សងសឹកគំនុំចាស់ បុរសម្នាក់យកកាំភ្លើងខ្យល់កែច្នៃ បាញ់ទៅលើស្រី្ត២នាក់បណ្តាលឱ្យរងរបួស

ខេត្តបាត់ដំបង៖ កម្លាំងនៃអធិការដ្ឋាននគរបាលស្រុកសង្កែ កាលពីថ្ងៃទី២២កញ្ញា ឆ្នាំ២០២៣ បានសហការជាមួយកម្លាំងប៉ុស្តិ៍នគរបាលរដ្ឋបាលវត្តតាមិម ឃាត់ខ្លួនជនសង្ស័យម្នាក់ក្នុងករណីហិង្សាដោយចេតនា យក​​កាំភ្លើងខ្យល់កែច្នៃបាញ់ទៅលើស្រី្ត០២នាក់បណ្តាលឱ្យរបួសត្រង់ដៃ​​ និងបំផ្លាញទ្រព្យសម្បត្តិខូចខាតអស់មួយចំនួន ព្រោះសងសឹកគំនុំចាស់។  លោកវរសេនីយ៍ទោ យុត តុងហូ អធិការនគរបាលស្រុកសង្កែ បានឱ្យដឹងថា កិច្ចប្រតិបត្តិការចុះឃាត់ខ្លួនករណីខាងលើនេះ ធ្វើទ្បើងកាលពីថ្ងៃទី២២កញ្ញាម្សិលមិញ​ នៅចំណុចក្រុមទី០៥ ភូមិអូរស្រឡៅ  ឃុំវត្តតាមិម ស្រុកសង្កែ ខេត្តបាត់ដំបង ក្រោយពីទទួលបានបណ្តឹងផ្ទាល់មាត់ពីជនរងគ្រោះ ថាមានករណីហិង្សាដោយចេតនា ដែលបង្កឡើងដោយជនសង្ស័យម្នាក់។​ លោកបន្តថា ជនសង្ស័យដែលត្រូវឃាត់ខ្លួនមានឈ្មោះ ឆាយ បញ្ញា អាយុ២៨ឆ្នាំ មានទីលំនៅភូមិអូរស្រឡៅ ឃុំវត្តតាមិម បានធ្វើសកម្មភាពយកកាំភ្លើងខ្យល់កែច្នៃបាញ់ទៅលើជនរងគ្រោះចំនួន២នាក់ ដែលមានឈ្មោះ អឿ ជន អាយុ៥៣ឆ្នាំ រងរបួសសាច់ដុំដៃមួយកន្លែងហេីមជាំ និងម្នាក់ទៀតឈ្មោះ រួម ចម្រើន អាយុ២៦ឆ្នាំ  របួសកដៃខាងឆ្វេងបែកហូរឈាម និងធ្វើឱ្យខូចខាតទ្រព្យសម្បត្តិក្នុងផ្ទះរបស់ជនរងគ្រោះរួមមាន៖ទូរទឹកកក១,ទូរសំលៀកបំពាក់១ និងកញ្ចក់ឆ្លុះមុខ១ ខូចខាតទាំងស្រុង។ ក្រោយពីឃាត់ខ្លួនជនសង្ស័យខាងលើ កម្លាំងជំនាញបាននិងកំពុងកសាងសំណុំរឿង ដើម្បីបញ្ជូនទៅកាន់ការិយាល័យជំនាញចាត់ការតាមនីតិវិធីច្បាប់៕    សម្រួលដោយ  ទៀង  បុណ្ណរី