចូលទំនិញគ្មានច្បាប់ត្រឹមត្រូវពីប្រទេសជិតខាងចូលកម្ពុជានេះ មហាជនជាច្រើនបានសម្តែងការព្រួយបារម្ភជាខ្លាំង ខណៈដែលក្រុមឈ្មួញតែងតែយកមកលក់ចែកចាយជូនប្រជាពលរដ្ឋ ដោយបង្កជាគ្រោះមហន្តរាយដល់សុខភាពសាធារណៈ។ ទន្ទឹមនឹងនោះ មហាជនបានលើកឡើងថា ហេតុអ្វីបានជាកម្លាំងជំនាញបណ្តែតបណ្តោយឱ្យពួកឈ្មួញទាំងនោះនាំចូលមកឆ្លងកាត់ច្រកព្រំដែនដោយគ្នាលិខិតច្បាប់អ្វីដោយងាយស្រួលម៉្លេះ? ជាការល្អហើយដែលករណីនេះអាចចាប់បាន ចុះបើចាប់មិនបានវិញតើសុខភាពពលរដ្ឋនឹងទៅជាយ៉ាងណា? ពលរដ្ឋស្នើឱ្យអាជ្ញាធរពាក់ព័ន្ធពង្រឹង និងចាត់វិធានការច្បាប់ឱ្យបានម៉ឺងម៉ាត់ចំពោះការនាំចូលបែបនេះ កុំមានការលើកលែងឱ្យសោះ៕ សម្រួលដោយ ទៀង បុណ្ណរី
