ប្រទេស ឡាវ ចេញច្បាប់ហាមប្រាមចំនួន ៨ មិនឲ្យពលរដ្ឋប្រព្រឹត្តថ្ងៃចូលឆ្នាំថ្មី
អាជ្ញាធរក្នុងទីក្រុងវៀងចន្ទន៍ ប្រទេសឡាវបានចេញច្បាប់ហាមប្រាមចំនួន ៨ ដើម្បីឲ្យប្រជាពលរដ្ឋអនុវត្តតាម ក្នុងអំឡុងពេលបុណ្យចូលឆ្នាំថ្មី ឬពិធីបុណ្យ Pi Mai ។ សេចក្តីជូនដំណឹង ក៏ដូចជាច្បាប់ហាមប្រាមដែលចេញដោយបញ្ជាការដ្ឋានប៉ូលិសក្រុងវៀងចន្ទន៍ ក្រោមក្រសួងសន្តិសុខសាធារណៈ ទាំង ៨ នោះរួមមាន៖ ១. ហាមលក់ ឬទិញវត្ថុគ្រប់ប្រភេទណាដែលមានសំឡេងឭខ្លាំង និងហាមបាញ់កាំជ្រួច ឬផាវគ្រប់ប្រភេទ ។ កុំប្រើសារធាតុផ្ទុះ សារធាតុគីមី ឬសារធាតុវិទ្យុសកម្ម ។ ២. កុំប្រើធុងទឹកធំៗ ដូចជា បាសាំងទឹក ឬប្រើទុយោទឹកបាញ់អ្នកដទៃដែលកំពុងធ្វើដំណើរនៅលើផ្លូវ ។ កុំប្រារព្ធពិធីជប់លៀងនៅតាមផ្លូវ ឬចិញ្ចើមថ្នល់ ។ ៣. កុំប្រើ ឬគប់ទឹកដែលមិនមានអនាម័យ ទឹកពណ៌ ទឹកក្ដៅ ឬពុល ទឹកកក ឬទឹកច្រកក្នុងប៉េងប៉ោង ។ ហាមស្លៀកសម្លៀកបំពាក់មិនសមរម្យ ស៊ិចស៊ី ឬលេចលើលេចក្រោមជាដើម ។ ៤. ហាមប្រារព្ធពិធីនៅច្រាំងទន្លេមេគង្គដោយមិនមានការអនុញ្ញាត ឬនៅតំបន់ក្បែរមាត់ទន្លេ ដោយគ្មានវត្តមានមន្ត្រីនគរបាល ។ ៥. ហាមប្រើប្រាស់យានជំនិះដើម្បីដង្ហែ ឬបិទផ្លូវ មិនត្រូវជិះម៉ូតូ ឬបើកបរយានជំនិះជាក្រុម និងមិនត្រូវបើកបរក្នុងពេលស្រវឹង ។ ៦. កុំចាក់ភ្លេង ឬចម្រៀងឭខ្លាំងនៅផ្ទះ កន្លែងអាជីវកម្ម ឬកន្លែងសាធារណៈ ។ កម្រិតសំឡេងតន្ត្រីមិនត្រូវលើសពី ៨០ ចាប់ពីម៉ោង ៨ ព្រឹកដល់ម៉ោង ១១ យប់ ។ ៧. អ្នកដំណើរមិនគួរអង្គុយលើគែមខាងក្រោយរបស់រថយន្តភីកអាប់ អំឡុងពេលធ្វើដំណើរឡើយ ។ ឡានដឹកទំនិញ និងឡានក្រុងមិនត្រូវផ្ទុកទំនិញលើសទម្ងន់ ឬលើសអ្នកដំណើរឡើយ ។ អ្នកបើកបរយានយន្តគ្រប់ប្រភេទ ត្រូវគោរពស្លាកសញ្ញាចរាចរណ៍ ។ ៨. ហាមជះទឹកដាក់មន្ត្រីប៉ូលិសដែលបំពេញភារកិច្ច រក្សាសណ្តាប់ធ្នាប់តាមដងផ្លូវ ឬកន្លែងណាផ្សេងទៀត ។ គួរបញ្ជាក់ថា ប្រទេសឡាវនឹងរៀបចំពិធីបុណ្យចូលឆ្នាំថ្មីប្រពៃណីជាតិរយៈពេល ៣ ថ្ងៃ ពោលនៅថ្ងៃទី១៤ ដល់ថ្ងៃទី១៦ ខែមេសា ឆ្នាំ២០២៣ នេះ ៕ សម្រួលដោយ ទៀង បុណ្ណរី
