ឥណ្ឌូណេស៊ីស្នើកម្ពុជា ពង្រឹងកិច្ចសហប្រតិបត្តិការប្រឆាំងការឆបោកតាមអ៊ីនធឺណិត
ជំនួបសម្តែងការគួរសមរវាងសម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា ជាមួយប្រធានាធិបតីនៃសាធារណរដ្ឋឥណ្ឌូណេស៊ី លោក ចូកូ វីដូដូ កាលពីថ្ងៃទី៤កញ្ញា នៅទីក្រុងហ្សាការតា។ នាជំនួបនោះ មេដឹកនាំវ័យក្មេងដែលពោរពេញដោយសមត្ថភាពរបស់កម្ពុជា និងលោក វីដូដូ បានពិភាក្សាលើប្រធានបទជាច្រើន រួមទាំងការពង្រឹងកិច្ចសហប្រតិបត្តិការលើវិស័យកសិកម្ម, ការបោកប្រាស់តាមប្រព័ន្ធអ៊ីនធឺណិត ឬការក្លែងបន្លំតាមប្រព័ន្ធអនឡាញ ក្រោយលេចធ្លាយព័ត៌មានពីជនរងគ្រោះ។ នេះបើយោងតាមក្រសួងការបរទេសឥណ្ឌូណេស៊ី ទម្លាយចេញ…។ ក្រសួងការបរទេសឥណ្ឌូណេស៊ី បានបង្ហាញថា មេដឹកនាំទាំង២ បានពិភាក្សាអំពីសារសំខាន់នៃការពង្រឹងកិច្ចសហប្រតិបត្តិការក្នុងការការពារពលរដ្ឋឥណ្ឌូណេស៊ី ជាពិសេស អ្នកដែលបានក្លាយជាជនរងគ្រោះនៃការបោកប្រាស់តាមអ៊ីនធឺណិត ឬការក្លែងបន្លំតាមអ៊ីនធឺណិត។ ភាគីកម្ពុជាមិនបានលើកឡើងអំពីបញ្ហានេះជាពិសេសក្នុងកំណត់ហេតុនៃកិច្ចប្រជុំនេះទេ ដោយគ្រាន់តែបង្ហាញថា ប្រមុខដឹកនាំប្រទេសទាំងពីរ បានពិភាក្សាអំពីការប្រយុទ្ធប្រឆាំងនឹងអំពើភេរវកម្ម និងឧក្រិដ្ឋកម្មឆ្លងដែន ហើយបាននិយាយអំពីសេដ្ឋកិច្ច និងអាជីវកម្ម។ សូមបញ្ជាក់ថា ក្នុងជំនួបកាលពីថ្ងៃទី៤កញ្ញា នៅវិមានប្រធានាធិបតីក្នុងទីក្រុងហ្សាការតា ប្រធានាធិបតីឥណ្ឌូណេស៊ី លោក ចូកូ វីដូដូ បានប្រាប់សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា ថា ចាប់ពីខែមករា ដល់ខែកក្កដាឆ្នាំនេះ ករណីពាក់ព័ន្ធនឹងពលរដ្ឋឥណ្ឌូណេស៊ីចំនួន៧៧៧នាក់ ត្រូវបានដោះស្រាយនៅក្នុងប្រទេសកម្ពុជា ក្នុងនោះ៥១៥នាក់ លើករណីពាក់ព័ន្ធនឹងការបោកប្រាស់តាមអ៊ីនធឺណិត។ លោក វីដូដូ បានសង្កត់ធ្ងន់លើសារសំខាន់នៃការពង្រឹងកិច្ចសហប្រតិបត្តិការក្នុងចំណោមស្ថាប័នអនុវត្តច្បាប់។ ទន្ទឹមនឹងនោះ រដ្ឋមន្ត្រីក្រសួងការបរទេស លោកស្រី រ៉េតណូ ម៉ាស៊ូឌី (Retno Marsudi) បាននិយាយនៅក្នុងសេចក្តីថ្លែងការណ៍បន្ទាប់ពីកិច្ចប្រជុំថា៖«នេះគឺជាកិច្ចសហប្រតិបត្តិការយុទ្ធសាស្ត្រ មិនត្រឹមតែទាក់ទងនឹងការនាំចូល និងការនាំចេញប៉ុណ្ណោះទេ ប៉ុន្តែថែមទាំងលើបញ្ហាសន្តិសុខស្បៀងផងដែរ»។ ជាងនេះទៅទៀត លោកស្រី រ៉េតណូ បានលើកឡើងក្នុងកិច្ចប្រជុំនោះថា អនុស្សរណៈនៃការយោគយល់គ្នា ស្តីពីកសិកម្មក៏ត្រូវបានចុះហត្ថលេខារវាងរដ្ឋមន្ត្រីកសិកម្មនៃប្រទេសទាំងពីរផងដែរ។ លោកស្រីបានបន្ថែមថា នៅក្នុងកិច្ចពិភាក្សា មេដឹកនាំនៃប្រទេសឥណ្ឌូណេស៊ី និងកម្ពុជា បាននិយាយអំពីការជំរុញកិច្ចសហប្រតិបត្តិការរវាងសហគ្រាសរដ្ឋ (BUMN) នៃប្រទេសទាំង២។ អង្គការសហប្រជាជាតិបានអះអាងថា មនុស្សរាប់សែននាក់នៅក្នុងតំបន់អាស៊ីអាគ្នេយ៍ កំពុងត្រូវបានក្រុមឧក្រិដ្ឋជនបង្ខិតបង្ខំឱ្យធ្វើសកម្មភាពបោកប្រាស់តាមអ៊ីនធឺណិត ដែលជារឿយៗស្ថិតនៅក្រោមការគំរាមកំហែង នៃការធ្វើទារុណកម្ម។ នេះបើតាមរបាយការណ៍មួយពីអង្គការសហប្រជាជាតិ ចេញផ្សាយនៅថ្ងៃអង្គារទី២៩សីហា ឆ្នាំ២០២៣។ ការប៉ាន់ស្មាននៅក្នុងប្រទេសកម្ពុជា អាចមានចំនួនប្រហែល១០ម៉ឺននាក់ ពាក់ព័ន្ធនឹងការបោកប្រាស់តាមអ៊ីនធឺណិត។ ចំណែកនៅប្រទេសឡាវ ហ្វីលីពីន និងថៃ ស្ថិតក្នុងចំណោមប្រជាជាតិផ្សេងទៀតនៅក្នុងតំបន់ ដែលត្រូវបានកំណត់ថា ជាប្រទេសគោលដៅសំខាន់ៗរបស់ឧក្រិដ្ឋជន។ អង្គការសហប្រជាជាតិនិយាយថា ការឆបោកសរុប គិតជាទឹកប្រាក់អាចមានដល់រាប់ពាន់លានដុល្លារក្នុងមួយឆ្នាំៗ។ ក្នុងនោះអ្នករងគ្រោះពីការឆបោកតាមអ៊ីធឺណិត អាចមានពីគ្រប់ទីកន្លែងដូចជា ចិនដីគោក ហុងកុង តៃវ៉ាន់ នៅអាស៊ីខាងត្បូង និងនៅប្រទេសផ្សេងទៀតមកពីអាហ្វ្រិក និងអាម៉េរិកឡាទីន ជាដើម។ ចំណែក ជនរងគ្រោះដែលត្រូវគេបង្ខំឱ្យធ្វើការឆបោកតាមអនឡាញ ភាគច្រើនជាបុរស បន្ទាប់មក គឺស្ត្រី និងសូម្បីតែយុវជនក៏ត្រូវបានគេបង្ខំដែរ។ ដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍ នៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស លោកស្រី ជូ ប៊ុនអេង ចាត់ទុករបាយការណ៍របស់អង្គការសហប្រជាជាតិ ធ្វើឡើងតាមអារម្មណ៍ ដោយពុំមានភាពច្បាស់លាស់។ លោកស្រីបានបញ្ជាក់ថា ក្រុមអ្នកជំនាញនឹងសាកសួរទៅអង្គការសហប្រជាជាតិអំពីរបាយការណ៍ខាងលើផងដែរ។ លោកស្រី ជូ ប៊ុនអេង បានលើកឡើងថា៖«យើងចង់ឃើញភស្តុតាងនៃមូលហេតុ ដែលពួកគេហ៊ាននិយាយថាមនុស្ស១សែននាក់ ជាជនរងគ្រោះនៅក្នុងកម្លាំងពលកម្មបោកប្រាស់ និងការជួញដូរមនុស្ស»។ ដោយឡែក ទីភ្នាក់ងារសារព័ត៌មាន Associated Press បានរាយការណ៍កាលពីថ្ងៃទី២៥ ខែកក្កដាថា ប៉ូលិសឥណ្ឌូណេស៊ីកំពុងស៊ើបអង្កេតការចោទប្រកាន់ពីការជួញដូរសរីរាង្គមនុស្សពាក់ព័ន្ធនឹងមន្ទីរពេទ្យកម្ពុជា។ ប៉ូលិស និងមន្ត្រីអន្តោប្រវេសន៍ត្រូវបានចោទប្រកាន់ថា បានជួយអ្នកជួញដូរបញ្ជូនជនជាតិឥណ្ឌូណេស៊ី១២២នាក់ឱ្យលក់ក្រលៀនរបស់ពួកគេ។ មនុស្ស១២នាក់ត្រូវបានចាប់ខ្លួន ប៉ូលិសកម្ពុជាត្រូវបានគេរាយការណ៍ថា កំពុងស៊ើបអង្កេតលើការចោទប្រកាន់នេះ…៕ សម្រួលដោយ ទៀង បុណ្ណរី
