ព្រះចៅអធិរាជជប៉ុន បំពេញទស្សនកិច្ចផ្លូវរដ្ឋលើកដំបូងរបស់ព្រះអង្គ ចាប់តាំងពីឡើងគ្រងរាជ្យក្នុងឆ្នាំ២០១៩
ព្រះចៅអធិរាជជប៉ុនណារ៉ូហ៊ីតូ Naruhito បានជួបជាមួយប្រធានាធិបតីឥណ្ឌូណេស៊ី លោក ចូកូ វីដូដូ (Joko Widodo) នៅថ្ងៃចន្ទទី១៩ ខែមិថុនា ក្នុងដំណើរបំពេញទស្សនកិច្ចផ្លូវរដ្ឋលើកដំបូងរបស់ព្រះអង្គ ចាប់តាំងពីឡើងគ្រងរាជ្យក្នុងឆ្នាំ២០១៩។ ក្នុងដំណើរទស្សនកិច្ចចាប់ពីថ្ងៃទី១៧ ដល់ថ្ងៃទី២៣ ខែមិថុនារបស់ព្រះចៅអធិរាជ ណារ៉ូហ៊ីតូ Naruhito និងព្រះអគ្គមហេសីម៉ាសាកុMasako ទៅកាន់ប្រទេសសេដ្ឋកិច្ចដ៏ធំបំផុតរបស់អាស៊ីអាគ្នេយ៍បានកើតឡើងបន្ទាប់ពីលោក វីដូដូ អញ្ជើញទ្រង់ក្នុងអំឡុងពេលធ្វើដំណើរទៅកាន់ទីក្រុងតូក្យូកាលពីឆ្នាំមុន។ ព្រះអង្គ និងព្រះអគ្គមហេសី បានមកដល់វិមានប្រធានាធិបតីមួយនៅខាងត្បូងរដ្ឋធានីហ្សាការតា ដែលនៅអមដោយសំឡេងប្រជាជនកងរំពងស្រែកជូនពរព្រះអង្គថា «សូមស្វាគមន៍មកកាន់ឥណ្ឌូណេស៊ី!» និងក្រុមដើរក្បួនដែលលេងភ្លេងជាតិជប៉ុន។ នៅមុនដំណើរទស្សនកិច្ចនេះ ព្រះចៅអធិរាជបានសម្តែងក្ដីសង្ឃឹមថា ដំណើរទស្សនកិច្ចរបស់ទ្រង់នឹង «រឹតបន្តឹង» នូវទំនាក់ទំនងរបស់ប្រទេស ដែលទ្រង់បានមានបន្ទូលថាឆ្លងកាត់រយៈពេលដ៏លំបាក ដែលសំដៅទៅលើការកាន់កាប់របស់ជប៉ុនលើឥណ្ឌូណេស៊ីក្នុងអំឡុងសង្គ្រាមលោកលើកទីពីរ។ ទ្រង់បានមានព្រះបន្ទូលបន្តទៀតថា៖ «វាមានសារសំខាន់ណាស់ក្នុងការចងចាំអ្នកដែលបានបាត់បង់ជីវិត ស្វែងយល់ឱ្យស៊ីជម្រៅអំពីប្រវត្តិសាស្ត្រអតីតកាល និងបណ្តុះសេចក្ដីស្រឡាញ់សម្រាប់សន្តិភាព»។ បន្ថែមពីនោះ ព្រះចៅអធិរាជមានបន្ទូលថា ទ្រង់សង្ឃឹមថា ដំណើរទស្សនកិច្ចនេះ ជំរុញឱ្យមានការចូលរួមកាន់តែច្រើនក្នុងចំណោមយុវជនឥណ្ឌូណេស៊ី និងជប៉ុន ដោយលើកឡើងថា ទ្រង់ និងព្រះអគ្គមហេសីទន្ទឹងរង់ចាំស្វែងយល់បន្ថែមអំពីប្រទេសនេះ។ លោក វីដូដូ បានប្រាប់អ្នកយកព័ត៌មានមុនពេលទទួលទានអាហារថ្ងៃត្រង់ផ្លូវការថា៖ «ដំណើរទស្សនកិច្ចរបស់ព្រះចៅអធិរាជ និងព្រះអគ្គមហេសី ទៅកាន់ប្រទេសឥណ្ឌូណេស៊ីបានពង្រឹងបន្ថែមទៀតនូវមិត្តភាពរវាងប្រជាជនរបស់យើង។ មូលដ្ឋានគ្រឹះដ៏រឹងមាំបែបនេះគឺចាំបាច់សម្រាប់ការអភិវឌ្ឍភាពជាដៃគូយុទ្ធសាស្ត្ររវាងប្រទេសយើងទាំងពីរ ជាពិសេសក្នុងវិស័យសេដ្ឋកិច្ច»។ ទីក្រុងតូក្យូ និងហ្សាការតា បានផ្លាស់ប្ដូរដើម្បីជំរុញទំនាក់ទំនងក្នុងប៉ុន្មានឆ្នាំថ្មីៗនេះ ដោយមន្ត្រីជប៉ុនបានលើកឡើងពីសារសំខាន់នៃសេដ្ឋកិច្ចដែលកំពុងរីកចម្រើនរបស់ប្រទេសឥណ្ឌូណេស៊ី និងទីតាំងយុទ្ធសាស្ត្ររបស់ខ្លួននៅជិតផ្លូវដឹកជញ្ជូនសកល។ ជប៉ុនបានគ្រប់គ្រងប្រទេសឥណ្ឌូណេស៊ីពីឆ្នាំ១៩៤២ អស់រយៈពេលជាង៣ឆ្នាំ។ ការចុះចាញ់របស់ទីក្រុងតូក្យូក្នុងសង្គ្រាមលោកលើកទី២ ត្រូវបានបន្តដោយការបះបោរប្រដាប់អាវុធប្រឆាំងនឹងការគ្រប់គ្រងរបស់ហូឡង់ និងឯករាជ្យភាពរបស់ឥណ្ឌូណេស៊ី។ នៅថ្ងៃអង្គារ ព្រះចៅអធិរាជ និងព្រះអគ្គមហេសី នឹងយាងទតទីបញ្ចុះសពយោធាក្នុងទីក្រុងហ្សាកាតា ជាកន្លែងដែលអតីតទាហានជប៉ុន២៨នាក់ បានស្នាក់នៅ និងប្រយុទ្ធក្នុងសង្គ្រាមឯករាជ្យឥណ្ឌូណេស៊ីឆ្នាំ១៩៤៥ ដល់១៩៤៩ ត្រូវបានបញ្ចុះ។ ទ្រង់ទាំង២ព្រះអង្គ ក៏នឹងទៅទតរថភ្លើងល្បឿនលឿន (MRT) ថ្មីមួយនៅទីក្រុងហ្សាកាតា ដែលត្រូវបានសាងសង់ឡើងដោយជំនួយរបស់ជប៉ុន និងស្ថានីយបូមទឹកដែលឧបត្ថម្ភដោយទីក្រុងតូក្យូ ដែលការពារទឹកជំនន់។ ព្រះចៅអធិរាជ និងព្រះអគ្គមហេសី បានបន្តមុខងារសាធារណៈជាបន្តបន្ទាប់បន្ទាប់ពីខកខានអំឡុងពេលការរាតត្បាតជំងឺកូវីដ-១៩។ កាលពីឆ្នាំមុន ទ្រង់ទាំង ២ ព្រះអង្គបានធ្វើដំណើរទៅក្រៅប្រទេសជាលើកដំបូងចាប់តាំងពីការឡើងសោយរាជ្យ ដើម្បីចូលរួមពិធីបុណ្យព្រះសពរបស់ម្ចាស់ក្សត្រី Elizabeth II នៅទីក្រុងឡុងដ៍។ ព្រះចៅអធិរាជ ជប៉ុនមុនៗបានយាងទៅប្រទេសឥណ្ឌូណេស៊ីក្នុងឆ្នាំ ១៩៦២ និង ១៩៩១៕ សម្រយលដោយ ទៀង បុណ្ណរី
