ស្ពានដែលកំពុងសាងសង់បានបាក់ជាលើកទី២ក្នុងមួយឆ្នាំនៅភាគខាងកើតប្រទេសឥណ្ឌា
ស្ពានព្យួរមួយដែលកំពុងត្រូវបានសាងសង់នៅក្នុងរដ្ឋក្រីក្របំផុតរបស់ប្រទេសឥណ្ឌាបានបាក់ជាលើកទីពីរក្នុងរយៈពេល ១៤ ខែដោយមានមនុស្សម្នាក់បានរាយការណ៍ថាបានបាត់ខ្លួន នេះបើតាមសារព័ត៌មាន ANI បានរាយការណ៍កាលពីថ្ងៃចន្ទទី ៥ ខែមិថុនា។ ស្ពាននេះកំពុងត្រូវបានសាងសង់នៅលើទន្លេ Ganges ក្នុងទីក្រុង Bhagalpur នៃរដ្ឋ Bihar ភាគខាងកើតនៃប្រទេសឥណ្ឌា។ ការសាងសង់គ្រោងនឹងបញ្ចប់នៅឆ្នាំ ២០១៩ ប៉ុន្តែប្រឈមនឹងការពន្យារពេលជាច្រើន រួមទាំងការបាក់កាលពីមុនថ្ងៃទី ៣០ ខែមេសាឆ្នាំមុន ដោយសារខ្យល់បក់ខ្លាំង និងភ្លៀង។ ANI បានឱ្យដឹងថា បុរសប្រាំបីនាក់បាននៅលើស្ពាននៅពេលមានការដួលរលំរបស់វាកាលពីថ្ងៃអាទិត្យទី ៤ ខែមិថុនា ដោយមានអ្នកយាមម្នាក់រាយការណ៍ថាបានបាត់ខ្លួន។ គ្មានអ្នកស្លាប់ និងរបួសត្រូវបានរាយការណ៍នោះឡើយ ខណៈមិនមានចលនាមនុស្ស ឬយានជំនិះនៅលើស្ពាន។ ប្រមុខរដ្ឋ Bihar លោក Nitish Kumar បាននិយាយទៅកាន់អ្នកសារព័ត៌មានកាលពីថ្ងៃច័ន្ទ ដោយបានសន្យាថា សកម្មភាពដ៏តឹងរឹងលើឧប្បត្តិហេតុនេះ។ លោកបានបន្តថា៖ «វាមិនត្រូវបានសាងសង់ត្រឹមត្រូវនោះទេដែលជាមូលហេតុដែលវាបាក់។វាគួរតែត្រូវបានធ្វើឱ្យកាន់តែរឹងមាំ»។ លោកក៏បានបញ្ជាឱ្យស៊ើបអង្កេតលើករណីនេះផងដែរ។ ហេដ្ឋារចនាសម្ព័ន្ធរបស់ប្រទេសឥណ្ឌាត្រូវបានចាត់ទុកថាមានហនិភ័យខ្ពស់ជាយូរមកហើយដោយការព្រួយបារម្ភអំពីសុវត្ថិភាព ដែលពេលខ្លះនាំឱ្យមានគ្រោះមហន្តរាយធំៗនៅលើផ្លូវហាយវ៉េ និងស្ពាន។ អ្នកសាងសង់តែងតែប្រើប្រាស់សម្ភារៈសំណង់ដែលមានគុណភាពអន់ដើម្បីកាត់បន្ថយការចំណាយ។ កាលពីខែតុលា ឆ្នាំមុន ស្ពានព្យួរសម័យអាណានិគមមួយបានបាក់នៅក្រុង Morbi ក្នុងរដ្ឋ Gujarat ភាគខាងលិចបានបាក់ ដោយបានបាក់ចូលទៅក្នុងទន្លេ Machchhu និងបានសម្លាប់មនុស្ស ១៣៥នាក់។ លើសពីនោះ កាលពីថ្ងៃទី ២ ខែមិថុនាកន្លងទៅ ប្រទេសមានប្រជាជនច្រើនសន្ធឹកមួយនេះបានជួបឧប្បត្តិហេតុផ្លូវដែក ដ៏សាហាវបំផុតរបស់ប្រទេសក្នុងរយៈពេលជាង២ទសវត្សរ៍ ដែលបានបណ្តាលអោយមនុស្ស ២៧៥ នាក់ស្លាប់។ ការបាក់ស្ពានចុងក្រោយបង្អស់នេះត្រូវបានគណបក្ស Bharatiya Janata ដែលជាគណបក្សប្រឆាំងក្នុងរដ្ឋរិះគន់លើគណបក្សកាន់អំណាចផងដែរ។ អ្នកនាំពាក្យគណបក្សប្រឆាំង លោក Shehzad Poonwalla បានពណ៌នាថាវាជា«ស្ពាននៃអំពើពុករលួយ»។ គួរបញ្ជាក់ថា ការសាងសង់ស្ពានប្រវែង ៣,៦ គីឡូម៉ែត្រ បានចាប់ផ្តើមនៅក្នុង ២០១៤ ប៉ុន្តែវាបានរងការពន្យារពេល ហើយគ្រោងនឹងសម្ពោធនៅចុងឆ្នាំនេះ ដែលតភ្ជាប់ទីក្រុង Bhagalpur ជាមួយទីក្រុង Khagaria ដែលមានចម្ងាយប្រហែល ២៥០ គីឡូម៉ែត្រ។ វាត្រូវបានសាងសង់ដោយក្រុមហ៊ុនឯកជនមួយក្នុងតម្លៃ ១៧ ពាន់លានរូពីឬស្មើនឹង ២០៨ លានដុល្លារ៕ សម្រួលដោយ ទៀង បុណ្ណរី
