ផែនការបទឈប់បាញ់បានជាប់គាំងខណៈអ៊ីស្រាអែលបង្កើនការវាយប្រហារតាមអាកាសលើតំបន់ហ្គាហ្សា
ក្តីសង្ឃឹមសម្រាប់បទឈប់បាញ់ដ៏ខ្លីមួយនៅភាគខាងត្បូងតំបន់ហ្គាហ្សា ដើម្បីអនុញ្ញាតឱ្យអ្នកកាន់លិខិតឆ្លងដែនបរទេសចាកចេញពីក្របខណ្ឌប៉ាឡេស្ទីនត្រូវបានឡោមព័ទ្ធ បានរលាយបាត់ ហើយជំនួយដែលត្រូវនាំយកទៅត្រូវបានរំសាយកាលពីថ្ងៃចន្ទ ដោយសារការទម្លាក់គ្រាប់បែកកាន់តែខ្លាំងរបស់អ៊ីស្រាអែល មុនពេលការលុកលុយលើដីដែលគេរំពឹងទុក។ អ្នកស្រុកនៅតំបន់ហ្គាហ្សាដែលគ្រប់គ្រងដោយក្រុមហាម៉ាសបាននិយាយថា ការវាយប្រហារពេញមួយយប់គឺជាការវាយប្រហារដ៏ធ្ងន់ធ្ងរបំផុតនៅក្នុងរយៈពេល៩ថ្ងៃនៃជម្លោះ។ ផ្ទះជាច្រើនខ្នងត្រូវបានបាក់ស្រុត ហើយចំនួនអ្នកស្លាប់បានកើនឡើងយ៉ាងច្រើន។ កិច្ចខិតខំប្រឹងប្រែងផ្នែកការទូតកំពុងដំណើរការដើម្បីទទួលបានជំនួយចូលទៅក្នុងតំបន់រងការឡោមព័ទ្ធដែលបានស៊ូទ្រាំនឹងការទម្លាក់គ្រាប់បែករបស់អ៊ីស្រាអែលឥតឈប់ឈរចាប់តាំងពីការវាយប្រហារកាលពីថ្ងៃទី ៧ ខែតុលាមក លើអ៊ីស្រាអែលដោយពួកសកម្មប្រយុទ្ធហាម៉ាសដែលបានសម្លាប់មនុស្ស ១.៣០០នាក់ ជាថ្ងៃដ៏បង្ហូរឈាមបំផុតក្នុងប្រវត្តិសាស្ត្រក្នុងរយៈពេល៥៧ ឆ្នាំរបស់រដ្ឋនេះ។ អ៊ីស្រាអែលបានបិទផ្លូវទាំងស្រុង និងត្រៀមការលុកលុយចូលក្នុងតំបន់ហ្គាហ្សា និងបំផ្លាញក្រុមហាម៉ាស ដែលបានបន្តបាញ់ស្រោចគ្រាប់រ៉ូកែតលើអ៊ីស្រាអែលចាប់តាំងពីការវាយប្រហារឆ្លងព្រំដែនមួយរយៈខ្លីរបស់ខ្លួន។ ទាហានអ៊ីស្រាអែល និងរថក្រោះត្រូវបានប្រមូលផ្តុំគ្នារួចហើយនៅតាមព្រំដែន។ អាជ្ញាធរក្នុងតំបន់ហ្គាហ្សាបាននិយាយថា រហូតមកដល់ពេលនេះមនុស្សយ៉ាងហោចណាស់ ២.៧៥០ នាក់ត្រូវបានសម្លាប់ដោយសារការវាយប្រហាររបស់អ៊ីស្រាអែល មួយភាគបួននៃពួកគេជាកុមារ និងជិត ១០.០០០នាក់ បានរងរបួស។ មនុស្ស១.០០០នាក់ទៀតបានបាត់ខ្លួន ហើយគេជឿថាស្ថិតនៅក្រោមគំនរបាក់បែក។ សូមបញ្ជាក់ថា រហូតមកដល់ពេលនេះ មនុស្សជាង ៤.១០០នាក់ ហើយ បានស្លាប់ នៅក្នុងជម្លោះប៉ាឡេស្ទីន និងអ៊ីស្រាអែល ខណៈចំនួនអ្នកស្លាប់នៅតែបន្តកើនឡើងនៅក្នុងការប្រយុទ្ធគ្នារវាងភាគីទាំងពីរ៕ សម្រួលដោយ ទៀង បុណ្ណរី
