សមត្ថកិច្ចបំបែកសំណុំរឿងករណីបាញ់សម្លា..ប់ជនរងគ្រោះនៅខេត្តបាត់ដំបង ឃាត់ខ្លួនបាន៦នាក់

បាត់ដំបង៖ សមត្ថកិច្ចតាមប្រមាញ់ឈានដល់ការចាប់ខ្លួនខ្មាន់កាំភ្លើង រួមនឹងបក្ខពួកសរុបចំនួន៦នាក់ បន្ទាប់ពីពួកគេបានបាញ់ទៅលើយុវជនម្នាក់បណ្តាលឱ្យស្លាប់ដោយគ្មានហេតុផល។ ការឃាត់ខ្លួននេះធ្វើឡើងនៅវេលា​ម៉ោង១១និង០៦នាទីថ្ងៃទី១១ ខែមេសា ឆ្នាំ២០២៣ នៅចំណុចភូមិអង់ សង្កាត់អូរចារ ក្រុងបាត់ដំបង ខេត្តបាត់ដំបង។  ការឃាត់ខ្លួននេះដោយអនុវត្តតាមការណែនាំបញ្ជាផ្ទាល់ពីស្នងការដ្ឋាននគរបាលខេត្តបាត់ដំបង លោកវរសេនីយ៍ឯក ឈឿង គឹមសុង ស្នងការរងដឹកនាំការិយាល័យនគរបាលព្រហ្មទណ្ឌកម្រិតស្រាល និងដោយមានការសម្របសម្រួល នីតិវិធីពីឯកឧត្ដម កែវ សុជាតិ ព្រះរាជអាជ្ញានៃអយ្យការអមសាលាដំបូងខេត្តបាត់ដំបង កម្លាំងអន្តរាគមន៍បង្ការ បង្ក្រាប សហការជាមួយកម្លាំងការិយាល័យនគរបាលព្រហ្មទណ្ឌកម្រិតធ្ងន់ដែលដឹកនាំដោយលោកនាយការិយាល័យ កម្លាំងអធិការដ្ឋាននគរបាលក្រុងបាត់ដំបង កម្លាំងអធិការដ្ឋាននគរបាលស្រុកសង្កែ កម្លាំងអធិការដ្ឋាននគរបាលស្រុកភ្នំព្រឹក កម្លាំងអធិការដ្ឋាននគរបាលស្រុកថ្មគោល កម្លាំងអធិការដ្ឋាននគរបាលស្រុកបវេល កម្លាំងកងរាជអាវុធហត្ថខេត្តបាត់ដំបង ចុះប្រតិបត្តិការបង្ក្រាបករណីឃាតកម្ម(ប្រើប្រាស់កាំភ្លើងខ្លីបាញ់សម្លាប់) ១ករណី និងបានធ្វើការនាំខ្លួនជនសង្ស័យចំនួន០៦នាក់មកកាន់ ស្នងការដ្ឋាន។  ជនសង្ស័យទាំង៦នាក់គឺ១.ឈ្មោះ វុធ សួខសួស្តី ហៅសល់ ភេទប្រុស អាយុ២៥ឆ្នាំ មានទីលំនៅភូមិអន្លង់ក្រូច ឃុំបួរ ស្រុកភ្នំព្រឹក  (ជាជនដៃដល់)។ ២.ឈ្មោះ ឡុង ស្រីចើត ភេទប្រុស អាយុ២១ឆ្នាំ មានទីលំនៅភូមិក្បាលឡាន ឃុំអំពិលប្រាំដើម ស្រុកបវេល(ជាបក្ខពួក)។ ៣. ឈ្មោះ កៅលីគួ ភេទប្រុស អាយុ២១ឆ្នាំ មានទីលំនៅភូមិបោសឡោក ឃុំសឿ ស្រុកមង្គលបូរី(ជាបក្ខពួក)។ ៤.ឈ្មោះ កែវ ឡេងហាក់ ភេទប្រុស អាយុ២៣ឆ្នាំ មានទីលំនៅភូមិអូរស្បែកកប្រើស ឃុំអំពិលប្រាំដើម ស្រុកបវេល(ជាបក្ខពួក)។ ៥.ឈ្មោះ លឹម គឹមថុង ភេទប្រុស អាយុ១៨ឆ្នាំ មានទីលំនៅភូមិអន្លង់ស្តី ឃុំអំពិលប្រាំដើម ស្រុកបវេល(ជាបក្ខពួក)។ និង៦.ឈ្មោះ ស៊ី សំ ភេទប្រុស អាយុ២៧ឆ្នាំ មានទីលំនៅភូមិសៀម ឃុំអំពិលប្រាំដើម ស្រុកបវេល(ជាបក្ខពួក)។  ក្រោយការសាកសួរជនសង្ស័យបានឆ្លើយសារភាពថា ពួកខ្លួនបានប្រើប្រាស់កាំភ្លើងខ្លីបាញ់ទៅលើជនរងគ្រោះ​នៅចំណុចកើតហេតុខាងលើប្រាកដមែន។ វត្ថុតាងដកហូតរួមមាន អាវុធខ្លី១ដើម និងម៉ូតូចំនួន០៥គ្រឿង។ គួរបញ្ជាក់ថា កាលពីថ្ងៃទី០៩ ខែមេសា ឆ្នាំ២០២៣ វេលាម៉ោង១២និង៣៥នាទី នៅចំណុចក្រុមទី៦១ ភូមិបឹងព្រីង ឃុំបឹងព្រីង ស្រុកថ្មគោល ខេត្តបាត់ដំបង ជនសង្ស័យទាំង០៦នាក់នេះបានចូលរួមធ្វើសកម្មភាពបាញ់សម្លាប់ជនរងគ្រោះឈ្មោះ រឿង ប៉ូឡូ ភេទប្រុស អាយុ២៨ឆ្នាំ មានទីលំនៅភូមិបឹងព្រីង ឃុំបឹងព្រីង ស្រុកថ្មគោល ខេត្តបាត់ដំបង បណ្តាលឱ្យរងរបួស០១គ្រាប់ ត្រូវត្រង់ទ្រូងខាងឆ្វេង(ស្លាប់ ពេលបញ្ជូនទៅដល់មន្ទីរពេទ្យ)។ បច្ចុប្បន្នជនសង្ស័យខាងលើត្រូវបានការិយាល័យនគរបាលព្រហ្មទណ្ឌកម្រិតធ្ងន់កំពុងធ្វើការកសាងសំណុំរឿង ដើម្បី បញ្ជូនទៅសាលាដំបូងខេត្តបាត់ដំបង ចាត់ការបន្តតាមនីតិវិធី…៕   សម្រួលដោយ  ទៀង  បុណ្ណរី