រឿងដ៍គួរឲ្យចម្លែកមួយនៅក្នុងប្រទេសចិន! គ្រួសារមួយផ្លាស់មកទីក្រុង មិនចោលទម្លាប់រស់នៅជនបទ នាំយកគោមកចិញ្ចឹមលើផ្ទះ ផ្អើលអស់អ្នកជិតខាង
កសិករជនជាតិចិនម្នាក់ ដែលទើបផ្លាស់ទីលំនៅពីផ្ទះជនបទរបស់គាត់ មកអគារផ្ទះល្វែងក្នុងទីក្រុងក្នុងខេត្តស៊ីឈួន បានធ្វើឱ្យអ្នកជិតខាងថ្មីរបស់គាត់ភ្ញាក់ផ្អើល នៅពេលគាត់ចាប់ផ្តើមចិញ្ចឹមកូនគោចំនួន ៧ នៅលើយ៉រផ្ទះរបស់គាត់។ ពិតមែនហើយ រស់នៅជាន់ខាងលើនៃអគារលំនៅដ្ឋានក្នុងទីក្រុង ហើយភ្ញាក់ពីគេងពេលព្រឹក លឺសំឡេងរោទ៍នៃសត្វគោ និងក្លិនលាមក នោះគឺជាបទពិសោធន៍ដ៏គួរឱ្យភ្ញាក់ផ្អើលរបស់មនុស្សរាប់រយនាក់ នៅក្នុងខេត្ត Sichuan នៅពេលពួកគេបានរកឃើញថា អ្នកជិតខាងថ្មីបានចាប់ផ្តើមចិញ្ចឹមគោនៅលើយ៉រផ្ទះល្វែងតូចមួយជាន់ទី៥ របស់គាត់។ យោងតាមប្រភពព័ត៌មាន បានឲ្យដឹងថា ថ្មីៗនេះ គ្រួសារបុរសម្នាក់បានផ្លាស់ទីលំនៅពីភូមិមួយ ហើយបាននាំយកកូនគោចំនួន ៧ ក្បាល ដែលមានទម្ងន់ពី ១០ ទៅ ២០ គីឡូក្រាម មកជាមួយ ដើម្បីចិញ្ចឹមជាសត្វចិញ្ចឹម។ ដោយមានការរំខានដោយក្លិនស្អុយឥតឈប់ឈរ អ្នកស្រុកជាច្រើនបានទូរស័ព្ទទៅអាជ្ញាធរ ហើយសត្វទាំងនោះត្រូវបានយកចេញដោយបង្ខំ ពីលើផ្ទះថ្មីរបស់ពួកគេ។ យ៉ាងណាមិញ វីដេអូនៃកូនគោនៅលើយ៉រនៃអគារផ្ទះល្វែងនោះ បន្ទាប់ពីត្រូវបានបង្ហោះនៅលើ Douyin ដែលជាកំណែ TikTok ជាភាសាចិន ទទួលការចាប់អារម្មណ៍យ៉ាងខ្លាំង ជាមួយប្រតិកម្មភាគច្រើនបានលេងសើច។ ក្នុងនោះ អ្នកប្រើប្រាស់មួយចំនួនបាននិយាយថា អ្នករស់នៅក្នុងអគារផ្ទះល្វែងពិសេសនេះជាច្រើន មានរបៀបរស់តាមបែបតំបន់ជនបទដ៏ចម្លែក ដូចជាដាំបន្លែ និងការចិញ្ចឹមសត្វជាដើម។ ទាក់ទងរឿងដ៏ហួសចិត្តនេះ កាលពីខែមករា ប្រជាពលរដ្ឋមួយចំនួនដែលរស់នៅក្នុងអគារផ្ទះល្វែងដូចគ្នា បានត្អូញត្អែរថា មានម្ចាស់ផ្ទះជាច្រើនចិញ្ចឹមមាន់នៅក្នុងផ្ទះល្វែងរបស់ពួកគេ ដែលបង្កការរំខានយ៉ាងខ្លាំងដល់អ្នកជិតខាង៕ សម្រួលដោយ ទៀង បុណ្ណរី
