អ៊ីរ៉ង់បដិសេធថា ខ្លួនមិនពាក់ព័ន្ធ ក្នុងការវាយប្រហារ មកលើអ៊ីស្រាអែលនោះទេ!
ទីក្រុងតេអេរ៉ង់ បានបដិសេធថា ខ្លួនមិនបានជួយពួកសកម្មប្រយុទ្ធប៉ាឡេស្ទីន ឱ្យរៀបចំផែនការវាយប្រហារ មកលើអ៊ីស្រាអែល កាលពីថ្ងៃសៅរ៍នោះទេ។ បេសកជនរបស់អ៊ីរ៉ង់ប្រចាំអង្គការសហប្រជាជាតិ បាននិយាយនៅក្នុងសេចក្តីថ្លែងការណ៍មួយទៅកាន់ប្រព័ន្ធផ្សព្វផ្សាយថា «ការសម្រេចចិត្តដែលធ្វើឡើង ។ ដោយការតស៊ូរបស់ប៉ាឡេស្ទីនគឺមានស្វ័យភាពយ៉ាងខ្លាំងក្លា និងស្របតាមផលប្រយោជន៍ស្របច្បាប់របស់ប្រជាជនប៉ាឡេស្ទីន។ ចំណែកយើងមិនពាក់ព័ន្ធនឹងការឆ្លើយតបរបស់ប៉ាឡេស្ទីន នោះទេ ព្រោះវាត្រូវបានធ្វើដោយប៉ាឡេស្ទីនតែម្នាក់ឯង»។ សូមជម្រាបថាៈ កាលពីថ្ងៃអាទិត្យ កាសែត Wall Street Journal បានដកស្រង់ប្រភពជាច្រើន រួមទាំងសមាជិកមិនបញ្ចេញឈ្មោះនៃក្រុមសកម្មប្រយុទ្ធ Hamas និង Hezbollah ដោយនិយាយថា មន្ត្រីមកពីកងឆ្មាំបដិវត្តន៍អ៊ីស្លាមរបស់អ៊ីរ៉ង់ បានជួយរៀបចំផែនការវាយប្រហារលើអ៊ីស្រាអែលតាំងពីខែសីហាមកម្លេះ។ ជាមួយគ្នានោះ អ៊ីរ៉ង់ក៏បានផ្តល់ភ្លើងខៀវ សម្រាប់ប្រតិបត្តិការនៅឯកិច្ចប្រជុំមួយនៅទីក្រុងបេរូត ប្រទេសលីបង់ កាលពីថ្ងៃច័ន្ទមុនផងដែរ។ ទន្ទឹមនោះ លោក Ghazi Hamad អ្នកនាំពាក្យក្រុមហាម៉ាស់ បានប្រាប់ BBC ថា ពួកសកម្មប្រយុទ្ធមាន ការគាំទ្រដោយផ្ទាល់ ពីប្រទេសអ៊ីរ៉ង់។ ទោះជាយ៉ាងណាក៏ដោយលោក Ali Baraka មន្ត្រី Hamas ម្នាក់ទៀតបានអំពាវនាវនៅក្នុងបទសម្ភាសន៍ជាមួយ NBC News ថាទីក្រុង Tehran មិនត្រូវបានគេជូនដំណឹងអំពី Operation Al-Aqsa Floodជាមុនទេ។ លោកបានមានប្រសាសន៍ថា វាជាការភ្ញាក់ផ្អើលសម្រាប់អ្នករាល់គ្នា រួមទាំងប្រទេសអ៊ីរ៉ង់ផងដែរ នៅពេលដែលក្រុមហាម៉ាស់បានវាយប្រហារអ៊ីស្ត្រាអែលនោះ៕ សម្រួលដោយ ទៀង បុណ្ណរី
