ភ្លើងឆាបឆេះបង្គោលភ្លើងយ៉ាងសន្ធោសន្ធៅផ្អើលមុខសាលារៀនចិន
ខេត្តបន្ទាយមានជ័យ ៖ បើតាមសេចក្តីរាយការណ៍បានឱ្យដឹងថា អណ្ដាតភ្លើងឆាបឆេះបង្គោលភ្លើងនៅមុខសាលារៀនចិនយ៉ាងសន្ធោសន្ធៅ បង្កឱ្យមានការភ្ញាក់ផ្អើលកាលពីល្ងាចថ្ងៃទី២៩ ខែតុលា ឆ្នាំ២០២៣ នៅជាប់ផ្លូវជាតិលេខ៥ ស្ថិតក្នុងភូមិគីឡូម៉ែត្រលេខ៤ សង្កាត់ផ្សារកណ្តាល ក្រុងប៉ោយប៉ែត មូលហេតុដោយសារតែឆ្លងចរន្តអគ្គិសនី ទើបបណ្តាលឱ្យភ្លើងឆាបឆេះសន្ធោសន្ធៅបែបនេះ។ បើតាមប្រជាពលរដ្ឋបានប្រាប់ឱ្យដឹងថា ខណៈពេលឆ្លងចរន្តអគ្គិសនីបង្គោលភ្លើងនៅមុខសាលារៀនចិន បង្កឱ្យក្លាយជាអណ្តាតភ្លើងឆាបឆេះឡើងយ៉ាងសន្ធោសន្ធៅនោះ ធ្វើឱ្យប្រជាពលរដ្ឋរស់នៅក្បែរនោះមានការព្រួយបារម្ភយ៉ាងខ្លាំង ព្រោះខ្លាចភ្លើងឆេះរាលដាលដល់ផ្ទះរបស់ពួកគាត់។ ប្រជាពលរដ្ឋបានបញ្ជាក់ថា នៅពេលអគ្គិភ័យឆាបឆេះបង្គោលភ្លើងភ្លាមៗ ពួកគាត់ក៏ឃើញលោក នួន នីគីដា និងក្រុមការងារបានចុះជួយអន្តរាគមន៍ ដោយប្រើប្រាស់បំពង់ពន្លត់អគ្គិភ័យបា.ញ់ការពារមិនអោយឆេះរាលដាល រហូតដល់រថយន្តពន្លត់អគ្គិភ័យអធិការដ្ឋាននគរបាលក្រុងប៉ោយប៉ែត១គ្រឿង និងរថយន្តពន្លត់អគ្គិភ័យក្រុមហ៊ុនត្រូពីកាណា បានមកជួយបា.ញ់ទឹកពន្លត់បានទាន់ពេល។ ប្រជាពលរដ្ឋបានបញ្ជាក់ទៀតថា ក្រុងប៉ោយប៉ែតនៅអំឡុងខែតុលា ឆ្នាំ២០២៣នេះ គឺមានករណីអគ្គិភ័យឆាបឆេះចំនួន៣លើកមកហើយ ដោយករណីទី១- កាលពីថ្ងៃទី២២ ខែតុលា ឆ្នាំ២០២៣ នៅចំណុចភូមិសាមគ្គីមានជ័យ សង្កាត់អូរជ្រៅ ក្រុងប៉ោយប៉ែត មានអគ្គិភ័យបានឆាបឆេះបង្គោលភ្លើង។ ករណី២- កាលពីថ្ងៃទី២២ ខែតុលា ឆ្នាំ២០២៣ ស្ថិតនៅភូមិក្បាលស្ពានមួយ សង្កាតអូរជ្រៅ ក្រុងប៉ោយប៉ែត អគ្គិភ័យបានឆាបឆេះផ្ទះអស់១ល្វែង និងករណី៣- នៅថ្ងៃទី២៩ ខែតុលា ឆ្នាំ២០២៣ ស្ថិតក្នុងភូមិគីឡូម៉ែត្រលេខ៤ សង្កាត់អូរជ្រៅ ក្រុងប៉ោយប៉ែត អគ្គិភ័យបានឆាបឆេះបង្គោលភ្លើង៕ សម្រួលដោយ ទៀង បុណ្ណរី
