កម្ពុជាពុំរងឥទ្ធិពលពីព្យុះត្រូពិចទី១៦ ឈ្មោះ «សាន់បា» ទេ តែអាចមានភ្លៀងធ្លាក់ពីខ្សោយទៅបង្គួសូមប្រុងប្រយ័ត្ន
រាជធានីភ្នំពេញ ៖ ក្រសួងធនធានទឹក និងឧតុនិយម បានប្រាប់ឲ្យដឹងថា ព្យុះត្រូពិចទី១៦ ឈ្មោះថា «សាន់បា» T2316 (SANBA) នៅឈូងសមុទ្រតុងកឹង ប្រទេសចិន នឹងរំកិលចូលមកកាន់ឆ្នេរសមុទ្រនៃភាគខាងត្បូងប្រទេសចិន កត្តានេះ នឹងធ្វើតាមបណ្ដាខេត្ត ជាពិសេសរាជធានីភ្នំពេញ តំបន់មាត់សមុទ្រ និងតំបន់ទំនាបកណ្តាល អាចនឹងមានភ្លៀងធ្លាក់ចាប់ពីខ្សោយទៅបង្គួរ នៅតំបន់ខ្លះ ចាប់ពីថ្ងៃទី២០ រហូតដល់ថ្ងៃទី២៣ ខែតុលា ឆ្នាំ២០២៣នេះ។ ប៉ុន្តែទោះបីជាយ៉ាងណា ព្យុះទី១៦ SANBA នេះ ពុំមានឥទ្ធិពលមកលើប្រទេសកម្ពុជានោះទេ។ យោងតាមសេចក្តីជូនដំណឹងស្តីពី អំពីស្ថានភាពធាតុអាកាសនៅព្រះរាជាណាចក្រកម្ពុជា សម្រាប់ថ្ងៃទី២០ ខែតុលា ឆ្នាំ២០២៣នេះ របស់ក្រសួងធនធានទឹក និងឧតុនិយម បានឲ្យដឹងថា ព្យុះត្រូពិចទី១៦ ឈ្មោះថា «សាន់បា» T2316 (SANBA) នៅឈូងសមុទ្រតុងកឹង ប្រទេសចិន នឹងរំកិលចូលមកកាន់ឆ្នេរសមុទ្រនៃភាគខាងត្បូងប្រទេសចិន កត្តានេះ ធ្វើឱ្យមានប្រព័ន្ធសម្ពាធខ្ពស់ គ្របដណ្ដប់លើតំបន់ខ្ពង់រាបភាគខាងជើង នៃព្រះរាជាណាចក្រកម្ពុជា ខណៈពេលដែលមានខ្យល់ មូសុង កម្រិតមធ្យមបានកើតឡើង តែព្យុះទី១៦ SANBA នេះ ពុំមានឥទ្ធិពលផ្ទាល់មកលើប្រទេសកម្ពុជានោះទេ។ ក្រសួងធនធានទឹក និងឧតុនិយម បានបន្តថា ស្ថានភាពបែបនេះ នឹងធ្វើឱ្យចាប់ពីថ្ងៃទី២០ រហូតដល់ថ្ងៃទី២៣ ខែតុលា ឆ្នាំ២០២៣នេះ នៅតាមខេត្តមួយចំនួនដូចជា ៖ ខេត្តស្ទឹងត្រែង ខេត្តព្រះវិហារ ខេត្តរតនគិរី និងខេត្តមណ្ឌលគិរី នឹងមានភ្លៀងធ្លាក់ក្នុងកម្រិតខ្សោយ គ្របដណ្តប់លើផ្ទៃដី ចាប់ពី ៣០% ទៅ ៤០%។ ក្រសួងធនធានទឹក និងឧតុនិយម បានបន្តទៀតថា លើសពីនេះ ខ្យល់មូសុងនិរតី ក៏បានបោ.កបក់មកលើសមុទ្រអាដាំមែន (Andaman Sea) និងឈូងសមុទ្រថៃ ហើយប្រការនេះ នឹងបណ្តាលឱ្យមានភ្លៀងធ្លាក់នៅក្នុងកម្រិតចាប់ពីខ្សោយទៅមធ្យម ក្នុងនោះតំបន់ខ្លះក៏អាចមានភ្លៀងធ្លាក់បង្គួរ ជាមួយនឹងទំហំទឹកភ្លៀងធ្លាក់គ្របដណ្តប់លើផ្ទៃដី ចាប់ពី ៤០% ទៅ ៥០% ជាពិសេសនៅរាជធានីភ្នំពេញ តំបន់មាត់សមុទ្រ និងតំបន់ទំនាបកណ្តាល។ ជាមួយគ្នានេះ ក្រសួងធនធានទឹក និងឧតុនិយម ក៏សូមឲ្យប្រជាពលរដ្ឋនៅតំបន់មួយចំនួន ត្រូវប្រុងប្រយ័ត្នឱ្យខ្ពស់ចំពោះស្ថានភាពនេះ ដែលអាចបង្កជាជំនន់ទឹកភ្លៀង៕ សម្រួលដោយ ទៀង បុណ្ណរី
