ស្ត្រីម្នាក់ស្លា.ប់បាត់បង់ជីវិត ខណៈប្រាប់ប្ដីទៅកែច្រមុះ តែពេលវះកាត់កែដើមទ្រូង
រាជាធានីភ្នំពេញ៖ ហេតុការណ៍ភ្ញាក់ផ្អើលមួយបានកើតឡើងនៅក្នុងមជ្ឈមណ្ឌលកែសម្ភស្ស ដោយស្ត្រីម្នាក់បានស្លាប់បាត់បង់ជីវិត ខណៈពេលកំពុងវះកាត់ដេីមទ្រូង ដែលហេតុការណ៍នេះបានកើតឡើងកាលវេលាម៉ោង៩:១០នាទីយប់ថ្ងៃទី៣ ខែមិនា ឆ្នាំ២០២៣ នៅមជ្ឈមណ្ឌលកែសម្ផស្សអន្តរជាតិ M25 សង្កាត់ស្រះចក ខណ្ឌដូនពេញ រាជធានីភ្នំពេញ…។ សពស្ត្រីរងគ្រោះឈ្មោះ ឃុន ចន្នី អាយុ៤១ឆ្នាំ ទីលំនៅភូមិគីឡូ១២ ឃុំកោះតូច ស្រុកទឹកឈូក ខេត្តកំពត។ ប្រភពពីអ្នកស្គាល់ស្ត្រីខាងលើ បានបង្ហើបប្រាប់ថា ស្ត្រីខាងលើបានសុំស្វាមីគាត់ថាទៅកែច្រមុះ ប៉ុន្តែស្ត្រីរូបនេះ បែរជាលួចកែដេីមទ្រូងដោយមិនប្រាប់គ្រួសារឡើយ ហើយក៏មកជួបរឿងស៊យរហូតដល់ស្លាប់បាត់បង់ជីវិតបែបនេះ។ យ៉ាងណាមិញ ខាងមជ្ឈមណ្ឌលកែសម្ភស្ស នៅមិនទាន់មានការបញ្ជាក់ណាមួយឡើយ អំពីហេតុការណ៍ដែលកើតឡើងនៅក្នុងមជ្ឈមណ្ឌលកែសម្ភស្សរបស់ខ្លួននេះទេ។ ភ្លាមៗសមត្ថកិច្ចបានផ្អាកដំណើរការគ្លីនិកនេះជាបណ្តោះអាសន្ន រង់ចាំសមត្ថកិច្ចជំនាញចុះត្រួតពិនិត្យជុំវិញកន្លែងកើតហេតុ និងគ្រូពេទ្យធ្វើកោសល្យវិច័យទៅលេីសពរកមូលហេតុអំពីការស្លាប់របស់ស្ត្រីខាងលើជាមុនសិន។ ជំហានដំបូងសមត្ថកិច្ចដាក់ការសន្និដ្ឋានថា សពស្ត្រីខាងលើស្លាប់ដោយសារបញ្ហាគាំងបេះដូង។ បច្ចុប្បន្នសមត្ថកិច្ចជំនាញកំពុងបន្តត្រួតពិនិត្យតាមជំនាញ រកមូលហេតុនៃការស្លាប់ថាអាចនឹងមានការពាក់ព័ន្ធជាមួយបច្ចេកទេសកែសម្ភស្សដែរ ឫទេ។ ចំណែកសពសមត្ថកិច្ចប្រគល់ឱ្យក្រុមគ្រួសារដឹកយកទៅស្រុកកំណើតធ្វើបុណ្យតាមប្រពៃណី។ នេះគឺជាមេរៀនមួយដាស់តឿនដល់បងប្អូននារីៗ ដែលស្រឡាញ់ខ្លួនប្រាណហើយជ្រើសយកការវះកាត់កែសម្ផស្សទៅតាមចំណង់ចំណូលចិត្តរបស់ខ្លួន តែមិនបានសិក្សាល្អិតលើបញ្ហាសុខភាពរបស់ខ្លួន ក៏ដូចជាស្វះស្វែងរកមជ្ឈមណ្ឌលដែលមានឯកទេសច្បាស់លាស់ដែលអាចបង្កហានិភ័យដល់ខ្លួន ដូចជាករណីខាងលើនេះ ដូច្នេះ មុននឹងធ្វើការសម្រេចចិត្តវះកាត់កែប្រែរាងកាយ សូមកុលស្ត្រីទាំងអស់មានការប្រុងប្រយ័ត្នឱ្យបានខ្ពស់បំផុត ព្រោះកន្លងមកឃើញមានជាហូរហែរនូវអ្នកវះកាត់កែសុដន់ កែមុខមាត់ កែច្រមុះ ហើយត្រូវរង់គ្រោះ ខូចខាតរាងកាយបន្ទាប់ពីវត្ថុទាំងនោះមិនសមាមាត្រជាមួយនឹងរាង្គកាយរបស់ពួកគេ និងមានអ្នកខ្លះប៉ះពាល់ដល់អាយុជីវិតក៏មាន…៕ សម្រួលដោយ ទៀង បុណ្ណរី
