ប្រធានសមាគមកីឡាបាល់ទាត់ម៉ាឡេស៊ីថា នឹងឈ្នះក្រុមជើងខ្លាំងប្រចាំតំបន់ ថៃនិងវៀតណាម
ស៊ីហ្គេម៖ ប្រធានសមាគមកីឡាបាល់ទាត់ម៉ាឡេស៊ី លោក ហាមីនឌីន ម៉ូអាមីន Hamidin Mohd Amin មានសុទិដ្ឋិនិយមចំពោះឱកាសដែលក្រុមបាល់ទាត់ម៉ាឡេស៊ី អាចយកឈ្នះទាំងថៃ និងវៀតណាម ក្នុងព្រឹត្តិការណ៍កីឡាស៊ីហ្គេម លើកទី៣២ នៅកម្ពុជា…។ លោក Amin បាននិយាយថា ២ប្រកួតបន្ទាប់របស់ក្រុមម៉ាឡេស៊ី គឺសំខាន់ខ្លាំងណាស់។ លោកបាននិយាយក្នុងជំនួបជាមួយប្រព័ន្ធផ្សព្វផ្សាយក្នុងស្រុកនៅកម្ពុជា កាលពីយប់ថ្ងៃព្រហស្បតិ៍ទី៤ ខែឧសភាថា៖ «យើងនឹងប្រកួតពីរប្រកួតជាមួយថៃ និងវៀតណាម ដូចការប្រកួតវគ្គផ្តាច់ព្រ័ត្រ។ ប្រសិនបើយើងឈ្នះជាមួយក្រុមទាំងពីរនេះ ម៉ាឡេស៊ីអាចជឿជាក់លើឱកាសនៃការឈ្នះមេដាយមាស»។ លើសពីនេះ ប្រធានសមាគមកីឡាបាល់ទាត់ម៉ាឡេស៊ីរូបនេះ ជឿជាក់ថា ម៉ាឡេស៊ីអាចយកឈ្នះថៃ និងវៀតណាម ដរាបណាកីឡាករម៉ាឡេស៊ីប្រមូលអារម្មណ៍ផ្តោតលើការប្រកួតឱ្យបានល្អ និងលេងដោយទំនុកចិត្ត។ បន្ទាប់ពីយកឈ្នះក្រុមជម្រើសជាតិឡាវ ក្នុងការប្រកួតបើកឆាកនាថ្ងៃពុធទី៣ ខែឧសភា ម៉ាឡេស៊ីនៅសល់៣ប្រកួតទៀតក្នុងដៃ។ ក្រុមម៉ាឡេស៊ីត្រូវជួបថៃ នៅថ្ងៃសៅរ៍ទី៦ ខែឧសភានេះ ខណៈនឹងជួបក្រុមវៀតណាម នៅថ្ងៃទី៨ ខែឧសភា និងសិង្ហបុរីថ្ងៃទី១១ ខែឧសភា ខណៈវៀតណាម នឹងជួបថៃក្នុងការប្រកួតចុងក្រោយនៅថ្ងៃទី១១ ឧសភាផងដែរ។ គួររំឭកថា នៅស៊ីហ្គេម លើកទី៣១ នៅប្រទេសវៀតណាម ម៉ាឡេស៊ីបានចូលដល់វគ្គពាក់កណ្ដាលផ្ដាច់ព្រ័ត្រ ប៉ុន្តែបានបរាជ័យក្រោមថ្វីជើងម្ចាស់ផ្ទះ បន្ទាប់មកចាញ់ឥណ្ឌូណេស៊ីក្នុងការប្រកួតដណ្តើមមេដាយសំរឹទ្ធផងដែរ…៕ សម្រួលដោយ ទៀង បុណ្ណរី
