ស្តែងណាស់..! ក្របីឡើង-ក រត់ចូលផ្សារត្រីវ័ធមនុស្ស៤នាក់របួសធ្ងន់ និងពីរនាក់របួសស្រាល

ក្រុងប៉ោយប៉ែត៖ នៅព្រឹកថ្ងៃទី១២ ខែមិថុនា ឆ្នាំ២០២៣នេះ សត្វក្របីឡើង-កមួយក្បាលបានរត់ចូលទៅក្នុងផ្សារត្រី ស្ថិតនៅភូមិក្បាលស្ពានពីរ សង្កាត់អូរជ្រៅ ក្រុងប៉ោយប៉ែត និងបានវ័ធប្រជាពលរដ្ឋដែលធ្វើដំណើរចេញចូលផ្សារ បណ្តាលឱ្យមនុស្ស៦នាក់រងរបួស ក្នុងមនុស្ស៤នាក់រងរបួសធ្ងន់…។   លោក តាំង លីហេង សមាជិកក្រុមប្រឹក្សាសង្កាត់អូរជ្រៅបានថ្លែងប្រាប់ភ្នាក់ងារ ធី អិន អឹម  ថា សត្វក្របីឡើង-កមួយក្បាល បានរត់ជល់មនុស្សម្នាដែលកំពុងជិះម៉ូតូចូលទិញម្ហូបនៅផ្សារត្រី ឬផ្សារលក់បន្ថែសាច់ ដោយបានរត់ជល់អ្នកជិះម៉ូតូឌុបគ្នា២នាក់ពីក្រោយបណ្តាលឱ្យដួល និងបានវ័ធស្នែងត្រូវនារីម្នាក់រងរបួសធ្ងន់ ត្រូវបានប្រជាពលរដ្ឋដឹកយកទៅមន្ទីរពេទ្យសង្គ្រោះអាយុជីវិតភ្លាមៗ។ ក្រោយមកក្របីនោះ បានរត់ទៅវ័ធប្រជាពលរដ្ឋ៤នាក់ផ្សេងទៀតឱ្យរងរបួសបន្ថែម ពោលគឺរបួសធ្ងន់៤នាក់(ស្ត្រី៣នាក់ត្រូវបានដឹកយកទៅសង្គ្រោះភ្លាមៗនៅឯមន្ទីពេទ្យបង្អែកក្រុងប៉ោយប៉ែត។   និងពលរដ្ឋ២នាក់រងរបួសស្រាលៗ។  លោក តាំង លីហេង បានបញ្ជាក់បន្ថែមថា ក្រោយក្របីឈ្មោលឡើង-កមួយក្បាលនេះវ័ធប្រជាពលរដ្ឋរបួសធ្ងន់ ភ្លាមៗកម្លាំងនគរបាល និងកម្លាំងកងរាជអាវុធហត្ថ រួមជាមួយប្រជាពលរដ្ឋនៅក្បែរនោះ បាននាំគ្នាដេញទាក់ចាប់ជាង២ម៉ោងទើបចាប់បាន ដោយបុរសម្នាក់ដឹងក្បួនពីវិធីចាប់ និងបានប្រើវិធីដើរលបៗទៅជិតលូកពង និងអង្អែលក្បាលយកខ្សែទាក-ក ចងជើងទាំង៤ដឹកមកទុកនៅអធិការដ្ឋាននគរបាលក្រុងប៉ោយប៉ែតរង់ចាំចូលខ្លួនមកដោះស្រាយ និងទទួលខុសត្រូវចំពោះមុខច្បាប់ ខណៈអាជ្ញាធរកំពុងស្រាវជ្រាវរកម្ចាស់ក្របីនេះហើយដែរ…៕  សម្រួលដោយ  ទៀង  បុណ្ណរី