ជនរងគ្រោះនៅខេត្តរតនគិរី១០នាក់បានស្លា.ប់ ដោយសារពុលស្រា
ខេត្តរតនគិរី៖ គិតត្រឹមថ្ងៃទី៣ ខែកក្កដា ឆ្នាំ២០២៣ មានជនរងគ្រោះធ្វើការនៅក្រុមហ៊ុន ហ័ង អាញ អណ្តូងមាស ខេត្តរតនគិរីសរុបចំនួន១១នាក់ ក្នុងនោះ១០នាក់បានបាត់បង់ជីវិតដោយសារការពុលស្រា។ នេះបើយោងតាមសេចក្តីប្រកាសព័ត៌មានរបស់មន្ទីរការងារ និងបណ្ដុះបណ្ដាលវិជ្ជាជីវ: ខេត្តរតនគិរី។ សេចក្តីប្រកាសព័ត៌មានបានឱ្យដឹងថា បន្ទាប់ពីមន្ទីរបានទទួលដំណឹងអំពីករណីសង្ស័យពាក់ព័ន្ធនឹងការពុលស្រារបស់បងប្អូនកម្មករនិយោជិតធ្វើការនៅក្រុមហ៊ុន ហ័ង អាញ អណ្តូងមាស ស្ថិតនៅភូមិ៣ ឃុំស្រែអង្រ្គង ស្រុកកូនមុំ ខេត្តរតនគិរី កាលពីថ្ងៃទី២៨ ខែមិថុនា ឆ្នាំ២០២៣ មន្ទីរបានចុះត្រួតពិនិត្យ និងស្រាវជ្រាវករណីនេះភ្លាមៗ ដោយសហការបានជាមួយអាជ្ញាធរមានសមត្ថកិច្ច និងមន្ទីរសុខាភិបាលខេត្ត ព្រមទាំងបានណែនាំក្រុមហ៊ុនឱ្យចាត់វិធានការសុវត្ថិភាព និងសុខភាពការងារបន្ថែមជាបន្ទាន់ ដើម្បីបង្ការហានិភ័យដល់កម្មករនិយោជិតពាក់ព័ន្ធ។ លទ្ធផលជាផ្លូវការត្រូវបានបញ្ជាក់ដោយអង្គភាពជំនាញសុខាភិបាលថា ករណីដែលបានកើតឡើង ជាបន្តបន្ទាប់ខាងលើ គឺជាករណីពុលស្រាដែលត្រូវបានដាក់លក់នៅតាមទីតាំងក្បែរក្រុមហ៊ុន។ គិតត្រឹមថ្ងៃទី៣ ខែកក្កដា ឆ្នាំ២០២៣នេះ មានជនរងគ្រោះសរុបចំនួន១១នាក់ និងបានបាត់បង់ជីវិតចំនួន១០ នាក់ ក្នុងនោះ មានកម្មករនិយោជិតចំនួន០៥នាក់ បើទោះបីជាមានការខិតខំប្រឹងប្រែងជួយអន្តរាគមន៍សង្គ្រោះពីគ្រប់អាជ្ញាធរមានសមត្ថកិច្ច និងអង្គភាពពាក់ព័ន្ធ។ ជាមួយគ្នានេះដែរ មន្ទីរការងារ និងបណ្តុះបណ្តាលវិជ្ជាជីវៈ នឹងសហការជាមួយបេឡាជាតិសន្តិសុខសង្គម ដើម្បីបន្តជួយដោះស្រាយទុក្ខលំបាករបស់បងប្អូនកម្មករនិយោជិតរងគ្រោះ និងក្រុមគ្រួសារ ទៅតាមច្បាប់ស្តីពីរបបសន្តិសុខសង្គមផងដែរ៕ សម្រួលដោយ ទៀង បុណ្ណរី
