អ្នកដែលធ្វើការចេញក្រោយម៉ោង ៨យប់ ត្រូវមានលិខិតបញ្ជាក់ និង ត្រូវពាក់កាតជាប់ខ្លួន

TNM(ភ្នំពេញ) ៖ ចំពោះអ្នកដែលធ្វើការចេញក្រោយម៉ោង ៨យប់ ត្រូវមានលិខិតបញ្ជាក់ និង ត្រូវពាក់កាតជាប់ខ្លួន ចាប់ពីយប់ថ្ងៃទី១ ខែមេសា ឆ្នាំ២០២១ នេះតទៅ ។ នេះជាបទបញ្ជារបស់លោកឧត្តមសេនីយ៍ឯក ស ថេត អគ្គស្នងការរង និង ជាស្នងការនគរបាលរាជធានីភ្នំពេញ ។

លោក ស ថេត ថ្លែងតាមបណ្តាញសង្គម Facebook ថា សូមបងប្អូនប្រជាពលរដ្ឋចូលរួមអនុវត្ត តាមសេចក្តីសម្រេចនេះ ។ ចំពោះអ្នកបំពានបម្រាមគោចរ នេះ នឹង ត្រូវឃាត់យានយន្ត យកមករក្សាទុក ហើយត្រូវឲ្យធ្វើចត្តាឡីស័ក នៅផ្ទះរយ:ពេល១៤ថ្ងៃ ។

លោកស្នងការរាជធានីភ្នំពេញ សង្កត់ធ្ងន់ ថា «បើមិនអនុវត្តតាម នោះ សមត្ថកិច្ចនឹងចាត់វិធានការតាមច្បាប់»។

គួររំលឹកថា លោក ឃួង ស្រេង អភិបាលរាជធានីភ្នំពេញ កាលពីថ្ងៃទី១ ខែមេសា ឆ្នាំ២០២១ បានសម្រេចផ្អាកជាបណ្តោះអាសន្ន នូវការធ្វើចរាចរណ៍ក្នុងភូមិសាស្ត្ររាជធានីភ្នំពេញ នៅចន្លោះម៉ោង៨យប់ ដល់ម៉ោង៥ភ្លឺ លើកលែងតែចំពោះករណីមួយចំនួន ។

នៅក្នុងវិធានការរដ្ឋបាល នេះ លោក ឃួង ស្រេង បានសម្រេចផ្អាកជាបណ្តោះអាសន្ននូវការធ្វើចរាចរណ៍ក្នុងភូមិសាស្ត្ររាជធានីភ្នំពេញ លើកលែងតែចំពោះករណីមួយចំនួន ដូចខាងក្រោម ៖

– ការធ្វើដំណើរដោយមូលហេតុសុខភាពបន្ទាន់ និងមូលហេតុចាំបាច់ក្នុងគ្រួសារ ដែលមានលិខិតបញ្ជាក់ ឬការអនុញ្ញាតពីអាជ្ញាធរមានសមត្ថកិច្ចដែលនៅជិតបំផុត

– ការធ្វើដំណើររបស់បុគ្គលិកក្រុមគ្រូពេទ្យទាំងផ្នែករដ្ឋនិងឯកជន មន្ត្រីរាជការ ក្រុមពន្លត់អគ្គិភ័យ កងកម្លាំងប្រដាប់អាវុធគ្រប់ប្រភេទ ដើម្បីបំពេញបេសកកម្មជូនស្ថាប័ន-អង្គភាព

– ការធ្វើចរាចរណ៍របស់រថយន្តកុងតឺន័រ រថយន្តដឹកទំនិញ រថយន្តបាញ់បេតុង រថយន្តសម្រាប់បម្រើឱ្យ ការដឹកជញ្ជូនទំនិញ ផ្គត់ផ្គង់ការដ្ឋានសំណង់ រថយន្តដឹកជញ្ជូនសំរាម ការដឹកជញ្ជូនម្ហូបអាហារ របស់បុគ្គលិកបម្រើសេវាដឹកជញ្ជូន -សំណល់រឹង និងសំណល់វេជ្ជសាស្ត្រ

– ការធ្វើដំណើររបស់បុគ្គលិក និងកម្មករ-កម្មការិនី ទៅទីកន្លែងបំពេញការងារនៅក្នុងសហគ្រាស គ្រឹះស្ថាន រោងចក្រ ឬទីតាំងអាជីវកម្ម ដែលអនុញ្ញាតឱ្យបើកដំណើរការជាធម្មតា

– ការធ្វើដំណើរចាំបាច់ផ្សេងៗទៀត ដែលមានការអនុញ្ញាតពីអាជ្ញាធរមានសមត្ថកិច្ច។

ក្រៅពីវិធានការផ្អាកនូវការធ្វើចរាចរណ៍ក្នុងភូមិសាស្ត្ររាជធានីភ្នំពេញ នេះ លោកអភិបាលរាជធានីភ្នំពេញ ក៏បានបញ្ជាឱ្យផ្អាកជាបណ្តោះអាសន្ននូវសកម្មភាពអាជីវកម្មចំពោះតូបអាហារ ភោជនីយដ្ឋាន ហាងកាហ្វេ និងភោជនីយដ្ឋាននៅតាមសណ្ឋាគារ ដែលទទួលអតិថិជនចូលមកទទួលទាន ភេសជ្ជៈ និងគ្រឿងស្រវឹង ។ លើសពីនេះក៏បានហាមឃាត់ការជួបជុំប្រមូលផ្តុំផ្សេងៗ ផងដែរ៕