បើកម៉ូតូខ្វះការប្រុងប្រយ័ត្ន ជ្រុលទៅប៉ះកៀរកង់នៅពីមុខ បណ្ដាលឱ្យរងរបួសទាំងសងខាង

ព្រៃវែង៖ ករណីគ្រោះថ្នាក់ចរាចរណ៍មួយបានកើតឡើងរវាងម៉ូតូ និងកង់ បណ្តាលឲ្យរងរបួសទាំងសងខាង ខណៈអ្នកបើកម៉ូតូខ្វះការប្រុងប្រយ័ត្ន ទៅប៉ះកៀរកង់នៅពីមុខក្នុងទិសដៅស្របទិសគ្នាពីលិចទៅកើត ។  ហេតុការណ៍នេះ បានកើតឡើងនៅវេលាម៉ោង ១១ និង ៣០នាទី ថ្ងៃទី២៣ ខែមិថុនា ឆ្នាំ២០២៣ នៅចំណុចលើផ្លូវកៅស៊ូ ភូមិក្រសាំងទង ឃុំអង្គរាជ្យ ស្រុកព្រះស្តេច ខេត្តព្រៃវែង ។  ជនរងគ្រោះទី១.ឈ្មោះ រឿន សុនុត ភេទប្រុស អាយុ ១៤ឆ្នាំ, ទី២.ឈ្មោះ វុន សាវ៉ាន ភេទប្រុស អាយុ ០៨ឆ្នាំ, ទី៣.ឈ្មោះ អាំ ស្រីយ៉ា អាយុ ០៩ឆ្នាំ ភេទស្រី អ្នកទាំងបី រស់នៅភូមិសំនយ ឃុំសេនារាជឧត្តម ស្រុកព្រះស្តេច ។   គួរបញ្ជាក់ថា នៅមុនពេលកើតហេតុ មានម៉ូតូម៉ាក HONDA WAVE ពណ៌ខ្មៅ ពាក់ស្លាកលេខ ព្រៃវែង 1U .3563 បើកដោយឈ្មោះ រឿន នុត ភេទស្រី បានរួមដំណើរជាមួយឈ្មោះ វុន សាវន បើកបរពីទិសដៅខាងលិចទៅទិសខាងកើត មកដល់ចំណុចកើតហេតុខាងលើ បានប៉ះកៀរកង់ ១គ្រឿង ពណ៌ក្រហម ជិះដោយឈ្មោះ អាំ ស្រីយ៉ា ភេទស្រី បើកបរពីកើតទៅលិច បណ្ដាលឱ្យដួលរងរបួសទាំងសងខាង ។  បច្ចុប្បន្នជនរងគ្រោះ ត្រូវបានបញ្ជូនទៅសម្រាកព្យាបាលនៅមន្ទីរពេទ្យបង្អែកស្រុកព្រះស្តេច ។ រីឯវត្ថុតាងមានម៉ូតូ និងកង់ យកមករក្សាទុកនៅប៉ុស្តិ៍នគរបាលរដ្ឋបាលអង្គរាជ្យ ៕   សម្រួលដោយ  ទៀង  បុណ្ណរី