ទឹកជំនន់នៅថៃ ឆក់យកជិវិតមនុស្ស៥នាក់ ខណៈភ្លៀងនៅបន្តធ្លាក់ខ្លាំង
មនុស្ស៥នាក់ ត្រូវបានស្លាប់នៅក្នុងទឹកជំនន់នៅភាគខាងជើងប្រទេសថៃក្នុងសប្តាហ៍នេះ ដោយអាជ្ញាធរបានព្រមាននៅថ្ងៃអង្គារទី១៧តុលានេះថា ភ្លៀងនឹងបន្តធ្លាក់ខ្លាំងបន្ថែមទៀត…។ ក្រសួងសុខាភិបាល បានឱ្យដឹងក្នុងសេចក្តីថ្លែងការណ៍មួយថា ចាប់តាំងពីដើមរដូវខ្យល់មូសុងក្នុងខែកញ្ញា ពលរដ្ឋថៃសរុប២៣នាក់ បានស្លាប់ក្នុងគ្រោះទឹកជំនន់ និង៣៣នាក់ទៀតបានរងរបួស។ ក្រសួងបានបង្ហាញថា នៅដើមសប្តាហ៍នេះ ទឹកជំនន់នៅក្នុងខេត្តផាយ៉ាវ (Phayao) ភាគខាងជើងប្រទេសថៃបានសម្លាប់មនុស្សប្រាំនាក់។ អាជ្ញាធរថៃ បានចេញការព្រមានពីទឹកជំនន់សម្រាប់ខេត្តចំនួន៣២ នៅថ្ងៃអង្គារនេះ។ ភ្លៀងធ្លាក់ខ្លាំង ត្រូវបានព្យាករសម្រាប់រាជធានីបាងកក និងកោះរមណីយដ្ឋានដ៏ពេញនិយមរបស់ខេត្តភូកេតផងដែរ។ ក្រសួងមហាផ្ទៃ បានលើកឡើងនៅក្នុងសេចក្តីថ្លែងការណ៍មួយថា ខ្យល់មូសុងពីភាគនិរតីនឹងបក់បោកលើសមុទ្រ Andaman និងឈូងសមុទ្រថៃ ហើយនឹងធ្វើឱ្យមានភ្លៀងធ្លាក់ក្នុងប្រទេសថៃ។ សេចក្តីថ្លែងការណ៍បន្តថា គ្រួសារនៃប្រជាជនថៃជាង៦២០០០គ្រួសារ ត្រូវបានរងផលប៉ះពាល់ដោយទឹកជំនន់នៅរដូវវស្សានេះ។ លោកនាយករដ្ឋមន្ត្រី សេដ្ឋា ថាវីស៊ីន បានចុះទៅពិនិត្យតំបន់ទឹកជំនន់ជាទៀងទាត់ក្នុងប៉ុន្មានសប្តាហ៍ថ្មីៗនេះ ខណៈដែលអាជ្ញាធរមូលដ្ឋានកំពុងព្យាយាមផ្តល់ឧបករណ៍សង្គ្រោះដល់ជនជម្លៀស។ ក្នុងឆ្នាំ២០១១ ទឹកជំនន់បានសម្លាប់មនុស្សជាង៥០០នាក់ និងបំផ្លាញផ្ទះរាប់លានខ្នងនៅទូទាំងប្រទេស៕ សម្រួលដោយ ទៀង បុណ្ណរី
