រថយន្តកុងតឺន័របុកគ្នា ក្រឡាប់ ឆាបឆេះរថយន្ត៣គ្រឿង ផ្អើលទាំងយប់ នៅស្រុកកៀនស្វាយ!

កណ្តាល៖ គ្រោះថ្នាក់ចរាចរណ៍ រវាងរថយន្តកុងតឺន័រ និងរថយន្តកុងតឺន័រក្នុងទិសដៅស្របគ្នា បង្កជាអគ្គីភ័យ ឆេះរថយន្ត៣គ្រឿង ទាំងយប់!។  ហេតុការណ៍នេះបានកើតឡើង នៅលើផ្លូវជាតិលេខ១ ត្រង់ចំណុចមុខផ្សារគគីរ ភូមិគគីរ ឃុំគគីរ ស្រុកកៀនស្វាយ ខេតកណ្តាល កាលពីវេលាម៉ោង១ រំលងអាធ្រាត្រឈានចូលថ្ងៃទី០៤.០៣.២០២៣។  ប្រភពបានឱ្យដឹងថាៈ នៅមុនពេលកើតហេតុ មានរថយន្តកុងតឺន័រ១គ្រឿង ពាក់ផ្លាកលេខភ្នំពេញ 3A-3853 មានសណ្តោងរ៉ឺម៉កគ្មានផ្លាកលេខ ផ្ទុកថ្នាំបាញ់មូស។  អ្នកបើកបរមិនស្គាល់អត្តសញ្ញាណ ដោយបើកក្នុងទិសដៅ ពីកើតមកលិច ពីអ្នកលឿងទៅភ្នំពេញ។  លុះមកដល់ចំណុចផ្សារគគីរ បានរេចង្កូតទៅបុក រថយន្តកុងតឺន័រ ម៉ាក MITSUBISHI SUPER GREAT ពាក់ផ្លាកលេខភ្នំពេញ 3E-9032 រ៉ឺម៉កពាក់ផ្លាលលេខ ព្រះសីហនុ 4A-0744 ។  អ្នកបើកបរមិនស្គាល់អត្តសញ្ញាណ ដែលកំពុងឈប់ចតស្របទិសគ្នា យ៉ាងពេញទំហឹង។  បណ្តាលអោយក្រឡាប់ បង្កជាអគ្គីភ័យឆេះរថយន្តទាំង២គ្រឿង ហើយថែមទាំង រាលដាល ឆេះរថយន្តម៉ាកTOYOTA ពណ៌បៃតង១គ្រឿងទៀត យ៉ាងសន្ធោសន្ធៅតែម្ដង។  ខណៈនោះគេឃើញ វត្តមានលោក ឧត្តមសេនីយ៍ទោ ឈឿន សុចិត្តស្នងការខេត្តកណ្ដាល រួមនិងលោក ឡូវ សុខសាន អភិបាលស្រុកកៀនស្វាយ ដឹកនាំកម្លាំងសមត្ថកិច្ច ចុះអន្តរាគមន៍ បាញ់ទឹកពន្លត់ទាំងកណ្ដាលយប់។  ក្នុងនោះផងដែរ សមត្ថកិច្ចប្រើប្រាស់រថយន្តបាញ់ទឹក សរុប១៥គ្រឿង រថយន្តស្នងការខេត្តកណ្តាល រាជធានីភ្នំពេញ១២គ្រឿង ប្រើប្រាស់ទឹកអស់១២ឡាន ។  រថយន្តបុរីប៉េងហួត០២គ្រឿង ប្រើប្រាស់ទឹកអស់០២រថយន្ត និងរថយន្តពន្លត់អគ្គីភ័យ ស្រុកកៀនស្វាយ ០១គ្រឿង ប្រើប្រាស់ទឹកអស់ចំនួន០៥ រថយន្ត ។  ដោយជួយអន្តរាគមន៍ បាញ់ទឹកពន្លត់ ខណៈអណ្ដាតភ្លើង បានឆាបឆេះយីហោនិងសំយ៉ាបផ្ទះ នៅក្បែរនោះចំនួន៥ផ្ទះផងដែរ ។
ករណីនេះសមត្ថកិច្ច បានបាញ់ទឹកពន្លត់វិញ១០០% នៅវេលាម៉ោង៣ទៀបភ្លឺថ្ងៃដដែល៕    សម្រួលដោយ  ទៀង  បុណ្ណរី