សមត្ថកិច្ចឃាត់ខ្លួនក្មេងស្ទាវបានកន្លះក្រុម ពាក់ព័ន្ធករណីកា.ប់ក្មេងប្រុសម្នាក់ ខណៈកន្លះក្រុមទៀតរត់គេច
ខេត្តក្រចេះ៖ គិតត្រឹមថ្ងៃទី២៥ ខែកុម្ភ: ឆ្នាំ២០២៣ នេះ សមត្ថកិច្ចឃាត់ខ្លួនក្មេងស្ទាវបានកន្លះក្រុម ពាក់ព័ន្ធករណីយកកាំបិតបាំងតោទៅកាប់លើក្មេងប្រុសម្នាក់ នៅចំណុចទួលខ្មោច ឃុំដារ ស្រុកចិត្របុរី ខេត្តក្រចេះកាលពីថ្ងៃទី២៣ ខែកុម្ភ: កន្លងទៅ ខណៈកន្លះក្រុមទៀតរត់គេចហើយសមត្ថកិច្ចកំពុងស្រាវជ្រាវ។ ក្រោយទទួលបានព័ត៌មានកាលពីម្សិលមិញ កម្លាំងជំនាញ នៃអធិការដ្ឋាននគរបាលស្រុកចិត្របុរី សហការជាមួយកម្លាំងប៉ុស្តិ៍រដ្ឋបាលដារ ធ្វើការស្រាវជ្រាវឃាត់ខ្លួនបានមុខសញ្ញា ចំនួន២នាក់ឈ្មោះ ហន សុខហេង និង ឈ្មោះ លី សុធី នៅចំណុចទួលកោះសុក្រមភូមិដារ ឃុំដារ ស្រុកចិត្របុរី ខេត្តក្រចេះ។ ហើយកម្លាំងជំនាញបន្តសហការជាមួយកម្លាំងអធិកាដ្ឋាននគរបាលក្រុងក្រចេះ និងកម្លាំងជំនាញនគរបាលព្រហ្មទណ្ទកម្រិតស្រាលនៃស្នងការដ្ឋានខេត្ត ឃាត់បានមុខសញ្ញាចំនួន២នាក់ទៀត គឺឈ្មោះ យ៉ាន់ ស៊ីនួន និងឈ្មោះ អ៊ុក វ៉ាន់មេឃ។ ចំណែកបក្ខពួកចំនួន៤នាក់ទៀតគេចខ្លួន រួមមាន៖ ឈ្មោះទី១- ភារុន ភេទប្រុស អាយុ១៦ឆ្នាំ ,២–ឈ្មោះ សុភី ភេទប្រុស អាយុ១៦ឆ្នាំ ,៣–ឈ្មោះ បញ្ញា ភេទប្រុស អាយុ១៦ឆ្នាំ ,៤-ឈ្មោះ ឆាប ភេទប្រុស អាយុ១៦ឆ្នាំ ជនជាតិខ្មែរ ដែលពួកគេមាន មុខរបរជាសិស្ស។ ចំពោះមូលហេតុដែលកើតហេតុខាងលើនោះដោយសារ ឈ្មោះ ស៊ីម ចំណាន ដែលជាជនរងគ្រោះបាន អង្គុយលើម៉ូតូម៉ាក ហុងដាឌ្រីម សេ១២៥ ពណ៌ខ្មៅ ផ្លាកលេខ ក្រចេះ1B4508 មើលគេលេងបាល់ទាត់នៅកន្លែងកើតហេតុ ស្រាប់មានក្មេងស្ទាវមួយក្រុមដែលមានគ្នា៨នាក់ បាននាំគ្នាជិះម៉ូតូមកចំនួន៤គ្រឿង (ម៉ាកយ៉ាម៉ាហាអ៊ិចសេនធ័រ ២គ្រឿង និងម៉ាកហុងដាវ៉េវ ២គ្រឿង) ភ្លាមនោះឈ្មោះ ស៊ីម ចំណាន ក្រឡេកមើលមុខ ឈ្មោះ ហន សុខហេង ក៏បត់ម៉ូតូមកវិញ ឯឈ្មោះ យ៉ាន់ ស៊ីនួន អង្គុយក្រោយលោតចុះពីលើម៉ូតូយកកាំបិតបាំងតោកាប់ទៅលើម៉ូតូរបស់ឈ្មោះ ស៊ីម ចំណាន ចំនួន៥ កាំបិតហើយកាប់យកផ្លាកលេខម៉ូតូ នាំគ្នាជិះម៉ូតូត្រឡប់ទៅខាងក្រុងក្រចេះ។ សូមបញ្ជាក់ថា ចំពោះករណីកាប់ខាងលើនេះ មិនបណ្តាលឱ្យជនរងគ្រោះរងរបូសទ្បើយ គ្រាន់តែខូចខាតម៉ូតូតែប៉ុណ្ណោះ។ បច្ចុប្បន្នជនសង្ស័យខាងលើ ត្រូវបានឃាត់ខ្លួនជាបណ្ដោះអាសន្ននៅអធិការដ្ឋាននគរបាលស្រុកចិត្របុរី កសាងសំណុំរឿងបញ្ជូនមកការិយាល័យជំនាញខេត្តដើម្បីបន្តនីតិវិធី៕ សម្រួលដោយ ទៀង បុណ្ណរី
