លោក វ៉ី សំណាង អភិបាលខេត្តកំពង់ស្ពឺ ដោះស្រាយទំនាស់រ​វាងក្រុមហ៊ុនអ្នកស្រី ម៉ន ដានី និងម្ចាស់ដី

លោក វ៉ី សំណាង អភិបាលខេត្តកំពង់ស្ពឺ បានសម្របសម្រួលផ្ទាល់ករណីទំនាស់រវាងភាគីក្រុមហ៊ុន ម៉ន ដានី រៀល អ៊ីស្ទេត ឯ.ក និងម្ចាស់ដី នៅថ្ងៃទី ២៣ ខែ មីនា។  លោក វ៉ី សំណាង បានប្រាប់ កម្ពុជាថ្មី ថា នៅក្នុងជំនួបនេះ ក្រុមហ៊ុន និងភាគីម្ចាស់ដី បានបញ្ជូនមេធាវីជា​តំណាងចូលរួម​ដោះស្រាយទំនាស់នេះ។ លោកអភិបាលខេត្តបានបញ្ជាក់ថា ជាលទ្ធផលភាគីទាំងពីរបានអះអាងថា នឹងខិតខំរក​ចំណុចរួម​ដើម្បីដោះស្រាយបញ្ចប់បញ្ហា។  ក្នុងតួនាទីជាអ្នកសម្របសម្រួល លោកអភិបាលខេត្តកំពង់ស្ពឺ បានថ្លែងទៅកាន់ភាគីទាំងពីរដូច្នេះថា «ពួកយើងរក​ទទួលទាន សូមកុំឈ្លោះគ្នា ​​បើភាគីទាំងពីរឈ្លោះគ្នា អ្នកខាតប្រយោជន៍គឺអតិថិជន ដែលពួកគាត់ខិតខំធ្វើជាកម្មករ កសិករ ​យកលុយមកទិញដីទិញផ្ទះ ចង់បានផ្ទះនៅ…ដល់ពេលអ្នកទាំងពីរឈ្លោះគ្នា ពួកគាត់ដែលខិតខំ​ប្រឹងប្រែងបែរ​ជាខាតវិញ…អ៊ីចឹងបានអាជ្ញាធរយើងខិតខំប្រឹងប្រែងសម្របសម្រួលដោះស្រាយ»។   លោក វ៉ី សំណាង បានសំណូមពរដល់ភាគីពាក់ព័ន្ធ កុំដណ្តើមគ្នាត្រូវរៀងខ្លួន ត្រូវថយម្នាក់មួយជំហាន ដោយបន្ទន់ឥរិយាបថយកចំណុចរួមកណ្តាលមួយ ដើម្បីជាប្រយោជន៍រួម ពោលគឺបានទាំងក្រុមហ៊ុន ម្ចាស់ដី និងប្រជាពលរដ្ឋដែលជាអតិថិជន។  ពាក់ព័ន្ធនឹងបញ្ហានេះ បើតាមប្រភពច្បាស់ការណ៍បានបញ្ជាក់ថា លោកស្រី ម៉ន ដានី និងស្វាមី បានទិញដីពីឈ្មោះ សូ សុវណ្ណ ដែលមានទំហំដី ៥០ហិកតា ស្មើនឹង ៦ប័ណ្ណ និងបានផ្ទេរកម្មសិទ្ធិ មកឈ្មោះ ម៉ន ដានី និងប្តីរួចអស់ហើយ ព្រមទាំងប្តូរប្រភេទដី និងបង្រួមក្បាលដីរួចអស់ហើយ។ ប៉ុន្តែភាគីអ្នកទិញពុំទាន់ទូទាត់ប្រាក់ឱ្យថ្លៃដីបង្គ្រប់នៅឡើយ ទើបភាគីអ្នកលក់ សូ សុវណ្ណ បានដាក់ពាក្យប្តឹង រក្សាការពារដី ចំនួន ១៣ប័ណ្ណផ្សេងទៀត ដែលភាគី ម៉ន ដានី មិនទាន់ទូទាត់ប្រាក់ តាមកិច្ចសន្យា។   ប៉ុន្តែអ្នកស្រី ម៉ន ដានី ប្រធានក្រុមហ៊ុន ម៉ន ដានី រៀល អ៊ីស្ទេត ឯ.ក លើកឡើងក្នុងវីដេអូ Live កាលពីថ្ងៃទី ១៩ មីនា កន្លងទៅថា ភាគីជាអ្នកលក់មិនគោរពលើកិច្ចសន្យាទិញ-លក់ ពោលគឺមិនប្រគល់ដី ១០០ហិកតា បន្ទាប់ពីប្រគល់​លុយជាង ១២លានដុល្លារចប់សព្វគ្រប់។  អ្នកស្រីបញ្ជាក់ថា នៅក្នុងកិច្ចសន្យាទិញ-លក់ចុះថ្ងៃទី១៤ខែ ១២ឆ្នាំ២០២០ តម្លៃដីដែល អ្នកស្រី ម៉ន ដានី​ ទិញមានចំនួនជាង ១២លានដុល្លា លើទំហំផ្ទៃដី១០០ហិកតា។ បន្ទាប់ពីប្រគល់​ប្រាក់ចប់សព្វគ្រប់ នៅថ្ងៃទី ១៤ខែ ៤ឆ្នាំ ២០២១ អ្នកស្រីមិនទទួលបានដី ១០០ហិកតានេះឡើយដោយម្ចាស់ដីប្រាប់ថា គេអាចប្រគល់ដីត្រឹមតែ៣០ហិកតាប៉ុណ្ណោះ។ មិនត្រឹមតែប៉ុណ្ណោះ អ្នកស្រីត្រូវប្រឈមនឹងបណ្ដឹងពីម្ចាស់​ដីដែលប្ដឹងគាត់​ទៅកាន់សាលាដំបូងខេត្តកំពង់ស្ពឺថែមទៀត។ អ្នកស្រី អះអាងថា មិនប្ដឹងបកវិញ ដោយសារកុំឱ្យប៉ះ​ពាល់ទង្គិចផ្លូវចិត្តអតិថិជន។  សូមបញ្ជាក់ថា ទីតាំងដីទំនាស់នេះ គឺជាគម្រោងទី២៩ របស់ក្រុមហ៊ុន ម៉ន ដានី រៀល អ៊ីស្ទេត ឯ.ក ស្ថិតនៅភូមិ​ចំការស្បូវ ភូមិដំណាក់មានជ័យ ភូមិដុតកំបោរ ភូមិភាក្សា ឃុំព្រះនិព្វាន ស្រុកគងពិសី ខេត្តកំពង់ស្ពឺ៕  សម្រួលដោយ  ទៀង  បុណ្ណរី