ប៉ាល់ ឆរស្មី ជាកីឡាការិនីខ្មែរតែម្នាក់ដែលទទួលបានប្រាក់រង្វាន់ច្រើនជាងគេនៅព្រឹត្តិការណ៍ស៊ីហ្គេម
កីឡាការិនីវ៉ូវីណាម ប៉ាល់ ឆរស្មី គឺកីឡាការិនីកម្ពុជាតែម្នាក់គត់ដែលបានឈ្នះមេដាយច្រើនជាងគេរហូតដល់៦គ្រឿង នឹងទទួលបានប្រាក់រង្វាន់ច្រើនជាងគេផងដែរ អំឡុងការប្រកួតនៅព្រឹត្តិការណ៍កីឡាស៊ីហ្គេមលើកទី៣២នៅកម្ពុជា។ នៅក្នុងពិធីប្រគល់ប្រាក់រង្វាន់ដល់ជ័យលាភីមេដាយស៊ីហ្គេម លើកទី៣២ និងកីឡាអាស៊ានប៉ារ៉ាហ្គេម លើកទី១២ ក្រោមអធិបតីភាពសម្តេចពិជ័យសេនា ទៀ បាញ់ រដ្ឋមន្ត្រីក្រសួងការពារជាតិ នាថ្ងៃទី២៧ ខែមិថុនា ឆ្នាំ២០២៣ កីឡាការិនីឆ្នើម ប៉ាល់ ឆរស្មី ទទួលបានប្រាក់រង្វាន់ចំនួន ២០៦លានរៀល (ប្រមាណ ៥ ១៥០០ដុល្លារ) បន្ទាប់ពីបានឈ្នះមេដាយមាស៤គ្រឿង ប្រាក់១គ្រឿង និងសំរិទ្ធ១គ្រឿង ក្នុងព្រឹត្តិការណ៍កីឡាស៊ីហ្គេមលើកទី៣២។ នៅក្នុងការប្រកួតកីឡាការិនីរូបនេះធ្វើបានយ៉ាងល្អ ដោយជាប់ឈ្មោះជាកីឡាការិនីឆ្នើមដែលទទួលបានមេដាយច្រើនជាងគេគឺមេដាយមាស២គ្រឿងលើវិញ្ញាសាឯកត្តជន មេដាយមាស២គ្រឿងទៀតលើវិញ្ញាសាក្រុម ហើយទទួលបានមេដាយប្រាក់១គ្រឿងលើវិញ្ញាសាក្រុម និងមេដាយសំរិទ្ធ១គ្រឿងលើវិញ្ញាសាឯកត្តជន។ យោងតាមអនុក្រឹត្យ ប្រាក់រង្វាន់របស់រាជរដ្ឋាភិបាលចែកជូនម្ចាស់មេដាយគឺមេដាយមាសទទួលបាន ៤០លានរៀល មេដាយប្រាក់ ៣០លានរៀល និងមេដាយសំរឹទ្ធ១៦លានរៀល៕ សម្រួលដោយ ទៀង បុណ្ណរី
