សិប្បកម្មនៅខេត្តប៉ៃលិន អាចផលិតស្រាក្រហម ប្រេងកូឡា និងផលិតផលជាច្រើនមុខទៀត
ក្រៅពីល្បីត្បូងមានតម្លៃ និងផ្លែមៀនប៉ៃលិនជាដំណាំយុទ្ធសាស្រ្ត ខេត្តប៉ៃលិនក៏មានសហគ្រាសមួយចំនួនបានខិតខំកែច្នៃវត្ថុធាតុដើមក្នុងស្រុក ផលិតចេញជាផលិតផលឆ្លើយតបលក់លើទីផ្សារ។ ក្នុងសន្និសីទជោគជ័យរយៈពេល ៥ ឆ្នាំរបស់រដ្ឋបាលខេត្តប៉ៃលិនកាលពីសប្តាហ៍មុននេះ លោកជំទាវ បាន ស្រីមុំ អភិបាលនៃគណៈអភិបាលខេត្តប៉ៃលិន បាននាំយកផលិតផលដែលកែច្នៃផលិតក្នុងខេត្តប៉ៃលិនផ្សព្វផ្សាយឲ្យមហាជនបានស្គាល់ថែមទៀត។ លោកជំទាវបានលើកបង្ហាញពីស្រាមៀនប៉ៃលិន ជាផលិតផលកែច្នៃចម្រាញ់ពីផ្លែមៀនប៉ៃលិនសុទ្ធ ១០០% ដែលកំពុងទទួលបានការគាំទ្រយ៉ាងច្រើនទាំងពលរដ្ឋក្នុងខេត្តនិងទូទាំងប្រទេស។ ជាមួយគ្នានេះក៏មានប្រេងកូឡា ប្រេងខ្យល់ និងប្រេងរិតរបស់សិប្បកម្មម៉េង ទ្រី ៩៩៩ ដែលលោកជំទាវអះអាងថាមានប្រសិទ្ធភាពខ្ពស់សម្រាប់លាបគ្រេចថ្លោះផ្សេងៗដែលកន្លងទៅធ្លាប់បានផ្តល់ដល់ថ្នាក់ដឹកនាំមួយចំនួនផងដែរ។ បន្ថែមពីនោះ លោកជំទាវក៏បានបង្ហាញពីដំណាប់ស្វាយ ដំណាប់ផ្លែមៀនដែលត្រូវបានកែច្នៃដោយសហគ្រាសក្នុងខេត្តប៉ៃលិនផ្ទាល់ថែមទៀតផង។ លោកជំទាវ បាន ស្រីមុំ បន្តថា ខេត្តមានរោងចក្រសម្ងួតផ្លែមៀន និងផ្លែស្វាយ ដែលបានជួយសម្រួលក្នុងការប្រមូលទិញផលិតផលដំណាំរបស់កសិករមិនថាក្នុងខេត្តប៉ៃលិន និងបណ្តាខេត្តដទៃទៀត។ បើតាមលោកស្រីអភិបាលខេត្ត ក្នុងរយៈពេលថ្មីៗនេះតម្លៃដំណាំកសិកម្មក្នុងខេត្តមានការកើនឡើងដូចជា ពោតក្រហម ដំឡូងមី និងស្វាយកែវរមៀត មានតម្លៃខ្ពស់ជាងតម្លៃឆ្នាំកន្លងមក។ រដ្ឋបាលខេត្តសហការជាមួយមន្ទីរជំនាញខិតខំរកទីផ្សារដើម្បីលើកកម្ពស់តម្លៃកសិផល ក៏ ដូចជាលើកកម្ពស់ ជីវភាពរស់នៅប្រជាពលរដ្ឋតាមរយៈការជម្រុញដល់ការនាំចេញទៅក្រៅប្រទេស។ ជាមួយគ្នានេះ រដ្ឋបាលខេត្តក៏បានខិតខំស្រាវជ្រាវរកផលិតផលសក្តានុពលរបស់ខេត្ត ដើម្បីចូលរួមគាំទ្រនិងជំរុញចលនាភូមិមួយផលិតផលមួយ៕ សម្រួលដោយ ទៀងបុណ្ណរី 
