ខឹងមានជំងឺប្រចាំកាយរ៉ាំរ៉ៃច្រើន នគរបាលស័ក្ដិ៤ម្នាក់បា.ញ់សម្លា.ប់ខ្លួន
ភ្នំពេញ៖ ខឹងចិត្តមានជំងឺប្រចាំកាយច្រើន បុរសម្នាក់ជាមន្ត្រីនគរបាលពាក់ស័ក្ដិ ៤ នៅផ្នែកមន្ទីរប្រឆាំងបទល្មើសគ្រឿងញៀន បានសម្រេចចិត្តដកកាំភ្លើងបាញ់សម្លាប់ខ្លួនឯងបណ្ដាលឱ្យស្លាប់មួយរំពេច។ ហេតុការណ៍ដ៏ភ្ញាក់ផ្អើលនេះកើតឡើងនៅវេលាម៉ោង២ និង១០នាទីរំលងអធ្រាត្រ ឈានចូលថ្ងៃទី២៨ ខែមីនា ឆ្នាំ២០២៣ ស្ថិតតាមបណ្ដោយផ្លូវ៥៣BT ភូមិត្នោតជ្រុំ សង្កាត់បឹងទំពុនទី១ ខណ្ឌមានជ័យ រាជធានីភ្នំពេញ។ សពជនរងគ្រោះមានឈ្មោះ ស៊ុម រី អាយុ ៥៤ ឆ្នាំ មុខរបរបម្រើការងារនៅក្នុងអគ្គស្នងការនគរបាលជាតិ ផ្នែកមន្ទីរប្រឆាំងគ្រឿងញៀន ស្នាក់នៅផ្ទះកើតហេតុខាងលើ។ ប្រភពពីបងប្អូនជនរងគ្រោះបានឱ្យដឹងថា មុនកើតហេតុពួកគាត់បានសម្រាកនៅខាងលើផ្ទះ ចំណែកឯបុរសរងគ្រោះត្រូវជាបងសម្រាកលើគ្រែខាងក្រោមផ្ទះតែម្នាក់ឯង។ លុះដល់ម៉ោង២ និង១០ នាទីរំលងអធ្រាត្រ ពួកគាត់ក៏បានឮស្នូរសំឡេងកាំភ្លើងផ្ទុះមួយគ្រាប់។ ភ្លាមៗ ពួកគាត់ក៏ភ្ញាក់រួចចុះពីលើផ្ទះមកមើលក្រោម ស្រាប់តែឃើញបុរសត្រូវជាបងបានបាញ់ខ្លួនឯងចំសៀតផ្កាចំនួនមួយគ្រាប់ស្លាប់នៅលើគ្រែក្រោមដើមស្វាយបាត់ទៅហើយ។ ប្រភពបន្តថា បន្ទាប់មកពួកគាត់ជាបងប្អូនសាច់ញាតិក៏បានរាយការណ៍ទៅសមត្ថកិច្ចមូលដ្ឋានសង្កាត់បឹងទំពុនទី ១ ចុះមកទីតាំងកើតហេតុ។ ក្នុងនោះ សមត្ថកិច្ចបានយកខ្សែហ៊ុមព័ទ្ធជុំវិញកន្លែងសពរងគ្រោះ រង់ចាំជំនាញចុះមកពិនិត្យបន្ត។ ជនរងគ្រោះមានជំងឺរ៉ាំរ៉ៃនៅក្នុងខ្លួនដូចជា ថ្លើម ក្រពះ និងពោះវៀនជាយូរមកហើយ ដោយមិនចង់ឱ្យក្រុមគ្រួសារពិបាករកប្រាក់ព្យាបាលជំងឺគាត់ ទើបគាត់សម្រេចចិត្តយកកាំភ្លើងបាញ់សម្លាប់ខ្លួនឯងយ៉ាងដូច្នេះ។ ក្រោយកើតហេតុ កម្លាំងសមត្ថកិច្ចមូលដ្ឋានប៉ុស្តិ៍នគរបាលរដ្ឋបាលសង្កាត់បឹងទំពុនទី១ បានសហការជាមួយមន្ត្រីជំនាញផ្នែកជំនាញកោសល្យវិច័យ ដើម្បីពិនិត្យទៅលើសព។ បន្ទាប់ពីពិនិត្យ និងកោសល្យវិច័យរួចរាល់ ក៏បញ្ជាក់បានថា ជនរងគ្រោះពិតជាបាញ់សម្លាប់ខ្លួនឯងប្រាកដមែន រួចក៏ធ្វើកំណត់ហេតុប្រគល់សពឱ្យក្រុមគ្រួសារចាត់ចែងធ្វើបុណ្យតាមប្រពៃណី៕ សម្រួលដោយ ទៀង បុណ្ណរី
