ជនជាតិអាម៉េរិកាំងម្នាក់ ព្យាយាមជួយជ្រោមជ្រែងយុវតីខ្មែរម្នាក់ទទួលបានសញ្ជាតិអាម៉េរិក
រាជធានីភ្នំពេញ៖ លោក ចន វីលីស (John Willis) ដែលជាជនជាតិអាម៉េរិកម្នាក់ បាននឹងកំពុងព្យាយាមជួយកូនស្រីចិញ្ចឹមស្របច្បាប់ជាជនជាតិខ្មែរម្នាក់របស់ខ្លួន ក្នុងការទទួលបានសញ្ជាតិអាម៉េរិក បន្ទាប់ពីរូបលោក បានចិញ្ចឹមបីបាច់ថែរក្សានាងតាំងពីនាងមានអាយុ៥ឆ្នាំ តាមសំណើរបស់គ្រួសារក្រីក្ររបស់នាង។ កូនស្រីចិញ្ចឹមរបស់លោកមានឈ្មោះ វណ្ណា វីលីស មានសិទ្ធិដាក់ពាក្យសុំសញ្ជាតិអាម៉េរិក តាមរយៈដំណើរការពិសេសមួយហៅថា N-600K សម្រាប់គ្រួសារជនជាតិអាម៉េរិក ដែលរស់នៅក្រៅប្រទេសជាអចិន្ត្រៃយ៍។ បន្ទាប់ពីធ្វើការជាមួយគ្នាទៅវិញទៅមកអស់រយៈពេលជាងប្រាំឆ្នាំ អង្គភាពសេវាកម្មសញ្ជាតិ និងអន្តោប្រវេសន៍សហរដ្ឋអាម៉េរិក (USCIS) បានសម្រេចចិត្តយកដំណើរការកិច្ចការងារនេះទៅជំហានចុងក្រោយ ហើយអញ្ជើញ វណ្ណា មកសហរដ្ឋអាម៉េរិក ដើម្បីទទួលការសម្ភាសន៍។ ខណៈពេលដែល USCIS មានសិទ្ធិអំណាចក្នុងការផ្តល់សញ្ជាតិ ស្ថានទូតនៅភ្នំពេញមានអំណាចក្នុងការផ្តល់ ឬបដិសេធទិដ្ឋាការដល់ពលរដ្ឋកម្ពុជា។ ក្នុងន័យនេះ ស្ថានទូត គឺជាអ្នកយាមច្រកទ្វារនៃដំណើររបស់នាង ពោលគឺអាចកំណត់ជោគវាសនារបស់វណ្ណា ជាមួយនិងសញ្ជាតិអាម៉េរិករបស់នាង។ កូនស្រីចិញ្ចឹមលោក ចន វីលីស គឺយុវតី វណ្ណា វីលីស អាចនឹងក្លាយជាពលរដ្ឋអាម៉េរិកនៅសប្ដាហ៍ក្រោយ ប៉ុន្តែស្ថានទូតអាមេរិកកំពុងរារាំងនាងដោយបំពេញការងារចាកឆ្ងាយចេញពីសៀវភៅណែនាំកិច្ចការបរទេសរបស់ពួកគេ។ លោកថា «អង្គភាពសេវាកម្មសញ្ជាតិ និងអន្តោប្រវេសន៍សហរដ្ឋអាម៉េរិក (USCIS) បានអញ្ជើញ វណ្ណា មកសហរដ្ឋអាម៉េរិក ដើម្បីធ្វើការសម្ភាសន៍សុំសញ្ជាតិ។ បញ្ហាគឺនៅត្រង់ថា នាងត្រូវតែធ្វើវាឥឡូវនេះ មុនពេលនាងមានអាយុ១៨ឆ្នាំ នៅសប្តាហ៍ក្រោយ បើមិនដូច្នោះទេ នាងនឹងបាត់បង់ឱកាសនេះជារៀងរហូត»។ លោកបន្តថា វណ្ណា បានត្រៀមខ្លួនរួចរាល់ ដើម្បីឡើងយន្តហោះជាមួយឪពុករបស់ខ្លួន ធ្វើដំណើរដ៏វែងឆ្ងាយទៅសហរដ្ឋអាមេរិក។ ប៉ុន្តែរឿងតែមួយគត់ដែលរារាំងនាងនោះ គឺការបដិសេធរបស់ស្ថានទូតអាម៉េរិក ក្នុងការផ្តល់ទិដ្ឋាការដល់នាង ដែលនាងត្រូវការសម្រាប់ចូលក្នុងទឹកដីសហរដ្ឋអាម៉េរិក ហើយចូលរួមការសម្ភាសន៍យកសញ្ជាតិរបស់នាងជាមួយ USCIS ដែលជាទីភ្នាក់ងារផ្សេងមួយទៀតរបស់រដ្ឋាភិបាលសហរដ្ឋអាម៉េរិក។ ប្រសិនបើស្ថានទូតមានការយោគយល់ ហើយអនុញ្ញាតឱ្យនាងទៅទស្សនកិច្ចនៅសហរដ្ឋអាម៉េរិក ចននិយាយថា លោកនឹងនាំវណ្ណាទៅជួបឪពុកម្តាយចិញ្ចឹមចាស់ជរារបស់នាងដោយផ្ទាល់ ទៅធ្វើទស្សនកិច្ចនៅតាមសាកលវិទ្យាល័យនានា ហើយបន្ទាប់មកត្រឡប់មកប្រទេសកម្ពុជាវិញ។ ដោយសារនាងនៅសល់ពេលមួយឆ្នាំទៀត ដើម្បីបញ្ចប់វិទ្យាល័យក្នុងប្រទេសកម្ពុជា វណ្ណាចង់ទៅមើលមហាវិទ្យាល័យដែលនាងចង់ចូលរៀននៅឆ្នាំក្រោយ ដើម្បីបន្តក្ដីសុបិនចង់ក្លាយជាសត្តវិទូម្នាក់។ មន្ត្រីកុងស៊ុលនៅស្ថានទូតអាម៉េរិកជុំវិញពិភពលោក តែងអនុវត្តតាមសៀវភៅណែនាំកិច្ចការបរទេសក្នុងការសម្រេចចិត្តថា តើត្រូវផ្តល់ទិដ្ឋាការឬអត់។ ជាទូទៅ អ្នកដាក់ពាក្យសុំទិដ្ឋាការសម្រាប់ទៅទស្សនកិច្ច ត្រូវតែបង្ហាញថាពួកគេមិនមានបំណងស្នាក់នៅជាអចិន្ត្រៃយ៍ក្នុងសហរដ្ឋអាម៉េរិកតាមទិដ្ឋាការនោះឡើយ។ ប៉ុន្តែយោងតាមសៀវភៅណែនាំកិច្ចការបរទេស កុមារដែលឪពុកម្តាយរស់នៅក្រៅសហរដ្ឋអាម៉េរិក ហើយមានបំណងបន្តធ្វើដូច្នេះទៀត ត្រូវបានគេសន្មត់ថា មិនមានបំណងធ្វើអន្តោប្រវេសន៍ភ្លាមៗទៅកាន់សហរដ្ឋអាម៉េរិកនោះទេ ដូច្នេះហើយគួរតែត្រូវបានចេញទិដ្ឋាការដើម្បីចូលរួមការសម្ភាស N600K ។ លោក ចន និយាយថា គ្មានផ្លូវទេដែលវណ្ណាមិនត្រលប់មកវិញ បន្ទាប់ពីដំណើរទស្សនកិច្ចរបស់ពួកគេទៅសហរដ្ឋអាមេរិកនោះ។ វណ្ណាពឹងផ្អែកទាំងស្រុងលើគាត់ ហើយបើចនទៅណា នាងក៏ទៅទីនោះដែរ។ លោក ចន បាននិយាយថា «ពួកគេមិនទាន់បានសម្ភាសខ្ញុំ ឬមើលភស្តុតាងទាំងអស់ ដែលពួកយើងបានដាក់ទៅ ដែលបង្ហាញថាយើងនឹងត្រលប់មកវិញបន្ទាប់ពីការធ្វើដំណើរនេះទេ»។ ក្ដីស្រមៃរបស់វណ្ណា ក្នុងការក្លាយជាសត្តវិទូម្នាក់ ត្រូវបានបំផុសគំនិតដោយ Suwanna Gauntlett ដែលជានាយកប្រតិបត្តិ និងជាស្ថាបនិកនៃអង្គការសម្ព័ន្ធមិត្តសត្វព្រៃ ដែលចនបានធ្វើការអស់រយៈពេល១១ឆ្នាំកន្លងមក ហើយមានតួនាទីជានាយកប្រចាំប្រទេស។ អង្គការសម្ព័ន្ធមិត្តសត្វព្រៃតែងជួយសង្គ្រោះសត្វ ពីការជួញដូរសត្វព្រៃខុសច្បាប់ តែងការពារព្រៃឈើកម្ពុជា និងផ្តល់ការចិញ្ចឹមជីវិតដល់ប្រជាជនក្រីក្រដែលរស់នៅក្បែរតំបន់ព្រៃភ្នំ….៕ សម្រួលដោយ ទៀង បុណ្ណរី
