ចំនួនអ្នកស្លា.ប់ដោយសារខ្យល់ព្យុះស៊ីក្លូន Mocha នៅមីយ៉ាន់ម៉ា កើនឡើងដល់៨១នាក់

ចំនួនអ្នកស្លាប់នៅក្នុងប្រទេសមីយ៉ាន់ម៉ាដែលរងគ្រោះដោយព្យុះស៊ីក្លូន បានកើនឡើងដល់យ៉ាងហោចណាស់ ៨១នាក់នៅថ្ងៃអង្គារទី ១៦ ខែឧសភា នេះបើយោងតាមមេដឹកនាំក្នុងតំបន់ មន្ត្រី និងប្រព័ន្ធផ្សព្វផ្សាយរដ្ឋ ខណៈដែលអ្នកស្រុកកំពុងរង់ចាំជំនួយ និងការឧបត្ថម្ភ។  ខ្យល់ព្យុះ Mocha បានបង្កឱ្យមានការ​បាក់​ដី​កាលពី​ថ្ងៃអាទិត្យ​ ជាមួយនឹង​កម្លាំង​ខ្យល់​រហូតដល់ ១៩៥ គីឡូម៉ែត្រ​ក្នុង​មួយ​ម៉ោង ដោយ​បាន​ធ្វើឱ្យបាក់​បង្គោល​ភ្លើង និងបំផ្លិចបំផ្លាញ​ទូក​នេសាទអស់​ជាច្រើនគ្រឿង។ មេដឹកនាំក្នុងតំបន់បានប្រាប់អ្នកយកព័ត៌មាន AFP នៅកន្លែងកើតហេតុថា យ៉ាងហោចណាស់មនុស្ស ៤៦នាក់បានស្លាប់នៅក្នុងភូមិរដ្ឋរ៉ាឃីន (Rakhine) និងភូមិខុងដូកកា (Khaung Doke Kar) ដែលជាទីជម្រករបស់ជនជាតិភាគតិចមូស្លីមរ៉ូហ៊ីងយ៉ា។  យោងតាមទូរទស្សន៍រដ្ឋមីយ៉ាន់ម៉ា MRTV បានឱ្យដឹងថា មនុស្សចំនួន១៣នាក់បានស្លាប់នៅពេលដែលវត្តមួយបានដួលរលំនៅក្នុងភូមិមួយក្នុងសង្កាត់ Rathedaung ហើយស្ត្រីម្នាក់បានស្លាប់នៅពេលដែលអគារមួយបានដួលរលំនៅក្នុងភូមិជិតនោះ។ យ៉ាងណាមិញ ថ្នាក់ដឹកនាំក្នុងតំបន់បានលើកឡើងថា ចំនួនអ្នកស្លាប់នឹងកើនឡើងកាន់តែច្រើនបន្ថែមទៀត ខណៈដែលមនុស្សជាងមួយរយនាក់កំពុងបាត់ខ្លួន។  គួរបញ្ជាក់ថា ខ្យល់ព្យុះ Mocha គឺជាព្យុះស៊ីក្លូនដ៏មានឥទ្ធិពលបំផុតដែលបានវាយលុកតំបន់នេះក្នុងរយៈពេលជាងមួយទស្សវត្សរ៍ និងបានបក់បោកទៅលើភូមិស្រុកនានា និងផ្តាច់ទំនាក់ទំនងនៅទូទាំងតំបន់រ៉ាឃីន៕  សម្រួលដោយ  ទៀង  បុណ្ណរី