សម្ដេច ស ខេង អំពាវនាវពលរដ្ឋមានឈ្មោះក្នុងបញ្ជីបោះឆ្នោត សូមត្រៀមលក្ខណៈទៅបោះឆ្នោត
សម្ដេចក្រឡាហោម ស ខេង អនុប្រធានគណបក្សប្រជាជនកម្ពុជា បានអំពាវនាវដល់ប្រជាពលរដ្ឋមានឈ្មោះក្នុងបញ្ជីបោះឆ្នោត សូមត្រៀមលក្ខណៈអញ្ជើញទៅបោះឆ្នោត នៅថ្ងៃទី ២៣ ខែកក្កដា ឆ្នាំ ២០២៣ ខាងមុខនេះ ដើម្បីគាំទ្រការអនុវត្តលទ្ធិប្រជាធិបតេយ្យ ដែលចាក់គ្រឹះយ៉ាងរឹងមាំនៅកម្ពុជា។ ការអំពាវនាវនេះ ខណៈ សម្ដេចក្រឡាហោម ស ខេង បានអញ្ជើញចុះដឹកនាំយុទ្ធនាការឃោសនាបោះឆ្នោតនៅស្រុកព្រះស្ដេច ស្រុកពាមជរ ស្រុកកំពង់ត្របែក និងស្រុកមេសាង ខេត្តព្រៃវែង កាលពីថ្ងៃទី ១៦ ខែកក្កដា ឆ្នាំ ២០២៣។ សម្ដេចក្រឡាហោម ស ខេង អនុប្រធានគណបក្សប្រជាជនកម្ពុជា និងជាប្រធានក្រុមការងារគណបក្សចុះមូលដ្ឋានខេត្តព្រៃវែង និងខេត្តបាត់ដំបង បានអំពាវនាវដល់ សមាជិក សមាជិកា អ្នកគាំទ្រគណបក្សប្រជាជនកម្ពុជា ក្នុងស្រុកទាំង ៤ និងជារួមប្រជាពលរដ្ឋមានឈ្មោះក្នុងបញ្ជីឈ្មោះបោះឆ្នោត ត្រៀមលក្ខណៈអញ្ជើញទៅបោះឆ្នោត នាថ្ងៃទី ២៣ ខែកក្កដា ឆ្នាំ ២០២៣ ខាងមុខនេះ ដើម្បីគាំទ្រការអនុវត្តលទ្ធិប្រជាធិបតេយ្យដែលចាក់គ្រឹះយ៉ាងរឹងមាំនៅកម្ពុជា ចាប់ពីឆ្នាំ ១៩៩៣ ដូចមានចែងក្នុងរដ្ឋធម្មនុញ្ញ និងសូមបោះឆ្នោតគាំទ្រគណបក្សប្រជាជនកម្ពុជាមានលេខរៀងទី ១៨ ដើម្បីបន្តការដឹកនាំមាតុភូមិកម្ពុជា ឆ្ពោះទៅរកភាពរីកចម្រើនរុងរឿងបន្តទៀត។ ក្នុងនាមគណបក្សប្រជាជនកម្ពុជា សម្ដេចក្រឡាហោម បានថ្លែងអំណរគុណដល់ថ្នាក់ដឹកនាំ ក្រុមការងារគណបក្សចុះមូលដ្ឋាន ព្រមទាំងសមាជិក សមាជិកា និងប្រជាពលរដ្ឋស្រុកទាំង ៤ ដែលតែងផ្ដល់សេចក្ដីទុកចិត្ត បោះឆ្នោតគាំទ្រគណបក្សប្រជាជនកម្ពុជា ជាពិសេសបានរួមសុខ រួមទុក្ខជាមួយគ្នា តាំងពីក្រោយការដួលរំលំ នៃរបបខ្មែរក្រហម។ ជាមួយគ្នានេះ សម្ដេច ស ខេង ក៏បានថ្លែងអំណរគុណចំពោះប្រជាពលរដ្ឋទូទៅ ទោះបីមាននិន្នាការបែបណាក៏ដោយ ប៉ុន្តែមានគោលជំហរស្រលាញ់សុខសន្តិភាព និងបានចូលរួមគាំទ្រការដឹកនាំរបស់រាជរដ្ឋាភិបាលនីតិកាល ៦ ពីឆ្នាំ ២០១៨ ដល់ឆ្នាំ ២០២៣ ធ្វើឲ្យប្រទេសជាតិបន្តរក្សាបានសុខសន្តិភាព បូរណភាពទឹកដី អធិបតេយ្យភាពជាតិ ស្ថិរភាពនយោបាយ ការពាររបបរាជានិយម ធានាលំនឹងសេដ្ឋកិច្ច ពិសេសបង្ការ ទប់ស្កាត់បានប្រកបដោយប្រសិទ្ធភាពជំងឺកូវីដ-១៩៕ សម្រួលដោយ ទៀង បុណ្ណរី
