ទឹកទន្លេសាប ហក់ឡើងក្រោយភ្លៀងធ្លាក់ជាប់ៗគ្នា

កំពង់ឆ្នាំង៖ ភ្លៀងនៅតែបន្តធ្លាក់ជាប់ៗគ្នាស្ទើរតែរាល់ល្ងាច ធ្វើឱ្យស្ថានភាពទឹកទន្លេសាប នៅស្ថានីយជលសាស្ត្រ ផ្សាក្រោម មានការកើនឡើងជាបន្តបន្ទាប់ ហើយការហក់ឡើងនៃទឹកទន្លេសាបនេះ ក៏បណ្ដាលឱ្យលិចកំណាត់ផ្លូវលំ ភូមិកណ្តាលដោត កន្លែងខ្លះដែលទាបៗ ធ្វើឱ្យពិបាកក្នុងការធ្វើដំណើរ ។  លោក ដោក ប៊ុនថុន ប្រធានមន្ទីរធនធានទឹក និងឧតុនិយម ខេត្តកំពង់ឆ្នាំង បានឱ្យដឹងថា បើគិតមកដល់ថ្ងៃទី៤ ខែកញ្ញា ឆ្នាំ២០​២​៣ នេះ ដោយសារបាតុភូតធម្មជាតិ បណ្តាលឱ្យភ្លៀង បានធ្លាក់ជាបន្តបន្ទាប់ រាល់ពេលរសៀល ពីមធ្យមមកខ្សោយ គឺភ្លៀងធ្លា​ក់​រាយប៉ាយ ពាសពេញខេត្ត បើទោះជាយ៉ាងនេះក្ដី ក៏នៅមិនទាន់បង្កឱ្យប៉ះពាល់លំនៅឋានបងប្អូនប្រជាពលរដ្ឋ ដីចម្ការ នៅតា​ម​ខ្នងចម្ការផ្សេងៗក្នុងខេត្ត រួមនឹងមនុស្ស ឬសត្វពាហនៈ នៅឡើយ។លោក ដោក ប៊ុនថុន បានឱ្យដឹងបន្តថា នៅថ្ងៃទី៤ ខែកញ្ញា ឆ្នាំ២០២៣នេះ សីតុណ្ហភាពមាន៣៤អ​ង្សា​​សេ ខណៈដែលកម្ពស់ទឹកទន្លេសាប នៅស្ថានីយជលសាស្ត្រផ្សារក្រោម ទឹកមានកម្ពស់៦,៧០ម៉ែត្រ បើធៀបនឹងឆ្នាំ២០​២​២​ ទឹកមានកម្ពស់៧,៧៦ម៉ែត្រ ក្នុងនោះទឹកទន្លេដែលត្រូវបានប្រកាសអាសន្ន មានកម្ពស់១១ម៉ែត្រ។  ជាមួយគ្នានេះ ឯកឧត្តម ស៊ុន សុវណ្ណារិទ្ធ អភិបាលខេត្តកំពង់ឆ្នាំង បានអំពាវនាវ ដល់បងប្អូនប្រជាពលរដ្ឋ ដែលមានលំនៅដ្ឋានតាមដងទន្លេសាប ក៏ដូចជាបងប្អូនប្រជាពលរដ្ឋដែលមានមុខរបរនេសាទ ដោយធ្វើដំណើរតាមដងទន្លេ សូមមានការប្រុងប្រយ័ត្នខ្ពស់ ពិសេសកូនតូចៗ កុំទុកពួកគេចោល ហើយត្រូវវិលចូលផ្ទះឱ្យបានមុនពេលភ្លៀងធ្លាក់ដែលវាអាចបង្កឡើង ទៅជាព្យុះ និងរលក ធ្វើឱ្យការធ្វើដំណើររបស់បងប្អូនប្រជាពលរដ្ឋ អាចជួបគ្រោះថ្នាក់ ជាយថាហេតុ៕    សម្រួលដោយ  ទៀង  បុណ្ណរី