កូរ៉េ​ខាងជើង​ប្រារព្ធថ្ងៃកំណើតប្រទេស ប្តេជ្ញារឹតចំណងមិត្តភាពជាមួយចិននិងរុស្ស៊ីឱ្យកាន់តែស៊ីជម្រៅ

មេដឹកនាំកូរ៉េខាងជើងលោក គីម ជុងអ៊ុន បានប្រារព្ធខួបនៃការបង្កើតប្រទេសកូរ៉េខាងជើង នៅថ្ងៃសៅរ៍ ទី៩ ខែកញ្ញានេះ ជាមួយនឹងក្បួនដង្ហែនៃក្រុមកងទ័ព ហើយប្តេជ្ញាថានឹងធ្វើឱ្យទំនាក់ទំនងជាមួយមហាយក្សចិន និងមហាអំណាចនុយក្លេអ៊ែររុស្ស៊ីកាន់តែស៊ីជម្រៅ…។  យោងតាមប្រព័ន្ធផ្សព្វផ្សាយរដ្ឋ KCNA បានឱ្យដឹងថា មេដឹកនាំកូរ៉េខាងជើង បានសម្លឹងមើលក្បួនដង្ហែនៅឯទីលាន Kim Il Sung ក្នុងទីក្រុងព្យុងយ៉ាង និងបានជួបពិភាក្សាជាមួយគណៈប្រតិភូចិនដែលកំពុងបំពេញទស្សនកិច្ចនៅទីនោះផងដែរ។ ទន្ទឹមនឹងនេះ ប្រធានាធិបតី​ចិនលោក ស៊ី ជីនពីង បាន​ផ្ញើ​លិខិត​មួយ​ដោយ​បង្ហាញ​ឆន្ទៈ​របស់​លោក​ក្នុង​ការ​ពង្រឹង​ទំនាក់ទំនង​យុទ្ធសាស្ត្រ និង​កិច្ចសហប្រតិបត្តិការ​កម្រិតខ្ពស់។ មិនត្រឹមតែប៉ុណ្ណោះ ប្រធានាធិបតីរុស្ស៊ីលោក វ្ល៉ាឌីមៀ ពូទីន ក៏បានផ្ញើលិខិតមួយច្បាប់ទៅលោក គីម ដោយបានប្តេជ្ញាថា ប្រទេសទាំងពីរនឹងពង្រីកទំនាក់ទំនងទ្វេភាគី ដើម្បីធានាសន្តិសុខ និងស្ថិរភាពនៅឧបទ្វីបកូរ៉េ និងអាស៊ីឦសាន។  មេដឹកនាំទីក្រុងព្យុងយ៉ាងរូបនេះត្រូវបានគេរំពឹងថានឹងធ្វើដំណើរទៅកាន់ប្រទេសរុស្ស៊ីក្នុងខែនេះ ដើម្បីជួបជាមួយលោក ពូទីន ដើម្បីពិភាក្សាអំពីការផ្គត់ផ្គង់សព្វាវុធដល់ទីក្រុងមូស្គូ ដើម្បីគាំទ្រការឈ្លានពានពេញទំហឹងរបស់រុស្ស៊ីលើអ៊ុយក្រែន។គួរបញ្ជាក់ថា កូរ៉េខាងជើងបានបន្ថែមកម្លាំងយោធាដ៏ច្រើនសន្ធឹកសន្ធាប់របស់ខ្លួន រួមជាមួយនឹងក្រុមប៉ារ៉ាយោធា យោធាបម្រុង និងកងសន្តិសុខជាច្រើនដូចជា កងឆ្មាំក្រហម(WPRG) ជាដើម៕    សម្រួលដោយ  ទៀង  បុណ្ណរី